Kututika 39 - Libuka Lya Kuyela

Kutunga bivwalo bya bakankombela

¹ Niho batungile bivwalo bya manono ebye bavwalilenga bakankombela, ha kutenda mulimo mu mwanya washizila. Batungile ha wutonge wawuhombo na wakufumbuluka nawa kufubila. Batungile bivwalo bya Aloni bya Mukankombela ngonehe Nyambi ya Ngula atongwezele Moshesha.

² Pe kami batungile kakobelo kashizila na likwiza lyaliwahe lya kulelema hamo na wutonge wawuhombo na wakufumbuluka na wakufubila na wutonge wa ngolinde.

³ Niho bafulile mapapi amahehu a ngolinde na shikoma, pe bawatabwezele ngayi enge nyimbwa za kupohela za kutungila hamo na likwiza lyaliwahe lya kulelema na wutonge wa wuhombo na wakufumbuluka na wakufubila.

⁴ Batungile tundombe tubili twaha bifuzi bya kakobelo ka shizila, otwe twanungiwilile kukwata ku zinkumo zato ngayi mwanga tukamangiwileko.

⁵ Pe mukunzi wakupohela shiwahe wengile wakulifweka na kakobelo kashizila, wa kutungila hamo nako kwinga shuma shimo. Ngonehe Nyambi ya Ngula atongwezele Moshesha.

⁶ Balembulwile tumamanya twa Onikishi, pe twayakiwile mu tukunzu twa ngolinde. Tumanya tuya twamanguliwile na manono hamo na mamango a mazina a bana ba Ishalela likumi na babili.

⁷ Niho batutungilile ha tundombe tubili, twaha bifuzi twa kakobelo kashizila kwimanina mishobo likumi na yibili ya Ishalela, ngonehe Nyambi ya Ngula atongwezele Moshesha.

Kutunga kakwiza kaha kapumpo

⁸ Batungile kambandingwa kakutanga shiwahe, ngonehe mulimo wa kakobelo kashizila.

⁹ Bakatungile kakwezekela hamo, pe bakavungile kabili, kengile wunene wa shikanzi sha liboko mu wutali na muwipi.

¹⁰ Niho batungilileho mizila yinaa ya tumanya twatuwahe. Mu muzila wakutatika mwekalile kamanya ka lumbi na naka ka topazi na naka kangineta.

¹¹ Pe mu muzila wawubili mwekalile kamanya ka emelalundi na naka kashafwila na naka kandayimondi,

¹² pe mu muzila wawuhatu mwekalile kamanya ka yashinte na naka ka angate na naka ka amezeshiti,

¹³ kami mu muzila wawunaa mwekalile kamanya ka mbeliyola na naka ka onikishi na naka ka yashipa. Twayakiwile mu tukunzu twa ngolinde,

¹⁴ ha kamanya na kamanya ha tumanya likumi na tubili hamanguliwile mazina kwimanina mishobo likumi na yibili ya Ishalela.

¹⁵ Pe kambandingwa kaha kapumpo bafulilileho zinketwana za ngolinde yayiwahe ya kutwesha kupohela ngonehe nyimbwa.

¹⁶ Niho bafulile tukunzu tubili twa ngolinde na mahuzi abili a ngolinde, pe bakwatishile mahuzi abili kuyilu ya zinkomi zaha kambandingwa ka ha kapumpo.

¹⁷ Niho bakwatishile zinketwana zibili za ngolinde ku mahuzi abili,

¹⁸ kami bakwatishile zinkumo zibili zamina za zinketwana, ku tukunzu tubili kami mu nzila eye bazikwatishile kumbili ya tukobelo tubili twaha bifuzi ka shizila.

¹⁹ Niho bafulile mahuzi abili a ngolinde naku wakwatisha ku zinkomi zibili, ku nceto ya kambandingwa kaha kapumpo kunkumo mukati kakobelo kashizila.

²⁰ Niho bafulile mahuzi abili kami a ngolinde, pe bawakwatishile ku nceto kumbili ya tundombe tubili twaha bifuzi twa kakobelo kashizila, hahepi na mungundo hayilu ya mukunzi wa kupohela shiwahe.

²¹ Pe bakwatishile mahuzi a kambandingwa kaha kapumpo ku mahuzi a kakobelo kashizila na lunyimbwa lwa wuhombo. Nohobene ngayi kambandingwa kaha kapumpo mwanga kekale hayilu ya kapumpo ngayi mwanga kabule kushoboka ngonehe shiya Nyambi ya Ngula atongwezele Moshesha.

Kutunga bivwalo byamina bya bakankombela

²² Lyambangubo liya lya kuvwala ku nceto ya kakobelo kashizila, lyatungiwile nimwalyo na wutonge wawuhombo.

²³ Pe nibyo byekalile na litubwa lya kwingizamo mutwe. Litubwa elye lyekalile na mungundo waku shinta, wakuzingwilisha ku ncingo ngayi mwanga shikobelo shikabule kutabuka.

²⁴ Kami ku nceto ya mufumo ya lyambangubo bayakileko manzenze akutunga na likwiza lyaliwahe lya kulelema na wutonge wawuhombo na wakufumbuluka nawa kufubila.

²⁵ Batendele kami zingenjo ha ngolinde yayiwahe, pe bayakile zingenjo mukati ka manzenze kuzingwilisha mufumo wa lyambangubo.

²⁶ Batowanishile kami zingenjo na manzenze kuzingwilisha ku nceto ya mufumo wa lyambangubo, ngonehe Nyambi ya Ngula atongwezele Moshesha.

²⁷ Batungile kami bikobelo bya Aloni na bana bendi,

²⁸ hamo na kahoshi ka likwiza lyaliwahe lya kulelema lya kuzenga ku mutwe na tuhoshi twa likwiza lyaliwahe lya kulelema na tuputula twa kutungiwa ha likwiza lyaliwahe lya kulelema,

²⁹ hamo na kaponda ka likwiza lyaliwahe lya kulelema lya kupohela na wutonge wa wuhombo na wakufumbuluka na wakufubila na wakutanga mabalamabala ngonehe Nyambi ya Ngula atongwezele Moshesha.

³⁰ Niho bafulile kami kance ka munana wakuzila wa ngolinde yayiwahe shikuma na ku mangulaho ngayi “Kuyeleshiwa kuli Nyambi ya Ngula.”

³¹ Pe bakamangilile kumbili ya kahoshi ka likwiza lya kuzenga ku mutwe na lunyimbwa lwa wuhombo, ngonehe Nyambi ya Ngula atongwezele Moshesha.

Kumaninina kwa mulimo

³² Eshe nisho yamanine milimo nimwayo ya Ntanda ya Shikungulukilo. Baishalela batendele byuma nimwabyo ngonehe eshe Nyambi ya Ngula atongwezele Moshesha.

³³ Niho baletele ntanda kuli Moshesha na byuma byayo nimwabyo na tuhanto twayo na maleenge wayo na mikambo yayo na zimpangwa zayo na tupona twayo.

³⁴ Baletele kami bya kufwikaho bya bitembe bya bikungwe ba bambelele bya kunyuka, bya kulomba kufubila na bitembe bya bitutunga bya kunyuka shiwahe na shibaamba sha kulama Likwati,

³⁵ na Likwati lya Kulimama Likwati lya Kulimama lya wupaki omu mwekalile matapa abili a limanya na mibanda yalyo na muhuko wa nceshe.

³⁶ Baletele kami na tebulu kami na byuma byayo nimwabyo na mankende akutupula kuli Nyambi,

³⁷ na lyeyeko lya mimuni lya ngolinde yayiwahe na mimuni yalyo na byuma byalyo nimwabyo na mazi akumunikisha,

³⁸ na kaala ka ngolinde na mazi akuwaba na incence ya livumba lyaliwahe na mu wumbo waku menginino a ntanda,

³⁹ na kaala ka lubemba na luhalo lwasho lwa lubemba na mibanda yasho na byuma byasho nimwabyo na lizawo na kapona kalyo,

⁴⁰ na miwumbo ya makwiza yaku shipango na zimpangwa na tupona na mu wumbo waku menginino na nyimbwa za kupohela na zimpimpi za ntanda na byuma nimwabyo bya mulimo wa muntanda.

⁴¹ Baletele kami bivwalo bya kutunga na manono byabiwahe bakavwalenga bakankombela oho bakatenda mulimo mu mwanya wa shizila. Ebye binengi bivwalo bya shizila bya mukankombela Aloni na bana bendi.

⁴² Baishalela batendele milimo nimwayo ngonehe eshe Nyambi ya Ngula atongwezele Moshesha.

⁴³ Pe Moshesha wahengwele byuma biya batendele, wamonene ngayi nimwabyo byatendiwile ngonehe eshe amutongwezele Nyambi ya Ngula, pe Moshesha wabafuywele.