Kututika 37 - Libuka Lya Kuyela

Kutenda Likwati lya Kulimama

¹ Mbezalela wabazile Likwati lya Kulimama ha mutondo wa mumbambangoma, mu wutali walyo lyengile mashentimita 114, muwipi walyo lyengile mashentimita 69, kami mumwimo walyo lyengile mashentimita 69.

² Pe walifwikile na ngolinde yayiwahe mukati na ha munkanda, pe walizingwilishile mufumo wa ngolinde kunkumo yalyo nimwako,

³ niho afulilileko mahuzi akulikulikila anaa a ngolinde yayiwahe na kuwayaka ku mawulu walyo anaa, mahuzi abili ku mbalila na mbalila.

⁴ Wabazile mibanda ya ku kulikila ya mutondo wa mumbambangoma, wayifwikile na ngolinde.

⁵ Pe kami wayingizile mu mahuzi a Likwati.

⁶ Niho kami afulile muhuko wa nceshe wa ngolinde yayiwahe, wa mashentimita 114 mu wutali na muwipi wawo kupitakana mashentimita 69.

⁷ Wafulile makelumbi abili a ngolinde,

⁸ likelumbi limo kunkumo na kunkumo ya muhuko. Pe wa wafulile ngayi akenge shuma shimo na muhuko.

⁹ Makelumbi alipenzele limo na lyamina hayilu ya muhuko na mbando zawo za kutandubuka zafwikile muhuko.

Kutenda Tebulu ya Mankende akutupula kuli Nyambi

¹⁰ Mbezalela wabazile tebulu ha mutondo wa mumbambangoma ya mashentimita 91 na mashentimita 46 muwipi namu mwimo washo mashentimita 69.

¹¹ Niho ayifwikile na ngolinde yayiwahe pe wafulilileko mufumo wa ngolinde wakuyizingwilisha.

¹² Wayifulilile mubalo, wunene wawo ngonehe shikandi sha liboko lya muntu, pe wazingwilishileko mufumo wa ngolinde.

¹³ Wafulile mahuzi anaa a ngolinde pe wayakile ku zinkomi za tebulu zinaa ku mawulu.

¹⁴ Mahuzi akukwata mibanda ya ku shimbila tebulu ayakiwile hahepi na mubalo.

¹⁵ Wabazile mibanda ya mutondo wa mumbambangoma, pe wayifwikile na ngolinde.

¹⁶ Watendele bikwatilo bya ngolinde yayiwahe byaha tebulu na zindonga za kuhelukila na zindonga za kukunama na zinkomoki na zintesho za kutendesha nkombela ya waine.

Kutenda lyeyeko lya Mimuni

¹⁷ Mbezalela wafulile kami lyeyeko lya mimuni lya ngolinde yayiwahe. Wafulile kapona kalyo na mukoto walyo ha ngolinde yakufula na shikoma na zintemo za kuyengiwa za makolwa na zintemo, nimwabyo byengile shuma shimo.

¹⁸ Pe myahi mutanu na umo yashonkomanine ha zimbalila zalyo, yihatu mbalila yimo na yimo.

¹⁹ Ku mwahi na mwahi waku myahi mutanu na umo kwekalile zintemo za kuyengiwa za makolwa na zintemo.

²⁰ Pe lyeyeko lya mimuni yinaa lyekalile na zintemo za kuyengiwa za kufweka ngonehe zintemo za alimonde za ku shamuna na makolwa na zintemo.

²¹ Pe ku myahi mutanu na umo kwekalile likolwa limo na limo ku nceto ya mwahi na mwahi.

²² Makolwa na myahi na lyeyeko lya mimuni byafuliwile hamo kwinga shuma shimo, ha ngolinde yayiwahe.

²³ Pe kami watendele mimuni mutanu na yibili yaha lyeyeko lya mimuni, kami wafulile zimanya na meyeko walyo a ngolinde yayiwahe.

²⁴ Niye walitendeshele wulemu wa ngolinde yayiwahe ya kukuma ku makilongilamu 34 ha kufula lyeyeko lya mimuni na bingwalingwali byalyo nimwabyo.

Kutenda Kaala kakuhokeshela incence

²⁵ Wabazile kaala ka mutondo wa mumbambangoma ka kuhokeshela incence. Kengile ka kufwanikizila hamo, mu wutali wako kengile mashentimita 46 na mashentimita 46 muwipi, kami mwimo wako kengile mashentimita 91. Ncengo zako za ku zinkomi zinaa zengile shuma shimo na kaala.

²⁶ Wakafwikile hayilu yako na kuzimbalila zako nimwazo zinaa na ku ncengo zako na ngolinde yayiwahe, kami washizingwilishile na mufumo wa ngolinde.

²⁷ Niho afulilile mahuzi abili aku kulikila a ngolinde na kuwayakila ku nceto ya mufumo ha zimbalila zibili, mwakukwatila mibanda ya kukakulikila.

²⁸ Pe wabazile mibanda ya mutondo wa mumbambangoma, niho ayifwikile na ngolinde.

Kuyengula mazi akuwaba na incence

²⁹ Wayengwile kami mazi ashizila akuwaba na incence ya livumba lyaliwahe ngonehe mulimo wa muka ku vwela shiwahe lukumba.