Kututika 3 - Libuka Lya Kuyela

Nyambi ukwihana Moshesha

¹ Mutena umo oho Moshesha alaminenga bambelele na bampongo bamukowendi Yetilo mukankombela waku Mindiyani, watwalile litanga mu nciza ya libelelengwa, pe wakumine ku lipili lya kuyela lya Shinayi lipili lya Nyambi.

² Pe Lingeloyi lya Nyambi lyaliholwele kukwendi ngo mulangi wa mundilo hiwulasheka mukati ka lipukumuna. Moshesha wamonene lipukumuna lina kubanga mundilo, ngoboni kuhoka lifwako.

³ Niho Moshesha ahanganikile ngayi, “Shikomokesho eshe shashipya! Shumangani elye lipukumuna likubulila kuhoka? Nikuhenyena kwakwipi nimonesheshe.”

⁴ Oho Nyambi ya Ngula amonene ngayi uli na kuhenyena kwakwipi, wamwihanine mulipukumuna ngayi, “Moshesha! Moshesha!” Wakumbwile ngayi, “Ami wuno, Hekulu!”

⁵ Nyambi wambile ngayi, “Hinga wiza kwakwipi. Vwula ncangwa zobe ndaba unemana ha mwanya wa kuyela.

⁶ Ami nenga Nyambi wa bankakazobe, Nyambi wa Abulahama na Ishaki na Yakobo.” Niho Moshesha afwikile lupala lwendi ndaba watinine kutilamina kuli Nyambi.

⁷ Niho Nyambi ya Ngula ambile ngayi, “Namono makando a bantu bami mu Engepita. Nabayuvu hibakaloka kushinga wakubalamwina kubakakubayandisha. Nalimuku makando wabo nimwawo.

⁸ Pe nashuluku mu kubalamwina ku maboko a Baengepita na kubafumisha mu Engepita ngayi nibatwale ku litunga lyaliwahe, elye likukunkula mahwe na wushi, omwe mwazika Bakenaani na Bahita na Baamoli na Bapelizi na Bahivi na Bayembushi.

⁹ Haya nayuvwu kukaloka kwa Baishalela, pe namono eshe bali na kubayandisha Baengepita.

¹⁰ Obe haya, nili na kukutuma kuli mwene wa mu Engepita, ngayi mwanga ukatweshe kufumisha bantu bami, bana ba Ishalela mu litunga lya Engepita.”

¹¹ Ngoboni Moshesha wambile kuli Nyambi ngayi, “Ami nengi yani, ngayi nitweshe kuya kuli Fwalo mu kufumisha Baishalela mu Engepita?”

¹² Nyambi wakumbwile ngayi, “Nikekala hamo na nobe, pe oho ukafumisha bantu ku Engepita, shilimukisho shiya shikamonesha ngayi Ami nakutumu, mu ka ndemeshela ha lipili lino.”

¹³ Niho Moshesha akumbwile ngayi, “Haya oho nikaya ku Baishalela na kwamba kukwabo ngayi, ‘Nyambi wa bankakazenu unantumu kukwenu,’ haya bakanyipula ngayi, ‘Lizina lyendi yani?’ Nikatwesha kubatongweza ngayi nahiti?”

¹⁴ Nyambi wambile ngayi, “AMI NIYE AMI. Eshe nisho ukafwanina kwamba ku Baishalela ngayi, Ou ukutumbiwa ngayi AMI NIYE, Niye nantumu kukwenu.”

¹⁵ Nyambi kami wambile kuli Moshesha ngayi, “Tongweza Baishalela ngayi, ‘Nyambi ya Ngula, Nyambi wabankakazenu, Nyambi wa Abulahama na Ishaki na Yakobo unantumu kukwenu. Nyambi ya Ngula nilyo lizina lyami mwaya myaka, elye nilyo bakanyihananga nalyo ku bihemunwino nimwabyo bya kumbili.’

¹⁶ Yanga ukakungule bakulwane ba Baishalela hamo pe ukabatongweze ngayi, ‘Nyambi ya Ngula, Nyambi wa bankakazenu, Nyambi wa Abulahama na Ishaki na Yakobo, unalihololo kukwami.’ Batongweze ngayi, ‘Nezi kukwabo ndaba namono eshe ba kubatenda Baengepita.’

¹⁷ Nafungakale ngayi nikabafumishe mu makando amu Engepita omu ba kubekalika na nguma na kubatwala ku litunga elye likukunkula mahwe na wushi, lya Bakenaani na Bahita na Baamoli na Bapelizi na Bahivi na Bayembushi.”

¹⁸ “Pe bantu bami baka yuvwilila kunebye ukamba kukwabo. Niho uku fwanina kuya hamo na bakulwane ba Baishalela kuli mwene wamu Engepita na kwamba kukwendi ngayi, ‘Nyambi ya Ngula, Nyambi wa Bahebelu, unalihololo niye mwine kukwetu, haya tukukunyepa ngayi utwitabilishe, tuye mukala wa matena ahatu mu libelelengwa ngayi tukakombelele kuli Nyambi ya Ngula, Nyambi yetu.’

¹⁹ Nikulimuka ngayi mwene wa mu Engepita kukamitabilisha ngayi muye ufwako, ndele na kukandamikiwa na liboko lya ngovu.

²⁰ Nikatandubula liboko lyami na kushushula Engepita na kutendako byuma bya kutinisha. Nihoboni akamitabilishe ngayi muye.

²¹ “Nikengisha Baengepita ngayi mwanga bakamipane maleema ngayi oho bakafuma bantu bami, bakabule kuya mabokoboko.

²² Ngoboni mbuyama nimwendi wa Kaishalela ukanyepa kuli ndambo yendi wa Kaengepita na kuli mbuyama wa Kaengepita ou wekala mu litala lyendi, bya kuvwala na bya kuliyenga bya shiliva na ngolinde. Pe Baishalela bakavwika byuma ebye bana babo babalume naba bambuyama. Mu nzila eye mukapukula Baengepita.”