Kututika 31 - Libuka Lya Kuyela

Bamanono ba ku Ntanda ya shikungulukilo

¹ Nyambi ya Ngula watongwezele Moshesha ngayi,

² “Mona nahata Mbezalela mwana Uli wa mulume, muzukulya Hula waku mushobo wa Yunda.

³ Pe namwinzalishi na ngovu na moyo wami. Namupana ngana na wutungu na ngovu za kutenda byuma bya mishobo nimwayo ya milimo ya manono.

⁴ Namupana ngana za ku fundika milimo ya manono na kufula bya ngolinde na shiliva na lubemba,

⁵ na ku mangula tumanya twa kulelema na kuyakatwo mu tukunzu na kubaza bitondo na mishobo nimwayo ya milimo ya manono.

⁶ Nahata kami Oholiyaba mwana Ahishamaki wa mulume wa mushobo wa Ndani, ngayi aliyavwenga nendi. Napana kami ngovu kubamina nimwabo bawutungu wakutenda byuma nimwabyo biya nakutongwezele ngayi ubitende.

⁷ Byuma ebye binengi, Ntanda ya shikungulukilo na Likwati lya Kulimama na muhuko wa nceshe hayilu yalyo na byuma nimwabyo bya kufwika ntanda,

⁸ na tebulu na byuma byayo na lyeyeko lya mimuni lya ngolinde yayiwahe na byuma byalyo na kaala kakuhokeshela incence ya livumba lyaliwahe,

⁹ na kaala kakuhokeshela zinkombela na byuma byasho nimwabyo na lizawo na shipona shalyo,

¹⁰ na bivwalo bya kuzila bya manono bya mukankombela Aloni na bana bendi, bya kutendesha mulimo oho bakatenda mulimo wa mukankombela,

¹¹ na mazi akuwaba na incence ya livumba lyaliwahe lya kukombelela mu Mwanya wakuzila. Bakatende byuma nimwabyo ebye shiwahewahe ngonehe nakutongwezele.”

Mutena Wakukatala

¹² Nyambi ya Ngula wambile kuli Moshesha ngayi,

¹³ “Tongweza Baishalela ngayi, mu ku fwanina kulama mutena wami wakukatala, ndaba eshe shinengi shilimukisho mukati kami nanenu kubihemunwino byenu nimwabyo, ku monesha ngayi Ami Nyambi ya Ngula namingishi kwinga bantu bami ba kuyela.

¹⁴ Mukafwanina kukalama mutena wakukatala ndaba wenga wa kuyela. Muntu nimwendi waku bipisha ou mutena ukafwa. Muntu nimwendi ukutenda mulimo ha mutena uyo ukafumishiwa hakati ka bantu bami.

¹⁵ Mwekala na matena mutanu na umo awa mwatendanga milimo yenu, ngoboni ha mutena wa mutanu na abili wunengi wa kuyela wakukatala, wafunguliwili kukwami. Muntu nimwendi wakutenda mulimo ha mutena uyo, mwa shikuma ukazihiwa.

¹⁶ Nohobene Baishalela bakalamenga mutena owe kwinga shilimukisho sha kulimama kwami ku bihemunwino byenu nimwabyo.

¹⁷ Shinengi shilimukisho sha mwaya myaka mukati kami na Baishalela, ndaba Ami Nyambi ya Ngula nalengele liyilu na hanci mu matena mutanu na umo, pe ha mutena wa mutanu na abili nalehele kutenda milimo nimwayo, pe nakatalile.”

¹⁸ Nyambi oho amanishile kwamba kuli Moshesha ha lipili lya shinayi, wamupanikile matapa abili a wupaki, matapa a limanya awa atikitiwile na munwe wendi niyemwine.