Kututika 32 - Libuka Lya Kuyela

Nkunzi wa Ngolinde

¹ Oho bantu bamonene ngayi Moshesha wekalile shikati shashitali ku lipili na kubula kukunkuluka ku nceto, balikungwile hamo kuli Aloni pe bambile kukwendi ngayi, “Kulimuka tufwako ebye binezilili ou mulume Moshesha, ou watututwishile mu Engepita. Nohobene haya tutendele nyambi wakututwaminina.”

² Niho Aloni ambile kukwabo ngayi, “Fumishenu tupata matu twa ngolinde otu banavwala bakazenu na banabenu babalume na bana benu ba bambuyama pe mutulete kukwami.”

³ Niho bantu nimwabo bafumishile tupata matu twabo twa ngolinde, pe batuletele kuli Aloni.

⁴ Niho ashimbile tupatamatu, watuyungulwile, wayitilile ngolinde mwakuyungwilila, niho atendele nkunzi. Pe bantu bambile ngayi, “Enu Baishalela, ou niye nengi nyambi yenu ou wamitutwishile mu Engepita.”

⁵ Oho Aloni amonene eshe wazikile kaala kumbili ya nkunzi wa ngolinde. Niho abilikile ngayi, “Zona kukekala shimbo sha kulemeeka Nyambi ya Ngula.”

⁶ Oho kwashile lumenemene baletele bimuna bimo mu kubihokesha kwinga nkombela na byamina byakulya kwinga ntupu ya kulilumikila. Bantu bekalile hanci na kulya na kunwa, niho bakatukile, pe bashindile.

⁷ Nyambi ya Ngula wambile kuli Moshesha ngayi, “Nyankupa na kukunkulukila ku nceto ya lipili, ndaba bantu bobe aba wafumishile mu litunga lya Engepita banabipishi, pe banankana.

⁸ Baishalela bashanukakale mu nzila iya nabatongwezele kwendamo, banalitendele nkunzi wa ngolinde ya kuyungulula, banamulemeshe na kukombelela nkombela kukwendi. Pe bali na kwamba ngayi ou nengi nyambi yabo, ou wabatutwishile mu Engepita.”

⁹ Niho Nyambi ya Ngula ambile kuli Moshesha ngayi, “Nikulimuka aba bantu banengi babakalu mitima.

¹⁰ Haya nabapilaminakale, hinga wezeka kunkanisha. Nili na kubalobesha, niho nikengishe obe na bazukulyobe kwinga mushobo wawunene.”

¹¹ Ngoboni Moshesha walambililile kuli Nyambi ya Ngula, Nyambi yendi. Pe wambile ngayi, “Shuma ngani obe Nyambi ya Ngula unapilaminini bantu bobe, aba wafumishile mu Engepita na nyala zobe na liboko lyobe lya ngovu zazinene?

¹² Kati shumangani eshe Baengepita eze bakambile ngayi watutwishile bantu bobe mu Engepita na shihanganiko sha kubazihila mu mapili na kubalobesha nimwabo? Lehasho sha kupilama, libelulule kami hinga uleta makando awa ha bantu bobe.

¹³ Anuka bakamilimo ba Abulahama na Ishaki na Ishalela. Anuka kami eshe walibezele kukwabo obemwine ngayi, ‘Nikamipana bazukulu babengi ngonehe nyenye zili muyilu na kupana bazukulyenu litunga nimwalyo kwinga likona lyenu mwaya myaka.’”

¹⁴ Nohobene Nyambi ya Ngula walibelulwile, pe kaliha waletele makando ha bantu bendi.

¹⁵ Moshesha wakunkulukilile ku nceto ya lipili, hinga ashimba matapa abili a wupaki awa atikitiwile nokunoku.

¹⁶ Nyambi niyemwine watendele awa matapa a mamanya na ku mangulaho mazu.

¹⁷ Oho Yoshuwa ayuvwile bantu batenda miyoyo, wambile kuli Moshesha ngayi, “Nikuyuvwa miyoyo ya mishunga mu munkungwa.”

¹⁸ Moshesha wambile ngayi, “Otwo tunkelenkele kuyuvwanika tufwako ngo twa ku wahilila ha kukoma, hinge miyoyo ya kukaloka ha kutampwa, ngoboni kukuyuvwanika miyoyo ya kwimbila.”

¹⁹ Oho Moshesha akumine kwakwipi na munkungwa pe wamonene nkunzi na bantu bali na ku shinda, niho apilamine shikuma. Wayumbilile matapa hanci ku nceto ya lipili aya ashimbile, pe apabukile.

²⁰ Niho atolele nkunzi pe wamunyangumwine mu mundilo, wamutwile muhunga, wawufukumwinine mu mema. Niho anwishile bantu ba Ishalela aya mema.

²¹ Moshesha wambile kuli Aloni ngayi, “Kati aba bantu banakutende bishini aha unabetabilishi ngayi babipishe shikuma nehi kuli Nyambi?”

²² Aloni wakumbwile ngayi, “Hinga taha umpilamina obe hekulyami, ukulimuka aba bantu eshe benzilila kutendanga bya wubi.

²³ Bamba kukwami ngayi, ‘Tubumbile nyambi wakututwaminina, ndaba kulimuka ebye binamuwana Moshesha tufwako, ou mulume watututwishile mu Engepita.’

²⁴ Niho na batongweza kundetela mankunda wabo a ngolinde, pe obyo bekala nabyo nimwabyo babivula na kubimpanika. Nabiyumbila mu mundilo mwafuma ou nkunzi.”

²⁵ Moshesha oho amonene ngayi Aloni unalehelele bantu ngayi bashanuke, banalihandulu nibo bamwine kuli bamalamo babo,

²⁶ niho Moshesha emanine mu lipangati lya munkungwa, wabilikizile ngayi, “Ou nimwendi unakundama kuli Nyambi ya Ngula eze kuno kukwami.” Nimwabo Balevi bawulumukilile kukwendi,

²⁷ niho ambile kukwabo ngayi, “Nyambi ya Ngula, Nyambi wa Ishalela unamitongweze ngayi nimwenu kwatenu mikwale yenu, mupite mukati ka munkungwa na kuziha bawushindawenu na bahoni benu na bandambo benu, kubalika kuno ku lipangati kukakuma naku lipangati lyamina.”

²⁸ Balevi bombatalile, batendele ngonehe abatongwezele Moshesha. Pe ha mutena uyo kwazihiwile balume ba kukuma ku 3,000.

²⁹ Niho Moshesha ambile ku Balevi ngayi, “Lelo munalifungwili enubene kwinga bakakutendela mulimo Nyambi ya Ngula, ha kuziha banabenu babalume na bakonzobenu, nohobene Nyambi ya Ngula unamipaniki mfuywezi zendi.”

³⁰ Oho kwashile Moshesha wambile ku bantu ngayi, “Munabipishi shikuma. Ngoboni haya nikukandama ku lipili kuli Nyambi ya Ngula, kampe nikamyambwilila ku wubi wenu.”

³¹ Nohobene Moshesha wabokele kuli Nyambi ya Ngula, pe wambile ngayi, “Tawee! Aba bantu banabipishi shikuma. Banalitendele nyambi ha ngolinde pe banamulemeshe.

³² Ngoboni haya, bayatile kuku bipisha kwabo. Ngoboni ndi ukukana, pe shandula lizina lyami mu libuka omu unatikiti mazina a bantu bobe.”

³³ Nyambi ya Ngula wakumbwile Moshesha ngayi, “Obo tuhu banabipishi kukwami nibo nikashandula mazina wabo mu libuka lyami.

³⁴ Haya yanga, ukatwaminine bantu ku mwanya ou nakutongwezele. Mona, lingeloyi lyami likakutwaminina, ngoboni shikati shili na kwiza oho nikashushula bantu aba ha wubi wabo.”

³⁵ Nohobene Nyambi ya Ngula watumine wulweli ha bantu, ndaba baleteshele Aloni kubumba nkunzi wa ngolinde.