Kututika 4 - Libuka Lya Kuyela

Nyambi ukupana Moshesha ngovu za kutenda bikomokesho

¹ Niho Moshesha akumbwile Nyambi ya Ngula ngayi, “Ngoboni hamina Baishalela kukankulupila bafwako, hinge kuyuvwilila kunebye nikambe, ndi bakamba ngayi, ‘Nyambi ya Ngula kuliholola kukwobe wufwako, pe nikenga nahiti?’”

² Niho Nyambi ya Ngula amwipwile ngayi, “Ebye unakwata mu liboko lyobe bishini?” Wakumbwile ngayi, “Muwana.”

³ Nyambi ya Ngula wambile ngayi, “wuyumbile hanci.” Oho Moshesha awuyumbilile hanci, wafutukile liyoka, pe Moshesha watininewo.

⁴ Niho Nyambi ya Ngula ambile kuli Moshesha ngayi, “Nyongama umukwatile ku mushila.” Nohobene Moshesha wanyongamine pe wamukwatilile ku mushila, kami niwo wafutukile hi muwana mu liboko lyendi.

⁵ Nyambi ya Ngula wambile ngayi, “Ukatende eshe mwanga bakakulupile ngayi Nyambi ya Ngula, Nyambi wa Bankakazabo, Nyambi wa Abulahama na Ishaki na Yakobo unalihololo kukwobe.”

⁶ Nyambi ya Ngula wambile kami kuli Moshesha ngayi, “Yaka liboko lyobe mu nkwapa.” Pe Moshesha wombatalile, niho ayakile liboko lyendi mu nkwapa, pe oho alifumishile lyengile too na wulweli wa bimakwa.

⁷ Nyambi ya Ngula wambile ngayi, “Yaka kami liboko lyobe mu nkwapa.” Pe kami niho atendele noho, pe shikati oho alifumishilemo lyengile hi lya shwee ngonehe lutu lwendi nimwalwo.

⁸ Nyambi ya Ngula wambile ngayi, “Ndi kuka kukulupila bafwako hinge ndi kukayuvwishisha bikomokesho bya kutatika bafwako, pe bakakulupila ku bikomokesho bya wubili.

⁹ Ndi kuka kulupila bafwako ku bikomokesho ebye bibili, hinge ndi kukayuvwilila bafwako kunebye ukambe, ukafwanina kutekula mema amu mushinzi wa Nayilo na kuwayitila ha lukandwa ngayi mema akafutuke mukeza.”

¹⁰ Ngoboni Moshesha wambile kuli Nyambi ya Ngula ngayi, “Byo hekulu! Hinga untuma. Hinga natanga kulimuka sha kwamba shiwahe, kami hinge kubalika haya ha shikati shiya watatikile kwamba kukwami. Nenga muntu wakuluba sha kwamba nambanga na kulemanana. Nili wa shihuhu.”

¹¹ Niho Nyambi ya Ngula ambile kukwendi ngayi, “Kati yani wapanika muntu kanwa? Kati yani ou wamutenda shizika matu hinge kumwingisha shimumu? Yani wamupanika ku mona, hinge kumwingisha kashishitwa? Nka ami Nyambi ya Ngula.

¹² Nohobene yanga! Nikakuyavwa kukwamba, kami nikakutongweza bya kwamba.”

¹³ Ngoboni Moshesha wambile ngayi, “Byo! Hekulu tuma tuhu muntu washenge.”

¹⁴ Niho Nyambi ya Ngula apilaminine Moshesha, pe wambile ngayi, “Nahiti yayiyobe Aloni wa Kalevi? Nikulimuka ngayi ukutwesha kwamba shiwahe. Mona! Uli na kwiza kukwobe na ku kushimbawila, ukawahilila shikuma mu mutima wendi ha kuku mona.

¹⁵ Pe obe ukatwesha kwamba kukwendi na kumuyaka mazu mu kanwa kendi. Nikamiyavwa wubili wenu hakwamba na kumitongweza bya kutenda.

¹⁶ Niye ukatwesha kukwambilako ku bantu, ukenga kanwa kobe, kami obe ukenga ngo Nyambi kukwendi, ukamutongweza bya kwamba.

¹⁷ Haya shimba ou muwana mu liboko lyobe, niwo ukatendesha bikomokesho.”

Moshesha ukuboka ku Engepita

¹⁸ Niho Moshesha abokele kuli mukowendi Yetilo, pe wambile kukwendi ngayi, “Haya ndehe niboke ku bawushinda wami bali mu Engepita nikabamone ndi bashili kuyoya.” Niho Yetilo ambile kuli Moshesha ngayi, “Endangaho mu ku mwena.”

¹⁹ Nyambi ya Ngula wambile kuli Moshesha oho ushili mu Mindiyani ngayi, “Haya boka ku Engepita ndaba bantu nimwabo baya bashingilenga kukuziha banafu.”

²⁰ Niho Moshesha ashimbile mukazendi na bana bendi, wabayakile ha mbongolo, pe wabokele ku Engepita. Washimbile muwana uya amutongwezele Nyambi ngayi a ushimbe.

²¹ Nyambi ya Ngula wambile kami kuli Moshesha ngayi, “Obe uli na kuboka ku Engepita, enze ukavulame kutenda ebye bikomokesho nimwabyo nakupaniki ngovu ngayi ukabitende ku meho a Fwalo. Nikakaluhisha mutima wendi ngayi, mwanga akabule kwitabilisha bantu ngayi baye.

²² Pe ukatongweze Fwalo ngayi Eshe nisho anamba Nyambi ya Ngula ngayi, Ishalela unengi mwanami wa mweli.

²³ Nikukutongweza ngayi yitabilisha mwanami wa mweli ngayi mwanga aye akandemeshe. Ngoboni ndi ukakana, haya nikaziha mwanobe wa mweli.”

²⁴ Ha mwanya wa makatalilo aha nzila ya kuya ku Engepita, Nyambi ya Ngula wa hanganine Moshesha, pe washingile kumuziha.

²⁵ Zipola watolele limanya lya litwe na kushenda shikonde sha mwanendi wa mulume sha hambili, pe washikambikile ha mawulu a Moshesha.

²⁶ Niho Nyambi ya Ngula atetelele wumi wa Moshesha. Ha shikati shiya Zipola wambile ngayi, “Uli mukokwami wa mukeza.” Ndaba ya shiheka sha mukanda.

²⁷ Nyambi ya Ngula wambile kuli Aloni ngayi, “Yanga ukashimbawile Moshesha mulibelelengwa.” Niho ayile, pe walihanganine nendi ku lipili lya Nyambi, pe oho amuwanine wamuzupezele.

²⁸ Moshesha watongwezele Aloni nimwabyo ebye, Nyambi ya Ngula ambile oho amutongwezele ngayi aboke ku Engepita. Wamutongwezele kami bya bikomokesho biya amutongwezele Nyambi ya Ngula kubitenda.

²⁹ Niho Moshesha na Aloni bayile ku Engepita pe bakakungwile bakulwane ba bantu ba Ishalela nimwabo hamo.

³⁰ Aloni watongwezele bantu byuma nimwabyo biya ambile Nyambi ya Ngula kuli Moshesha, niho atendele bikomokesho nimwabyo ku meho wabo.

³¹ Pe bantu bakulupilile, oho bayuvwile ngayi Nyambi ya Ngula unamono makando wabo na kubazingula, pe bashinkamine hanci na kulamba.