Kututika 34 - Libuka Lya Kuyela

Matapa amina a wubili a mamanya

¹ Nyambi ya Ngula wambile kuli Moshesha ngayi, “Baza matapa abili a limanya akufweka ngo aya a kutatika, pe nikatikitaho mazu awa ekalile ha matapa a kutatika, awa wapabwile.

² Kaliwahishe nzona lumenemene, ukakandame hayilu ya mutwe wa lipili lya Shinayi, ukangwaneko.

³ Hinga ukandama na muntu, hinga uketabila muntu kwikala hambalila nimwayo ya lipili, hinga uketabilisha mbelele hinga ngombe kubuyila ku nceto ya lipili.”

⁴ Nohobene Moshesha wamangwile matapa abili ha limanya akulifweka ngonehe aya a kutatika, pe oho kwashile lumenemene wakandamine nawo ku lipili lya shinayi, ngonehe amutongwezele Nyambi ya Ngula.

⁵ Nyambi ya Ngula washulukile mu likumbi, wemanine nendi kuyo, pe watangashanine lizina lyendi lya Nyambi ya Ngula.

⁶ Niho Nyambi ya Ngula apitile kumbili yendi, pe wabilikile ngayi, “Ami Nyambi ya Ngula, Nyambi ya Ngula nenga Nyambi ou wenzala na nceshe na shikeketima, ou wabulanga kupilama shawangu, ou wamoneshanga shishemo shashinene na kwoloka.

⁷ Nalamanga kulimama kwami ku makulukazi a bantu na kubayatila ku milandu yabo na kuluwa kwabo na wubi wabo, ngoboni kukakwanga nifwako kushushula bana na bazukulu kutwala ku shihemunwino sha wuhatu na sha wunaa ha wubi wa bahemi babo.”

⁸ Moshesha wanyankupile na ku shintama hanci na kulamba na kulemesha.

⁹ Wambile ngayi, “Obe hekulu mwa shikuma wahaka, nikukunyepa ngayi uye hamo nanetu, hinge ndi ngayi bantu aba babakalu mitima. Pe wutuyatile ku kuluwa kwetu naku Kubipisha kwetu na kututambula twinge bantu bobe.”

Kulimama kukuhangululiwa

¹⁰ Niho Nyambi ya Ngula ambile ngayi, “Haya nili na kulimama na bantu ba Ishalela. Nikatenda byuma bya kukomokesha bya kwinga hinga byatanga kutendiwa hano hanci nimwaho, ha mikoka nimwayo ku meho wabo. Bantu nimwabo bakamona byuma byabinene.

¹¹ Ombatala ndayano eze nikupanika lelo. Nikatanda Baamoli na Bakenaani na Bahita na Bapelizi na Bahivi na Bayembushi wakayanga mu litunga na kulikaka.

¹² Kakeye kutina ukatenda binzililo na bantu ba litunga omu uli na kuya, ndaba eshe shikenga lunyimbwa lwa kufwana kukwobe.

¹³ Ngoboni haya, ukafwanina ku wishila hanci tuula twabo na ku tunguzula mpangwa yobe ya mamanya ya kuzilikiwa na kunyemwina hanci bilimukisho bya nyambi yabo wa mbuyama Ashela.

¹⁴ “Hinga ukalemesha nyambi wamina, ndaba Ami Nyambi ya Ngula, nenga Nyambi walihungu.

¹⁵ Hinga ukenga shikonzi na bantu ba muya mu litunga, ndaba oho bakalemesha banyambi babo ba litunga na kukombelela kwabo, bakakwihananga ngayi mwanga ulifungile nabo, pe ukezekiwa ngayi mulye ku zinkombela zabo za byakulya.

¹⁶ Hamina bana bobe babalume bakayeka bambuyama ba mapukwenda, pe bakabashanwisha na kwinga bakubula kwoloka kukwami na kulemesha banyambi babo ba litunga.

¹⁷ “Hinga ukalibumbila banyambi ba kuyungulula ha wutale na kubalemesha.

¹⁸ “Ukapinge shimbo sha mankende a kubula mumena ngonehe namitongwezele. Ukalye mankende a kubula mumena ku matena mutanu na abili mu ngonda wa Ambimbi, ndaba mu ngonda iyo niyo wafumine nayo mu Engepita.

¹⁹ “Mweli na mweli wa nkunzi ku livumo lya muntu hinge mwana shimuna wakutatika kuhemuwa wa mulume ukenga wami.

²⁰ Ngoboni ukakuliza mwana mbongolo wakutatika kuhemuwa ha kukombelela mwana mbelele wakuhingishamo. Ngoboni ndi kumukuliza ufwako, ukamupokola mukoshi wendi. Ukakuliza mweli na mweli wa mwana wa mulume ku banabobe. “Kowa muntu ukamoneka ku meho wami wakubula ntupu.

²¹ “Wekala na matena mutanu na umo akutenda milimo yobe, ngoboni hinga ukatenda milimo ha mutena wa mutanu na abili, hinge ndi shikati sha kulima hinge ndi sha kuteza.

²² “Ukapinge shimbo sha kuhoma, ukatatika kuteza mbuto yobe ya kutatika ya mpeka, pe ukalame shimbo sha minkungwa oho ukateza mbuto ya mamaninino mu mwaka.

²³ “Bikati bihatu ha mwaka, balume nimwabo ba ku fwanina kwiza mu kundemesha Ami Nyambi ya Ngula, Nyambi wa Ishalela.

²⁴ Oho natandakale mikoka kumbili yenu na kuhenyesha ku zinginza za litunga lyenu, kowa kami muntu ukezeka kukona litunga lyenu oho mushili kupinga bimbo ebye bihatu.

²⁵ “Hinga ukatupula mankende akuvuba na mumena oho mu kukombelela shimuna kukwami. Hinga ukatenteka shimamo sha shimuna nimwendi unazihiwili ku Shimbo sha Kupitilila kutwala ku lumenemene.

²⁶ “Ukalete ku Litala lya Nyambi ya Ngula, Nyambi yenu mbuto ya kutatika kuteza yamu mafuba yobe ha mwaka ha mwaka. Hinga ukateleka mwana mpongo na mahwe a mandiyendi.”

²⁷ Nyambi ya Ngula wambile kuli Moshesha ngayi, “Utikite mazu awa ndaba ha mazu awa nilina kulimama hamo na nobe na Baishalela.”

²⁸ Moshesha wekalile kuyo na Nyambi ya Ngula matena makumi anaa na zinciku na kubula kulya hinge kunwa mema. Watikitile mazu a kulimama ha matapa, aya mazu likumi.

Moshesha ukukunkuluka ku nceto ya Lipili lya Shinayi

²⁹ Oho Moshesha akunkulukile ku nceto ya Lipili lya Shinayi hinga ashimba matapa abili a wupaki, lupala lwendi lwabyazimine ndaba wambilenga na Nyambi ya Ngula, ngoboni kaliha walimukile.

³⁰ Aloni na bantu nimwabo batilaminine kuli Moshesha, pe bamonene ngayi lupala lwendi lwabyaziminenga, kami batinine kuhenyena kukwendi.

³¹ Ngoboni Moshesha wabehanine, pe Aloni na babilolo nimwabo ba shikungulukilo bahenyenene kukwendi, Moshesha wambile nabo,

³² bantu ba Ishalela bahenyenene kwakwipi, pe Moshesha wabapanikile nimwabyo biya amutongwezele Nyambi ya Ngula ha lipili lya Shinayi.

³³ Oho Moshesha amanishile kwamba nabo, wafwikile shitambala ku lupala lwendi.

³⁴ Ngoboni shikati nimwasho, oho Moshesha engininenga mukati ka ntanda mukwamba na Nyambi ya Ngula, walifukulwilenga shitambala. Oho atutikilenga, watongwezelenga bantu ba Ishalela nimwabo biya amutongwezelenga Nyambi ya Ngula,

³⁵ pe bantu ba Ishalela bamonenenga ngayi lupala lwa Moshesha lwa byaziminenga. Niho afwikilenga shitambala ku lupala lwendi hantu noho ku matena ayilenga na kwamba na Nyambi ya Ngula.