Kututika 5 - Libuka Lya Kuyela

Moshesha na Aloni bakwimana ku meho a Fwalo wamu Engepita

¹ Niho Moshesha na Aloni bayile kuli Fwalo wa mu Engepita, pe bambile ngayi, “Nyambi ya Ngula, Nyambi wa Baishalela unamba ngayi, yitabilisha bantu bami mwanga baye, bakampingile shimbo mu libelelengwa sha kundemeeka.”

² Ngoboni Fwalo wakumbwile ngayi, “Kati Nyambi ya Ngula wenga yani? Shumangani eshe ami nafwanina kumuyuvwilila ngayi mwanga nitabilishe Baishalela ngayi baye? Kulimuka Nyambi ya Ngula nifwako, pe kami kuketabila ngayi baye nifwako.”

³ Niho Moshesha na Aloni bakumbwile mwene ngayi, “Nyambi wa Bahebelu unalihololo niye mwine kukwetu. Tukukunyepa ngayi, utwitabilishe tuye mukala wa matena ahatu mu libelelengwa na kukombelela kuli Nyambi ya Ngula, Nyambi yetu, kutina atuziha na wulweli hinge na nzita ndi tufwako kuya.”

⁴ Mwene wa mu Engepita wambile kuli ba Moshesha na Aloni ngayi, “Kati shumangani mu kukanishila bantu ku milimo yabo? Bweshenu aba bandungo ku milimo.”

⁵ Fwalo wambile ngayi, “Bantu mwavulakale kupitakana Baengepita. Haya mukushinga kubalehesha kutenda milimo ndi?”

⁶ Wowo mutena Fwalo watongwezele bakakutendesha bandungo ba Baengepita na bakulwane ba Baishalela bakakwendesha milimo ngayi,

⁷ “Hinga kami mukapanika bantu ntende za kutendesha mashintina ngonehe shiya mwatendanga mwaka, balehenu baye na kulivukwilazo nibo bamwine.

⁸ Ngoboni mukafwanina kubaleha batendenga wingi wa mashintina uya batendanga ha kutatika, hinga mubancencumwinako boha, ndaba kaliha batendanga milimo shikuma, pe nisho shuma bali na kutatokela ngayi nibetabilishe mwanga baye bakakombelele nkombela kuli Nyambi yabo!

⁹ Tendeshenu aba bantu milimo yayikalu shikuma na kubatengelesha ngayi bekale hibatenda milimo yabo na kubula kuyuvwilila ku nyambilo ya kwongeza.”

¹⁰ Bakakwendesha bandungo na bakakutwaminina milimo batutikilile ku Baishalela na kubatongweza ngayi, “Fwalo namba nehe ngayi kukamipanika ntende kami wufwako.

¹¹ Mu ku fwanina kuya na kuvukula ntende oku mu kutwesha kuziwana, ngoboni mushili ku fwanina kutenda wingi wa mashintina aya mwatendanga.”

¹² Nohobene bantu balipanzanishile nokunoku mu litunga nimwalyo lya Engepita na kushinga ntende.

¹³ Pe bakakwendesha bandungo babakandamikilenga kutenda wingi wa mashintina uya batendelenga ha mutena ha mutena oho bashili kupanikiwa ntende.

¹⁴ Bakakwendesha bandungo ba Fwalo bakamine bakulwane ba Baishalela, aba bemikiwile kwinga bakakwendesha milimo. Babepwile ngayi, “Shumangani munabulili kutenda mashintina amengi lelo ngonehe aya mwatendanga ha kutatika?”

¹⁵ Niho bakakwendesha milimo ba Baishalela bayile kuli Fwalo na kulinyenga ngayi, “Shumangani ukutendela nehe kukwetu?

¹⁶ Kowa ntende zikupanikiwa kukwetu ngoboni tushili kutongweziwa ngayi tutende mashintina amengi! Pe haya obe hekulyetu, tuli na kukamiwa. Owe wunengi mulandu wa bantu bobe.”

¹⁷ Ngoboni Fwalo wakumbwile ngayi, “Muli bavwa, mwa shikuma muli bavwa! Kushinga kutenda milimo mufwako, nisho shuma shiya mu kunyepela ngayi nimitabilishe muye mukakombelele kuli Nyambi ya Ngula.

¹⁸ Haya bokenu ku milimo yenu! Kowa ntende zikapanikiwa kukwenu, ngoboni mukafwanina kutenda wingi ukushingiwa wa mashintina.”

¹⁹ Bakakwendesha milimo ba Baishalela balimonene ngayi bali mu wukalu oho babatongwezele ngayi, “Mu ku fwanina kutenda mashintina amengi ha mutena ha mutena.”

²⁰ Oho bafumine kuli Fwalo, bawanine ba Moshesha na Aloni banabatatilili.

²¹ Bambile kuli Moshesha na Aloni ngayi, “Nyambi ya Ngula amone ebye munatende pe ukamishushula ndaba muna tu zimbiwishi kuli Fwalo na babilolo bendi. Muli na kubatumiza ngayi mwanga batuzihe.”

Kulinyenga kwa Moshesha kuli Nyambi ya Ngula

²² Niho Moshesha afutukilile kami kuli Nyambi ya Ngula pe wambile ngayi, “Obe hekulu, shumangani ukwikalikila bantu bobe na shilala? Kati shumangani wantumina kuno?

²³ Ndaba kubalika ku shikati shiyo neza kuli Fwalo na kwamba nendi mu lizina lyobe, niye unabekaliki na nguma. Pe kowa shuma wunatende sha kulamwina bantu bobe.”