Kututika 35 - Libuka Lya Kuyela

Ndayano za Mutena wa Kukatala

¹ Moshesha wehanine likunge nimwalyo lya bantu ba Ishalela, pe wambile kukwabo ngayi, “Eshe nisho amitongwezele Nyambi ya Ngula ngayi mushitende.

² Mwekala na Matena mutanu na umo akutenda milimo yenu, ngoboni ha mutena wa mutanu na abili ukenga mutena wa kuyela, mutena wakukatala wa kuyela kuli Nyambi ya Ngula. Muntu nimwendi wakutenda mulimo wumo ha mutena uyo mwa shikuma ukazihiwa.

³ Hinga mukayibika mundilo ha minkanda yenu ha mutena wakukatala.”

Zintupu za ku Ntanda ya Shikungulukilo

⁴ Moshesha wambile ku likunge nimwalyo lya bantu ba Ishalela ngayi, “Eshe nisho amitongwezele Nyambi ya Ngula,

⁵ ngayi mutupule ntupu kukwendi. Muntu nimwendi uli na mutima wakupana alete ntupu ya ngolinde naya shiliva naya lubemba,

⁶ na likwiza lyaliwahe lya kulelema na wutonge wawuhombo na wakufumbuluka na wakufubila na likwiza lya kutenda ha wushako wa bampongo,

⁷ na bitembe bya bikungwe bya bambelele bya kulomba kufubila na bitembe bya bitutunga bya kunyuka shiwahe na bitondo bya mumbambangoma,

⁸ na mazi a mimuni na lukumba lwa kuyaka mu mazi akuwaba na incence ya livumba lyaliwahe,

⁹ na tumanya twa onikishi na tumanya twamina twa kulelema twa kuyaka mu kakobelo ka shizila namu kambandingwa kaha kapumpo ka mukankombela wa mukulwane.

Byuma bya mu Ntanda ya Nyambi ya Ngula

¹⁰ “Balume nimwabo bawutungu hakati kenu beze na kutenda byuma nimwabyo biya amitongwezele Nyambi ya Ngula.

¹¹ Batende ntanda na bya kufwika mukati kayo na bya kufwika ha munkanda na tuhanto twayo na maleenge wayo na mikambo yayo na zimpangwa zayo na tupona twayo.

¹² Batende na Likwati lya Kulimama na mibanda yalyo na muhuko walyo wa nceshe na shibaamba sha kulama Likwati lya Kulimama,

¹³ na tebulu na mibanda yayo na byuma byayo nimwabyo na mankende akutupula kuli Nyambi,

¹⁴ na lyeyeko lya mimuni ya kumunikisha na byuma byalyo na mimuni na mazi ayo akumunikisha,

¹⁵ na kaala kakuhokeshelanga incence na mibanda yasho na mazi akuwaba na incence ya livumba lyaliwahe na mu wumbo waku menginino a ntanda.

¹⁶ Batende na kaala kakuhokeshela zinkombela na luhalo lwasho lwa lubemba na mibanda yasho na byuma byasho nimwabyo na lizawo na kapona kalyo.

¹⁷ Batende na miwumbo ya makwiza aku shipango na zimpangwa zasho na tupona na mu wumbo waku menginino a shipango,

¹⁸ na zimpimpi na nyimbwa za kupohela za ku ntanda naku shipango,

¹⁹ na bivwalo bya kutunga na manono byabiwahe bya shizila, biya bakavwalenga bakankombela oho bakatenda mulimo mu mwanya wa shizila, ebye binengi bivwalo bya shizila bya mukankombela Aloni na bana bendi.”

Bantu ba kuleta zintupu zabo

²⁰ Niho Baishalela nimwabo bakatukile na ku shiya Moshesha,

²¹ pe nimwabo baya balukukile mitima na baya bekalile na mitima ya kupana baletele zintupu kuli Nyambi ya Ngula za kutendesha Ntanda ya Shikungulukilo. Baletele byuma nimwabyo biya byashingiwilenga ha kulemesha na bya kutendesha bivwalo bya mukankombela.

²² Niho bantu nimwabo ku balume naku bambuyama aba bashingile, baletele bya kuliyenga bya mishobo nimwayo na tupatamatu na tumbalaminwe na mikali ya mu zincingo na mishobo nimwayo ya wuheti wa ngolinde. Nimwabyo ebye babiletele kuli Nyambi ya Ngula.

²³ Pe muntu na muntu ou wekalile na likwiza lyaliwahe lya kulelema na wutonge wawuhombo na wakufumbuluka, hinge wakufubila na likwiza lya wushako wa bampongo na bitembe bya bikungwe bya bambelele bya kulomba kufubila, hinge bitembe bya bitutunga bya kunyuka shiwahe, babiletele.

²⁴ Aba nimwabo batweshele kupana shiliva hinge lubemba, baletele ntupu yabo kuli Nyambi ya Ngula, kami aba nimwabo bekalile na bitondo bya mumbambangoma, ebye batweshele kutendesha ku mulimo babiletele.

²⁵ Bambuyama nimwabo bamanono baletele wutonge wawuwahe wakulelema na wutonge wawuhombo na wakufumbuluka na wakufubila ou bapohelelenga.

²⁶ Niho bapohelelenga kami na wutonge wa wushako wa bampongo.

²⁷ Bakakutwaminina kami baletele tumanya twa onikishi na tumanya twamina twa kulelema twa kuyaka mu kakobelo ka shizila namu kambandingwa kaha kapumpo,

²⁸ na lukumba na mazi aku mimuni na lukumba na mazi akuvwelesha mazi akuwaba na kutendesha incence ya livumba lyaliwahe.

²⁹ Nohobene Baishalela nimwabo, aba balukukile mitima, baletele zintupu zabo kuli Nyambi ya Ngula, za kutendesha milimo yiya abatongwezele Moshesha kuyitenda.

Bamanono ba ku Ntanda ya Shikungulukilo

³⁰ Moshesha wambile ku Baishalela ngayi, “Monenu Nyambi ya Ngula unahata Mbezalela mwana Uli, muzukulya Hula waku mushobo wa Yunda.

³¹ Nyambi unamwinzalishi na ngovu za moyo wendi na kumupana manono na ngana na kanangatima ku mishobo nimwayo ya mulimo wamanono,

³² kami namupana ngana za ku fundika milimo ya wutungu na kuyitenda na ngolinde na shiliva na lubemba,

³³ na ku mangula tumanya twatuwahe twa kulelema twa kuyaka mu tukunzu na kubaza bitondo na mishobo nimwayo ya milimo ya manono.

³⁴ Niho Nyambi ya Ngula unapana kukwendi na kuli Oholiyaba mwana Ahishamaki waku mushobo wa Ndani, ngana za wutungu za ku longesha bamina.

³⁵ Niye unabapaniki manono akutenda mishobo nimwayo ya milimo ya bakakumangula na bakakufundika na bakakushinta makwiza amawahe a kulelema na wutonge wa wuhombo na wakufumbuluka na wakufubila. Bakutwesha kutenda mishobo nimwayo ya milimo pe banengi bakakufundika bamanono.