Kututika 40 - Libuka Lya Kuyela

Kwimika na kufungwila Ntanda ya Shikungulukilo

¹ Nyambi ya Ngula wambile kuli Moshesha ngayi,

² “Ha mutena wakutatika ku ngonda wakutatika, ukemike Ntanda ya Shikungulukilo.

³ Pe ukayakemo Likwati lya Kulimama omu muli matapa a wupaki na kuyaka shibaamba kumbili yalyo.

⁴ Ukengize kami tebulu mukati na kuyakaho byuma byayo. Ukalete kami lyeyeko lya mimuni na kuyakaho mimuni.

⁵ Ukayake kaala ka ngolinde kakuhokeshela incence kumbili ya Likwati lya Kulimama Likwati lya Kulimama lya wupaki na kuyaka mu wumbo ku menginino a ntanda.

⁶ Ukayake kami kaala kakuhokeshela zinkombela kumbili ya ntanda.

⁷ Ukayake kami lizawo mukati ka ntanda na kaala na kwinzalishamo mema.

⁸ Ukazingwilisheko shipango na kukoleka mu wumbo ku menginino a shipango.

⁹ “Niho ukawabishe ntanda na mazi ashizila na byuma nimwabyo bilimo mu kuyizilika, niyo yikenga ya kuyela.

¹⁰ Niho kami ukawabishe kaala kakuhokeshela zinkombela na byuma byako nimwabyo, mu kukazilika, niko kakenga ka kuyela.

¹¹ Ukazilike na kuwabisha lizawo na kapona kalyo mu nzila yimo.

¹² “Niho ukahenyeshele Aloni na bana bendi ku menginino a ntanda na kubayowesha na mema.

¹³ Ukavwalike Aloni bivwalo bya mukankombela na kumuwabisha mazi ashizila akumuzilika ngayi mwanga akatweshe kuntendelanga kwinga mukankombela.

¹⁴ Niho ukahenyesheleko kami bana bendi, pe ukabavwalike bikobelo.

¹⁵ Ukabawabishe ngonehe shiya wawabisha tatiyabo ngayi mwanga batweshe kukantendelanga kwinga Bakankombela. Kuwabishiwa okwe kukabengisha Bakankombela ku bihemunwino byabo nimwabyo.”

¹⁶ Moshesha watendele byuma nimwabyo ngonehe eshe Nyambi ya Ngula amutongwezele.

¹⁷ Nohobene ha mutena wakutatika wa ngonda wakutatika wa mwaka wawubili oho bafumakale mu Engepita, Ntanda ya Shikungulukilo yemikiwile.

¹⁸ Moshesha wayakile tupona twayo hanci, wemikile maleenge wayo mu tupona. Wakwatishile mikambo yayo, pe wemikile zimpangwa zayo.

¹⁹ Niho atandubwile bya kufwika hayilu ya ntanda, pe wayakileho bya kufwika ha munkanda hayilu yayo ngonehe eshe Nyambi ya Ngula amutongwezele.

²⁰ Niho Moshesha ashimbile matapa abili a limanya a wupaki wawayakile mu Likwati lya Kulimama. Wahomekele mibanda mu mahuzi a Likwati, pe wafwikileho muhuko wa nceshe.

²¹ Niho ayakile Likwati mu ntanda, wakolekele shibaamba sha kulama Likwati. Eshe nisho akowezele Likwati lya Kulimama lya wupaki ngonehe eshe amutongwezele Nyambi ya Ngula.

²² Pe Moshesha wayakile tebulu mu ntanda, ku mbalila yaku ncelele ha munkanda wa shibaamba,

²³ wayakileho mankende akutupula, ngonehe eshe amutongwezele Nyambi ya Ngula.

²⁴ Niho ayakile lyeyeko lya mimuni mu ntanda kuliyahikiza na tebulu, kumbalila yaku mabukubuku a ntanda.

²⁵ Pe kuyo wabangizile mimuni ngonehe eshe amutongwezele Nyambi ya Ngula.

²⁶ Wayakile kaala ka ngolinde mu ntanda kumbili ya shibaamba,

²⁷ wahokeshele incence ya livumba lyaliwahe ngonehe eshe amutongwezele Nyambi ya Ngula.

²⁸ Niho akolekele mu wumbo waku menginino a ntanda,

²⁹ Pe wayakileko kaala kakuhokeshela zinkombela kumbili ya mu wumbo waku menginino a ntanda. Niho akombelelele nkombela ya kuhokesha hahasho na ntupu ya mpeka, ngonehe eshe amutongwezele Nyambi ya Ngula.

³⁰ Pe wayakile kami lizawo mukati ka ntanda na kaala, kami wenzalishilemo mema.

³¹ Moshesha na Aloni na bana bendi bayowelelenga ku maboko wabo naku mawulu,

³² shikati nimwasho oho bengininenga mu ntanda, hinge kuhenyena ku kaala, bayowelelengamo ngonehe Nyambi ya Ngula atongwezele Moshesha.

³³ Pe Moshesha wemikile shipango sha kuzingwilisha ntanda na kaala na kukoleka shibaamba ku menginino a shipango. Nohobene wamanishile mulimo nimwawo.

Likumbi lya hayilu ya Ntanda ya Shikungulukilo

³⁴ Likumbi lyafwikile Ntanda ya Shikungulukilo, pe wuwahe wa Nyambi ya Ngula wenzalishile Ntanda.

³⁵ Moshesha kaliha watweshele kwingina mu ntanda ya shikungulukilo, ndaba ya likumbi lyekalile hayilu ya ntanda na maleema aku meho a Nyambi ya Ngula enzalishile ntanda.

³⁶ Baishalela batuntwilenga munkungwa wabo na kuya kumbalila yamina ndi banamono ngayi likumbi linafumu ha ntanda.

³⁷ Ngoboni ndi likumbi kufumaho lifwako, kaliha batweshele kutuntuka na kuya kumbili, batatililenga hantu likumbi linafumuho.

³⁸ Hakwenda kwa ku yambangila kwabo nimwako, batweshele ku mona likumbi lya Nyambi ya Ngula hayilu ya ntanda kubikati bya mwaana, pe mundilo wabangilenga hayilu yayo kubikati bya wushiku.