Kututika 36 - Libuka Lya Kuyela

¹ “Nyambi ya Ngula unapana Mbezalela na Oholiyaba na bantu bamina bamanono, bawutungu na kanangatima, aba balimuka kutenda byuma nimwabyo bikushingiwa kutendesha ku Ntanda ya Shizila. Bakatenda byuma nimwabyo ngonehe Nyambi ya Ngula abatongwezele.”

Bantu ba kuleta zintupu zazingi

² Moshesha wehanine Mbezalela na Oholiyaba na bantu nimwabo bawutungu aba apanine Nyambi ya Ngula ngana na naba balukukile mitima mu kuyavwa. Moshesha wabatongwezele kubalika kutenda milimo.

³ Niho batambwile kukwendi ntupu nimwayo eye baletele Baishalela mu kutendesha ku Ntanda ya Shizila. Ngoboni Baishalela bazaminine kuletela Moshesha zintupu zabo lumenemene na lumenemene.

⁴ Niho bantu bawutungu, aba batendelenga mulimo, bayile

⁵ na kutongweza Moshesha ngayi, “Bantu bali na kuleta byabingibingi na kupitakana bya ku fwanina ku milimo eye Nyambi ya Ngula atutongwezele.”

⁶ Nohobene Moshesha watumine lizu mu munkungwa nimwamo ngayi, “Hinga mwitabilisha mulume hinge mbuyama kuleta kami mukungwila waku Ntanda ya Shizila.” Nohobene bantu bemikiwile kuleta zintupu zamina,

⁷ ndaba ebye baletele byengile byabingi mu kumanisha milimo nimwayo na ku shalaho.

Ntanda ya Shikungulukilo

⁸ Pe hakati ka nobo bantu batendelenga oyo milimo, hekalile bantu bamanono shikuma batendelenga ntanda ya shikungulukilo. Yatendiwile ha makwiza likumi amawahe, a kulelema akupohela hamo na wutonge wawuhombo na wakufumbuluka na wakufubila, akutangiwa na bifwekesha bya makelumbi.

⁹ Likwiza na likwiza lyengile lya mamita 13 mu wutali na mashentimita muwipi 183. Nimwalyo lyengile lya kwezekela hamo.

¹⁰ Niho batungile hamo makwiza mutanu kwinga mu wumbo umo, pe batendele kami shuma shimo na makwiza amina mutanu.

¹¹ Batendele kami zinkobo za wuhombo kunkumo ya mu wumbo na mu wumbo.

¹² Bayakile zinkobo makumi mutanu ha mu wumbo wakutatika na zinkobo makumi mutanu ha mu wumbo wawubili ngayi ziliyahikize.

¹³ Niho bafulile kami tuhanto makumi mutanu twa ngolinde, pe banungile miwumbo yibili na tuhanto pe wengile mu wumbo umo.

¹⁴ Niho batendele makwiza likumi na limo a wushako wa bampongo kwinga mu wumbo wa kufwika ntanda.

¹⁵ Likwiza na likwiza lyengile lya mamita 14 mu wutali na mashentimita 183 muwipi, nimwawo engile akwezekela hamo.

¹⁶ Niho batungilile makwiza mutanu kwinga shibaamba shimo na makwiza amina mutanu na limo kwinga shibaamba shamina.

¹⁷ Pe bayakile zinkobo makumi mutanu ha nkumo ya mu wumbo wakutatika na zinkobo makumi mutanu ha nkumo ya mu wumbo wamina.

¹⁸ Pe bafulile tuhanto makumi mutanu twa lubemba twa kumangisha ha kununga miwumbo yibili, nohobene ngayi mwanga winge mu wumbo wumo.

¹⁹ Niho banyukilileko kami bitembe byamina bibili bya kufwika ha ntanda, shimo sha bitembe bya bikungwe bya bambelele bya kulomba kufubila na shamina sha bitembe bya bitutunga bya kunyuka shiwahe sha kufwika ha munkanda wayo.

²⁰ Niho abazile kami maleenge akwimika a mutondo wa mumbambangoma aku ntanda.

²¹ Lileenge na lileenge lyengile mamita anaa mu wutali na mashentimita 69 muwipi,

²² hamo na tupilikisho tubili ngayi maleenge mwanga aliwanike hamo. Maleenge nimwawo ekalile na tupilikisho.

²³ Wabazile maleenge makumi abili aku mbalila ya mabukubuku,

²⁴ pe batendele kami tupona makumi anaa twa shiliva twa kuya ku nceto ya maleenge, tupona tubili twa ku nceto ya lileenge na lileenge twa ku kwatisha tupilikisho twalyo tubili.

²⁵ Pe kami babazile maleenge makumi abili aku mbalila yaku ncelele ya ntanda,

²⁶ na tupona makumi anaa twa shiliva, tupona tubili ku nceto ya lileenge na lileenge.

²⁷ Pe kunyima ya ntanda, ku mbalila yaku mponci, babazile maleenge mutanu na limo.

²⁸ Babazile kami maleenge abili amu zinkomi kunyima ya ntanda.

²⁹ Awa maleenge amu zinkomi awanikiwile ku nceto na kuyilu. Pe awa maleenge abili amu zinkomi zibili nisho atendiwile munzila eye.

³⁰ Nohobene kwekalile maleenge mutanu na ahatu hamo na tupona twawo likumi na mutanu na kamo twa shiliva, tubili ku nceto ya lileenge na lileenge.

³¹ Pe babazile kami mbangilo za mutondo wa mumbambangoma likumi na mutanu, mikambo mutanu za ku maleenge ku mbalila yimo ya ntanda,

³² pe kami mutanu za ku maleenge aku mbalila yamina na mikambo mutanu za ku maleenge aku mponci kunyima ya ntanda.

³³ Mukambo wa hakati wakumine kunkumo na kunkumo ya ntanda hakati ka maleenge.

³⁴ Pe bafwikile maleenge na ngolinde na kufulilako mahuzi a ngolinde akukwata mbangilo. Eze mbangilo kami zafwikiwile na ngolinde.

³⁵ Utungile shibaamba sha makwiza amawahe a kulelema, akupohela hamo na wutonge wawuhombo, wakufumbuluka na wakufubila. Niho bashitangile shiwahe na bifwekesha bya makelumbi.

³⁶ Pe babazile zimpangwa za mutondo wa mumbambangoma zinaa za ku kwatisha shibaamba na kuzifwika na ngolinde na kuyakako tuhanto twa ngolinde. Niho bafulile tupona twa shiliva tunaa twa ku kwatisha zimpangwa.

³⁷ Ku menginino aku ntanda batungilileko kami shibaamba sha makwiza amawahe a kulelema, akupohela na wutonge wawuhombo na akufumbuluka na a kufubila, akutanga mabalamabala.

³⁸ Babazilileko kami zimpangwa mutanu, pe bayakileko tuhanto. Bazifwikile hayilu yazo hamo na mbangilo zazo na ngolinde, niho batendele tupona twa lubemba mutanu twaku zimpangwa.