Kututika 38 - Libuka Lya Kuyela

Kutenda Kaala ka kuhokeshela Zinkombela

¹ Wabazile kaala kakuhokeshela zinkombela ha mutondo wa mumbambangoma. Niko kengile shakwezekela hamo, mu wutali wako mashentimita 229 na mashentimita 229 muwipi wako na mashentimita 137 mu mwimo.

² Wabazile ncengo zinaa ku zinkomi zinaa ngayi mwanga enge shuma shimo na kaala. Pe wakafwikile nimwako na lubemba.

³ Niho kami afulile byuma nimwabyo bya kaala, binzoyo na mafwosholo na zindonga za kukunama na tuhanto na binzoyo bya kukalila mundilo. Watendele byuma nimwabyo na lubemba.

⁴ Pe niho afulile luhalo lwaha kaala ka lubemba na kukayaka mu nceto ya mubalo ngayi mwanga lukumine hakatikati ka kaala.

⁵ Wafulile mahuzi anaa aku kulikila na kuwayaka ku zinkomi zinaa za kaala.

⁶ Wabazile mibanda ya ku kulikila ya mutondo wa mumbambangoma, pe wayifwikile na lubemba,

⁷ niho ayingizile mu mahuzi aku mbalila na mbalila ya kaala. Kaala kabaziwile ha maleenge, kami kengile ka mpako.

Kutenda Lizawo lya Lulonga lwa Lubemba

⁸ Watendele lizawo lya lubemba na kapona kalyo ka lubemba ha bimoneno bya bambuyama aba bekalile ha milimo ku shipana sha Ntanda ya Shikungulukilo.

Kutenda Shipango sha Ntanda ya Shikungulukilo

⁹ Watendele shipango sha miwumbo ya makwiza amawahe a kulelema ku Ntanda ya shikungulukilo. Kumbalila yaku mabukubuku engile mamita 46 mu wutali.

¹⁰ Shemanine ha zimpangwa makumi abili, za lubemba na tupona makumi abili twa lubemba, hamo na tuhanto na mbangilo byafuliwile ha shiliva.

¹¹ Pe kami kumbalila yaku ncelele shengile mamita makumi anaa na anaa, shemanine ha zimpangwa makumi abili za lubemba na tupona makumi abili twa lubemba, hamo na tuhanto na mbangilo byafuliwile ha shiliva.

¹² Pe kumbalila yaku mponci kwekalile makwiza a miwumbo engile mamita 23 mu wutali hamo na zimpangwa likumi na tupona likumi, hamo na tuhanto na mbangilo byafuliwile ha shiliva.

¹³ Pe kumbalila yaku mushamuko oku kwekalile menginino, shipango shengile kami mamita 23.

¹⁴ Pe ku mbalila yimo yaku menginino kwekalile mu wumbo wa mamita mutanu na yimo na zimpangwa zihatu na tupona tuhatu.

¹⁵ Pe ku mbalila yamina kami kwekalile mu wumbo wa mamita mutanu na mita imo na shitika na zimpangwa zihatu na tupona tuhatu.

¹⁶ Makwiza a miwumbo nimwawo akuzingwilisha shipango atungiwile ha makwiza amawahe a kulelema.

¹⁷ Tupona twa zimpangwa twafuliwile ha lubemba na tuhanto na mbangilo na bya kufwika hayilu ya zimpangwa byafuliwile ha shiliva. Zimpangwa nimwazo za ku shipango zangungikiwile na mbangilo za shiliva.

¹⁸ Mu wumbo waku menginino a shipango watungiwile ha makwiza a kulelema akutungila hamo na wutonge wa wuhombo na wakufumbuluka na wakufubila, atowanishiwile mabalamabala. Wengile mashentimita 229 muwipi, wengile ngonehe miwumbo nimwayo yaku shipango.

¹⁹ Pe wemaninine ku zimpangwa zinaa na tupona tunaa twa lubemba. Tuhanto twazo na bya kufwika hayilu yazo na mbangilo zazo byafuliwile ha shiliva.

²⁰ Pe zimpimpi nimwazo za ntanda na shipango zafuliwile ha lubemba.

Byondo batendeshele ku Ntanda ya shikungulukilo

²¹ Ou niwo wingi wa byondo batendeshele ku ntanda ya wupaki. Moshesha niye wabatongwezele kubilaba, pe Balevi babilabile na kufundiziziwa kwa Itama mwana mukankombela Aloni.

²² Mbezalela mwana Uli, muzukulya Hula waku mushobo wa Yunda, watendele byuma nimwabyo biya atoyele Nyambi ya Ngula kuli Moshesha.

²³ Pe mukakumuyavwa wengile Oholiyaba mwana Ahishamaki waku mushobo wa Ndani, wengile wamanono mu kumangula na mu ku fundika na mu kushinta makwiza amawahe a kulelema hamo na wutonge wawuhombo na wa kufumbuluka na wakufubila.

²⁴ Ngolinde nimwayo eye bafungwilile kuli Nyambi yaku Ntanda ya Shizila yengile makilo 1,000 kufwanikiza na wulemu watoyiwanga waku Ntanda ya Shizila.

²⁵ Shiliva yafumine kubaya balabiwile ku shikungulukilo yengile makilo 3,430 kufwanikiza na wulemu watoyiwanga yaku Ntanda ya Shizila,

²⁶ pe wingi owe wakumine ha wingi wa balume nimwabo behaniwile mu kulabiwa, muntu na muntu wapanine ebye byashingiwilenga. Byafwanikiziwile ku wulemu watoyiwanga ku Ntanda ya Shizila. Bekalile kukulabiwa obo ba myaka yabo yabalikilile ha makumi abili na kupitakana bengile balume 603,550.

²⁷ Shiliva ya makilo 3,400 niyo batendeshele tupona twa mwanda twa ku Ntanda ya Shikungulukilo na shibaamba, pe wulemu wakukuma ku makilo 34 kapona na kapona.

²⁸ Shiliva washalileko wawulemu wa makilo 30, Mbezalela wafulileho mbangilo na tuhanto twa ku zimpangwa na bya kufwika hayilu yazo.

²⁹ Lubemba olu bafungwilile kuli Nyambi ya Ngula, lwa kumine ku makilo 2,425.

³⁰ Pe watendeshele tupona twa ku menginino a ntanda ya shikungulukilo na nolu lubemba na kaala ka lubemba na luhalo lwako lwa lubemba na byuma nimwabyo bya ku kaala,

³¹ na tupona twa shipango na twa ku menginino a shipango na zimpimpi nimwazo, za ntanda na za shipango za kuzingwilishako.