Kututika 29 - Libuka Lya Kuyela

Moshesha ukufungula Aloni na bana bendi kwinga Bakankombela

¹ “Haya ukatende eshe kuli Aloni na bana bendi mu kubafungwila ku mulimo wami kwinga bakankombela. Shimba kana ka ngombe kamo ka nkunzi na bikungwe babili ba bambelele bakubula mihendo.

² Pe ukavube mankende a muhunga wa loto, ngoboni enge a kubula mumena. Ukavube kami amo akuwaba na mazi a olive na mapapi amo a kubula mazi, pe mapapi amo akalambiwa mazi.

³ Kami ukawayake mu ntumba yimo na kuwatupula kukwami oho ukakombelela kana ka ngombe ka nkunzi na bikungwe babili babambelele.

⁴ “Ukalete Aloni na bana bendi ku menginino a Ntanda ya shikungulukilo, pe ukabayoweshe na mema.

⁵ Pe ukavwike Aloni bivwalo bya mukankombela ebye, shikobelo na lyambangubo lya kuyaka ku nceto ya kakobelo ka shizila na kambandingwa ka ha kapumpo na kumumanga mukunzi.

⁶ Ukayake kahoshi ka likwiza lya kuzenga ku mutwe wendi na ku mangilaho lipapi lya kance kanamanguliwi ngayi, ‘Kuyeleshiwa kuli Nyambi ya Ngula’

⁷ Pe ukashimbe mazi akuwaba na ku wayitila ha mutwe wendi, pe ukamuwabishewo.

⁸ “Niho ukalete bana bendi ukabavwike bikobelo.

⁹ Ukabamange tuponda mu zinkanda zabo, tuhoshi ku mitwe yabo. Eshe nisho ukemika Aloni na bana bendi. Eze zikenga ndayano ku bazukulyabo bakantendelenga milimo kwinga bakankombela mwaya myaka.

¹⁰ “Niho ukaleta nkunzi kumbili ya Ntanda ya shikungulukilo. Ukatongweze Aloni na bana bendi kukambika maboko wabo ha mutwe wa uya nkunzi.

¹¹ Pe ukazihile nkunzi ku menginino a ntanda ku meho wami.

¹² Ukashimbe mukeza umo wa nkunzi na munwe wobe, ukawulamba ha ncengo za kaala. Niho ukayitile mukeza nimwawo wakushalaho ku nceto ya kaala.

¹³ Pe kami ukashimbe mazi nimwawo akufwika bya mukati na bihaha bya mazi aku litima na mashiye abili hamo na mazi wawo, ukabihokeshele ha kaala bikenge nkombela kukwami.

¹⁴ Ngoboni ukahokeshele nyama ya nkunzi na shitembe shendi na mila na wutoko, ha munkanda wa munkungwa. Eye niyo ntupu ya ha wubi wa bakankombela.

¹⁵ “Ukashimbeho umo ha bikungwe bya bambelele, ukatongweze Aloni na bana bendi kukambika maboko wabo ha mutwe wa shikungwe.

¹⁶ Pe ukazihe shikungwe wa mbelele na kushimba mukeza wendi naku wumyanzila ku zimbalila nimwazo zinaa za kaala.

¹⁷ Niho ukaketozole shikungwe wa mbelele bituntula, ukayoweshe bya mukati na bilama na kubiyaka hayilu ya bituntula byamina na mutwe wendi.

¹⁸ Niho ukahokeshe shikungwe wanzimba ha kaala kwinga nkombela ya kuhokesha kuli Nyambi ya Ngula. Livumba lya nkombela eye likuwahilisha Nyambi ya Ngula, nkombela ya kuhokesha kuli Nyambi ya Ngula.

¹⁹ “Ukashimbeho shikungwe wamina, pe ukatongweze Aloni na bana bendi kukambika maboko wabo ha mutwe wa shikungwe.

²⁰ Ukamuzihe na kushimbaho mukeza wendi umo, ukawulambe kunkumo ya litu lya Aloni lya shilyo na kunkumo ya matu a bana bendi a shilyo naha minwe ya ku maboko wabo a shilyo naha manyenca amanene aku mawulu wabo a shilyo. Wingi wa mukeza ukawumyanzile kuzimbalila zinaa za kaala.

²¹ Niho ukashimbeho mukeza umo uya uli ha kaala na mazi awo akuwaba na kuwamyanzila hali Aloni naha bivwalo byendi naha bana bendi naha bivwalo bya bana bendi. Pe niye na bana bendi na bivwalo byabo bikenga bya kuyela kukwami.

²² “Pe ukaketuleko mazi a shikungwe na mazi aku mushila na mazi akufwika bya mukati na bihaha bya mazi aku litima na mashiye abili hamo na mazi wawo. Na shilama sha shilyo, ndaba wunengi shikungwe na mazi akufungulwisha bakankombela.

²³ Mu ntumba ya mankende a kubula mumena awa atupuliwila kukwami, ukashimbeho mupumpa umo, ku mushobo na mushobo wa mankende, linkende limo lya kuvuba kwa kubula mazi na linkende lya lipapi.

²⁴ Pe ukayake byakulya ebye nimwabyo mu maboko a Aloni na bana bendi pe ukabatongweze kubiyengayengesha kukwami kwinga nkombela ya kuyengayengesha.

²⁵ Niho ukabifumishe ku maboko wabo na kubihokeshela ha kaala hayilu ya nkombela ya kuhokesha. Livumba lya ntupu eye ya kutupula ha mundilo likungwahililisha, Ami Nyambi ya Ngula.

²⁶ “Ukashimbe kapumpo ka nou shikungwe wakufunguliwisha Aloni na kukayengayengesha kwinga nkombela yaku yengayengesha kuli Nyambi ya Ngula. Eshe shitapilo sha shimuna shikenge shobe.

²⁷ “Ukazilike obyo bimamo bya shikungwe wakufungwilisha, kapumpo kaya kayengayengishiwile na shilama sha mbelele shiya shatupuliwile kukwami, binengi bya Aloni na bana bendi.

²⁸ Eze zikenga ndayano za mwaya myaka, ngayi oho bantu bami bakapana nkombela yabo ya kulilumikila, kapumpo na shilama sha shimuna bikenga bya bakankombela. Kami yikenga ntupu ya bantu kukwami, Ami Nyambi ya Ngula.

²⁹ “Bivwalo bya shizila bya Aloni mukankombela bikapanikiwe ku bana bendi oho wafwakale, ngayi mwanga babivwale oho bazilikiwakale.

³⁰ Mwana Aloni ou ukamushwana kwinga mukankombela, ou ukenginanga mu Ntanda ya shikungulukilo kutenda milimo mu mwanya wa kuyela, ukabivwalanga matena mutanu na abili.

³¹ “Ukashimbe nyama ya shikungwe uya batendeshele ha kuzilika Aloni na bana bendi pe ukayitelekele ku mbalila ya kuyela.

³² Bakayilye hamo na mankende aya ashala mu ntumba ku menginino a Ntanda ya shikungulukilo.

³³ Pe bakalye ebye byengile bya kulyambwililisha kwabo na kubazilika na kubafungula. Ndele tuhu bakankombela nibo bakatwesha kulya byakulya ebye, ndaba binengi bya kuyela.

³⁴ Ndi nyama yimo, hinge linkende limo linabulu kuliwa kukuma ku lumenemene, nibyo bikahokeshiwe. Hinga bikaliwa, ndaba binengi bya kuyela.

³⁵ “Katendele Aloni na bana bendi shimbo sha kubazilika matena mutanu na abili ngonehe nakutongwezele.

³⁶ Uku fwanina kuka kombelela nkunzi ha mutena ha mutena kwinga ntupu ya ha wubi. Ukakombelela kami ntupu ya ha wubi wa kaala, oho ukashiyelesha. Niho ukashiwabishe mazi mu kukazilika.

³⁷ Ha matena mutanu na abili ukafwanina kukatenda nkombela ya kuyelesha kaala na ku shifungula. Niho kaala kakenge kakuyela, pe muntu nimwendi hinge ndi shimuna shikakuntulako shikakawula ku ngovu za kuzililila kwasho.”

Zintupu zaha mutena ha mutena

³⁸ “Shikati nimwasho shikeza kumbili, ukakombelele bana ba bambelele babili ba mwaka umo ha kaala ha mutena ha mutena.

³⁹ Ukakombelele umo ha bana ba bambelele ku lumenemene, wamina ku mazolo.

⁴⁰ Ukakombelele mwana mbelele wakutatika hamo na maboko abili akwinzala a muhunga wa loto wakuvwela na mishashi yibili ya mazi akuyengula a olive. Ukafwanina kukayitila kami mikope yibili ya waine kwinga nkombela ya mwitila.

⁴¹ Ukazihe mwana mbelele wawubili ku mazolo. Pe ukamukombelele na nkombela ya muhunga wakwezekela hamo na mazi a olive na waine ngonehe ku lumenemene, nkombela eye inengi ya byakulya kukwami. Livumba lya neye nkombela li kungwahilisha, Ami Nyambi ya Ngula, nkombela ya kukombelela ha mundilo.

⁴² “Eye nkombela yakuhokesha mukayikombelelanga ku meho wami ku menginino aku Ntanda ya shikungulukilo, ku bihemunwino byenu nimwabyo. Oku niko nikaliwana nikambe na nobe.

⁴³ Niko nikaliwanina na Baishalela, pe wuwahe wami kukengisha mbalila iyo kwinga ya kuyela.

⁴⁴ Nikafungula ntanda ya shikungulukilo na kaala, pe nikafungula Aloni na bana bendi ku mulimo wakwinga bakankombela.

⁴⁵ Nikazika mukati ka bantu bami Baishalela, pe nikenga Nyambi yabo.

⁴⁶ Pe bakandimuka ngayi Ami Nyambi ya Ngula, Nyambi yabo, ou wabatutwishile mu Engepita ngayi mwanga nikazike mukati kabo. Ami Nyambi ya Ngula, Nyambi yabo.