Kututika 33 - Libuka Lya Kuyela

Nyambi ya Ngula ukutongweza Baishalela kufuma ku Lipili lya Shinayi

¹ Nyambi ya Ngula wambile kuli Moshesha ngayi, “Katuka na bantu aba wafumishile ku Engepita. Shiya mwanya uno, pe yanga ku litunga elye na kulupishile kupana Abulahama na Ishaki na Yakobo naku bazukulyabo.

² Nikatuma lingeloyi kutwaminina kumbili yenu, pe nikatanda Bakenaani na Baamoli na Bahita na Bapelizi na Bahivi na Bayembushi.

³ Muli na kuya ku litunga likukunkula mahwe na wushi. Ngoboni kukaya hamo nenu nifwako, ndaba munengi bantu ba mitima yayikalu, wuluno tuhu nikamilobeshele ha nzila.”

⁴ Oho bantu bayuvwile noho batatikile kulila, kami kowa wavwalile bya kuliyenga,

⁵ ndaba Nyambi ya Ngula wambile kuli Moshesha ku tongweza Baishalela ngayi, “Munengi bantu ba mitima yayikalu. Ndi nikaya hamo nanenu hinge tuhu kashikati kakashe, pe nikamilobesha nimwenu. Haya vulenu bya kuliyenga byenu, niho nikahanganike mwa kumitendela.”

⁶ Nohobene bantu ba Ishalela kaliha bavwalile bya kuliyenga kubalika ku shikati shiya bafumine ku lipili lya Shinayi.

Ntanda ya Kuliwanina

⁷ Shikati nimwasho oho Baishalela batuntukililenga ku munkungwa wawupya, Moshesha kami washimbilenga ntanda na kuyizika ha munkanda wa munkungwa kwakutali shashishe. Pe wayitumbile ngayi, Ntanda ya Kuliwanina. Pe bantu nimwabo obo bashingilenga ku shingishisha kuli Nyambi ya Ngula, bayilenga ku ntanda ya kuliwanina ha munkanda wa munkungwa.

⁸ Shikati nimwasho oho Moshesha ayilenga kuyiya ntanda, bantu nimwabo bakatukilenga, bemaninenga kubipana bya zintanda zabo nakutilamina kuli Moshesha hantu nengini mu ntanda.

⁹ Oho Moshesha wenginakale, likumbi lya kwimana nkonka lyashulumukile na kwimana ku shipana sha ntanda, pe Nyambi ya Ngula wambilenga na Moshesha mu likumbi.

¹⁰ Pe bantu nimwabo oho bamonene likumbi lya kwimana nkonka ku shipana sha ntanda, bafunkamine na kulamba.

¹¹ Nyambi ya Ngula wambile na Moshesha meho na meho, ngonehe muntu ambanga na muhoni wendi, niho Moshesha abokelenga kami ku munkungwa, ngoboni Yoshuwa mwana Nune, ndumbana ou wengile mukamulimo wa Moshesha, wekalilenga mu ntanda.

Nyambi ya Ngula ukukulupisha kwikala hamo na bantu bendi

¹² Moshesha wambile kuli Nyambi ya Ngula ngayi, “Nka mona, shinengi sha kupwisha ngayi unantongweze kutwala aba bantu ku litunga liyo, ngoboni obe kuntongweza ufwako ou nikaya nendi. Ngoboni unamba ngayi, ‘Nikukulimuka na lizina lyobe, kami wunawahilili na nami.’

¹³ Haya ndi wunawahilili na nami, ntongweze bihanganiko byobe ngayi mwanga nikulimukishe na kuzamina kukuwahilisha. Anuka kami ngayi unahata lino litunga kwinga bantu bobe.”

¹⁴ Nyambi ya Ngula wambile ngayi, “Nikaya hamo na nobe, pe nika kukatalisha.”

¹⁵ Niho Moshesha akumbwile kukwendi ngayi, “Ndi kukaya hamo nanetu ufwako, pe hinga ututuntula ku mwanya uno.

¹⁶ Haya bantu bamina bakalimuka nahiti ngayi wa wahilili bantu bobe hamo na nami, ndi kuya na netu wufwako? Kwikala kwobe na netu kukatutapulula mukatiketu na bantu bamina hano hanci.”

¹⁷ Nyambi ya Ngula wambile kuli Moshesha ngayi, “Nikatenda bene ngonehe unamba, ndaba na kulimuka na lizina lyobe, kami nawahilili shikuma.”

¹⁸ Niho Moshesha anyepele ngayi, “Hekulu, moneshe wulemu wakubyazima kwa wuwahe wobe.”

¹⁹ Nyambi ya Ngula wakumbwile ngayi, “Nikamonesha wuwahe wami nimwawo kumbili yobe na kutangashana lizina lyami lya Nyambi ya Ngula. Nikekala na nceshe kuli ou nikayuvwila nceshe, kami nikekala na shikeketima kuli ou nikayuvwila shikeketima.

²⁰ Ngoboni nifwako kuketabila ngayi umone lupala lwami, ndaba kowa muntu waku mona Ami pe ha kuyoya.

²¹ Pe kuno nikwo kuli mwanya ku nkumo yami oku ukutwesha kwimana ha limanya.

²² Oho wuwahe wakubyazima kwa wuwahe wami ukapita, nika kuyaka mu mwata wa limanya na kukufwika liboko lyami hantu napitakale.

²³ Nakafumishaho liboko lyami, pe ukamona mongo wami, ngoboni lupala lwami kukamoneka lufwako.”