Kututika 30 - Libuka Lya Kuyela

Kaala kakuhokeshela incence

¹ “Ukabaze kaala ka mutondo wa mumbambangoma ka kuhokeshela incence ya livumba lyaliwahe.

² Niko kakenge mu wutali mashentimita 46 na mashentimita 46 muwipi wako na mumwimo wako mashentimita 91.

³ Ukakafwike na ngolinde yayiwahe shikuma hayilu yako hamo na kuzimbalila zinaa nimwazo naku ncengo zako, kami ukakafulile mufumo wa ngolinde na ku kazingwilisha.

⁴ Ukakafulile mahuzi a ngolinde abili na kuwayakila ku nceto ya mufumo ha zimbalila zibili, mwa kukwata mibanda ya ku kukakulikila.

⁵ Ukabaze mibanda eye ya mutondo wa mumbambangoma na kuyifwika na ngolinde.

⁶ Ukayake kaala aka mukati ka mwanya wa shizila, kumbili ya likwiza lya shibaamba elye lina kolama kumbili ya Likwati lya Wupaki. Uyo niwo mwanya oku nikaliwanina nanenu.

⁷ “Oho Aloni akezanga na kuwahisha mimuni, ukahokeshelangaho incence ya livumba lyaliwahe hahasho lumenemene na lumenemene.

⁸ Pe ukafwanina kutenda shuma shimo oho akabangizanga mimuni mazolo. Eye incence ya kukombelela yikatwalililengaho kwakubula lumpa na kubihemunwino byenu nimwabyo.

⁹ Hinga mukatupula incence ya kukaniwa, hinge nkombela ya shimuna nimwasho, hinge nkombela nimwayo ya lukahu, kami hinga mukayitilaho nkombela nimwayo ya waine ha kaala aka.

¹⁰ Aloni ukatenda shiheka sha kwambwililisha kaala ha kuyaka mukeza wa shimuna ku ncengo zako kamo ha mwaka. Ukambwililisha kaala kamo ha mwaka na mukeza wa ntupu ya ha wubi. Eshe shikatendiwanga ku bihemunwino byenu nimwabyo. Kaala aka kakenge kakuzilikiwa, kakufunguliwila kukwami Ami Nyambi ya Ngula.”

Mukungwila wa Ntanda ya shikungulukilo

¹¹ Nyambi ya Ngula wambile kuli Moshesha ngayi,

¹² “Oho ukalaba wingi wa bantu ba Ishalela, muntu na muntu ukampana ncuungu ya kukuliza wumi wendi, ngayi mwanga kukabule malwa akamwizilila ha kulabiwa kwa bantu.

¹³ Muntu nimwendi ou ukalabiwa ukafwanina kupana shitika sha mali a Shekeli akushingiwa ku Ntanda ya Shizila kwinga ntupu kuli Ami Nyambi ya Ngula.

¹⁴ Muntu nimwendi ukakundama kukulabiwa, nikwo kwamba ngayi muntu na muntu uya uli na myaka makumi abili na kupitakana oho, ukapana ntupu eye kuli Nyambi ya Ngula.

¹⁵ Muntu wakuheta kukapana bya kupitakana ufwako, oho bakapana ntupu eye kuli Nyambi ya Ngula ya kwambwililisha wumi wabo.

¹⁶ Mukakungwishe mali awa akwambwililisha ku Baishalela na kuwatendesha ku mulimo waku ntanda ya shikungulukilo. Mukungwila owe ukenge wakukuliza wumi wabo, pe nikabanukanga na kubayatila.”

Lizawo lya lubemba lya kuyowelela

¹⁷ Nyambi ya Ngula wambile kuli Moshesha ngayi,

¹⁸ “Ukafule kami lizawo lya kuyowelela lya lubemba na kapona ka lubemba. Ukaliyake mukati ka ntanda na kaala, kami ukayakemo mema.

¹⁹ Aloni na bana bendi bakayowelanga awa mema ku maboko wabo na ku mawulu.

²⁰ Hinge noho, oho shilolokale bengine mu ntanda bakafwanina kuyowela na mema kutina bakazihiwa, hinge kuhenyena ku kaala mu kukombelela nkombela ya byakulya byami, nkombela yakuhokesha na mundilo.

²¹ Bakafwanina kuyowesha maboko wabo na mawulu wabo, kutina bakafwa. Okwe nikwo kufundiziza bakalamenga nibo na bazukulyabo ku bihemunwino nimwabyo.”

Mazi akuwaba

²² Nyambi ya Ngula wambile kuli Moshesha ngayi,

²³ “Ukashimbe incence ya livumba lyaliwahe shikuma, mushashi wawunene wa mamwemwe a miila na mushashi wawushe wa livumba lyaliwahe lya shinamoni na mushashi wawushe wa livumba lyaliwahe lya mincale,

²⁴ na mushashi wawunene wa kashiya. Nimwabyo bikafwanina kufwanikiza ku wulemu washingiwanga waku Ntanda ya Shizila. Pe ukavwelako mushashi wawunene wa mazi a olive.

²⁵ Hanebye nimwabyo ukatende mazi akuwaba ashizila akuvwela shiwahe nehe lukumba.

²⁶ Muka wabisha ntanda ya shikungulukilo nawo na Mfuma ya likwati lya kulimama,

²⁷ na tebulu na byuma byayo nimwabyo na lyeyeko lya mimuni na byuma byalyo na kaala kakuhokeshela incence,

²⁸ na kaala kakuhokeshela zinkombela na byuma byasho nimwabyo, hamo na lizawo na kapona kalyo.

²⁹ Mu nzila eye byuma ebye ukabifungule ngayi binge bya kuyela shikuma. Muntu nimwendi hinge shuma nimwasho shika kuntulako shika kawula ku ngovu za kuzililila kwasho.

³⁰ Niho ukawabishe Aloni na bana bendi, ukabafungwile ku mulimo wami wakwinga bakankombela.

³¹ Ukambe kami ku bantu ba Ishalela ngayi, ‘Awa mazi akuwaba anengi ashizila, akawabiwanga tuhu ha kutenda mulimo ku bihemunwino byenu nimwabyo.

³² Kaliha wafwanina kuwayitila ha bantu bowa, kami kaliha wafwanina ku vwela mazi akwezekesha nanawa. Mazi awa anengi ashizila kami mukafwanina kuwapenzanga tuhu ngayi anengi ashizila.

³³ Ou nimwendi waku vwela mazi akulifweka nawo, hinge ou nimwendi ukawabisha muntu wakubula kwinga mukankombela, wufwako kukahanganikiwa kwinga wumo wa bantu bami.’ ”

Incence

³⁴ Nyambi ya Ngula wambile kuli Moshesha ngayi, “Ukashimbe shitapilo sha kwezekela hamo sha lukumba olwe lwa livumba lyaliwahe, shitakete na onika na ngalibanume na lukumba lwa lu wahe lwa kuyengula.

³⁵ Ukatendeshebyo na kwinga incence bya ku vwela kwinga nehe lukumba. Ukayakeko mushele ngayi yinge ya nteme yayiwahe na kuyela na kuzila.

³⁶ Kami ukatweho umo kwinga luhaku, pe ukatwaleyo mu ntanda ya shikungulukilo, kakubakubeyo kumbili ya Likwati lya Kulimama. Ukayipenzenga kwinga incence ya shizila shikuma.

³⁷ Hinga ukalitendela lukumba lwa ku vwela lwa kulifweka na incence eye. Ukayipenzenga tuhu kwinga shuma sha shizila shinafunguliwili kuli Nyambi ya Ngula.

³⁸ Ndi muntu umo ukatenda ya kulifweka nayo kwinga lukumba lwa kuwaba, kukahanganikiwa kwinga umo wa bantu bami ufwako.”