Kututika 28 - Libuka Lya Kuyela

Bivwalo bya Bakankombela

¹ Yihana yayiyobe Aloni na bana bendi, ba Nandabi na Ambihu na Eliza na Itama. Ubatapulule ku Baishalela ngayi mwanga batweshe kuntendela mulimo wa mukankombela.

² Pe ukatungile yayiyobe Aloni bivwalo bya shizila bya mukankombela bya kuleta maleema na manono.

³ Yihana bawutungu nimwabo aba napana ngovu za kutunga bivwalo bya Aloni ngayi mwanga afunguliwe mu kuntendela mulimo wami wa mukankombela.

⁴ Batongweze bakatunge kambandingwa kaha kapumpo na kakobelo ka shizila na lyambangubo na shikobelo sha kubalanga na kahoshi ka likwiza lya kuzenga ku mutwe na kaponda. Bakatungile yayiyobe Aloni na bana bendi bivwalo bya shizila, ngayi mwanga bakatweshe kuntendela mulimo wa mukankombela.

⁵ Bantu bawutungu bakatendeshe na wutonge wa wuhombo nawa kufumbuluka nawa kufubila na wutonge wakupohela na ngolinde na likwiza lyaliwahe lya kulelema.

⁶ “Pe kami bakatunge kakobelo ka shizila ka wutonge wa wuhombo nawa kufumbuluka nawa kufubila na wutonge wakupohela wa ngolinde na likwiza lya kulelema lyaliwahe linatangiwi mabalamabala.

⁷ Kakekale na tundombe tubili twaha bifuzi byako, twa kukwata kuzinkumo zako zibili, ngayi mwanga bikalinunge hamo.

⁸ Mukunzi wakutunga shiwahe wakulamikaho wukenge shuma shimo na kakobelo ka shizila, wakutendiwa na wutonge wa wuhombo nawa kufumbuluka nawa kufubila na wutonge wakupohela wa ngolinde na likwiza lya kulelema lyaliwahe lya ku shinta.

⁹ Ukashimbe tumanya tubili twa Onikishi pe ukamanguleho mazina a bana ba Ishalela,

¹⁰ mazina wabo mutanu na limo ha kamanya kamo, kami mutanu na limo ha kamanya kamina, ngonehe kukuhemuwa kwabo.

¹¹ Ukehane mukakumangula wamanono, akamangule ha tumanya tubili mazina a bana ba Ishalela, ukayake tumanya mu tukunzu twa ngolinde.

¹² Ukatuyake ha tundombe twaha bifuzi bya kakobelo ka shizila, tukenge tumanya twakwimanina mishobo likumi na yibili ya Ishalela. Aloni akashimbe mazina wabo ha bifuzi byendi, nohobene ngayi ami Nyambi ya Ngula mwanga nikanukenga bantu bami shikati nimwasho.

¹³ Ukafule kami tukunzu twa ngolinde,

¹⁴ pe kami ukafule zinketwana zibili za ngolinde ya yiwahe ya kupohela ngonehe nyimbwa, pe ukazimangile ku tukunzu.”

Kambandingwa kaha kapumpo

¹⁵ “Ukatende kami kambandingwa kaha kapumpo ka Mukulwane wa bakankombela nimwabo kakuliyavwisha ha ku shingishisha shifungo sha Nyambi. Kakenge kakutungiwa shiwahe ngonehe mulimo wa kakobelo ka shizila. Ukakatendeshe na wutonge wa wuhombo nawa kufumbuluka nawa kufubila na wutonge wakupohela wa ngolinde na likwiza lya kulelema lyaliwahe lya ku shinta.

¹⁶ Kakenge kakwezekela hamo mu wutali namu wipi wako wunene wa shikanzi sha liboko na kuvungiwa kabili.

¹⁷ Ukatungileho mizila yinaa ya tumanya twatuwahe. Mu muzila wakutatika ukayake kamanya kakufubila ka lumbi nanaka ka topazi nanaka ka nganeta.

¹⁸ Mu muzila wa wubili kami ukayake kamanya ka emelalundi naka ka shafwila nanaka ka ndayimondi.

¹⁹ Mu muzila wawuhatu ukayake kamanya ka yashinte na naka ka angate na naka ka amezeshiti.

²⁰ Pe kami mu muzila wa wunaa ukayake kamanya ka mbeliyola na naka ka Onikishi na naka ka yashipa. Otu tumanya tukambandikiwe mu tukunzu twa ngolinde.

²¹ Kamanya na kamanya ku tumanya otwe likumi na tubili hakamanguliwe mazina akwimanina mishobo likumi na yibili ya Baishalela.

²² Ha kambandingwa kaha kapumpo ukafulileho zinketwana za ngolinde ya yiwahe ya kutwesha kupohela ngonehe nyimbwa.

²³ Ukafule kami mahuzi abili a ngolinde na kuwakwatisha ku zinkomi za kuyilu zaha kambandingwa kaha kapumpo.

²⁴ Pe kami nketwana zibili za ngolinde zikakwatishe mu mahuzi abili ali ku zinkomi za kambandingwa.

²⁵ Ukakwatishe zinkumo zibili zamina za nketwana ku tukunzu tubili, pe mwanga zikakwatishe kumbili ya tundombe tubili twaha bifuzi bya kakobelo ka shizila.

²⁶ Niho kami ukafule mahuzi abili a ngolinde na kuwakwatisha ku zinkomi zibili za ku nceto ya kambandingwa kaha kapumpo, kunkumo ya kakobelo ka shizila.

²⁷ Ukafule kami mahuzi abili a ngolinde, mwanga akakwate ku nceto kumbili ya tundombe tubili twaha bifuzi bya kakobelo ka shizila, hahepi na mungundo hayilu ya mukunzi wakutunga shiwahe.

²⁸ Ukakwatishe kami mahuzi a kambandingwa kaha kapumpo ku mahuzi a kakobelo ka shizila na lunyimbwa lwa wuhombo, nohobene ngayi kambandingwa kaha kapumpo kakekale hayilu ya mukunzi ngayi mwanga kakabule ku shoboloka.

²⁹ “Oho Aloni akengina mu mwanya wa kuyela, mwanga akavwalenga aka kambandingwa kaha kapumpo kanamanguliwi na mazina a mishobo ya Baishalela, ngayi Ami Nyambi ya Ngula nikanukenga bantu bami shikati nimwasho.

³⁰ Ukayake Ulimi na Tumimi mu kambandingwa kaha kapumpo, nohobene ngayi Aloni mwanga akabishimbe oho akenginanga ku meho wami. Ha bikati ebye nimwabyo ukafwanina kuvwalanga aka kambandingwa kaha kapumpo, nohobene ngayi mwanga akatweshe kushingishisha shifungo shami ha bantu ba Ishalela.”

Bivwalo byamina bya Bakankombela

³¹ “Ukatende lyambangubo lya kuvwala ku nceto ya kakobelo ka shizila, nimwalyo likatungiwe na wutonge wa wuhombo.

³² Likekale na litubwa lya kwingiza mutwe. Litubwa elye likekale na mungundo wa kushinta wakuzingwilisha ku ncingo ngayi mwanga shikobelo shikabule kutubuka.

³³ Kami ku mufumo walyo waku nceto mwanga ukatungileko manzenze a wutonge wawuhombo nawa kufumbuluka nawa kufubila, kuzingwilishalyo nimwalyo na kutowanishamo zingenjo za ngolinde.

³⁴ Nohobene mwanga kukekale muzila wa zingenjo za ngolinde na manzenze akuzingwilisha ku nceto ya mufumo wa lyambangubo.

³⁵ Aloni ukavwalanga lyambangubo elye oho akatendanga mulimo wa mukankombela. Oho akenginanga ku meho wami mu Mwanya wa Kuyela, hinge oho akatutikanga, kuvuma kwa zingenjo kukayuvwanikanga ngayi hinga afwa.

³⁶ “Ukafule kami kance ka ngolinde yayiwahe shikuma, pe ukamanguleho ngayi, ‘Kuyeleshiwa kuli Nyambi ya Ngula.’

³⁷ Ukakamangile kumbili ya kahoshi ka likwiza lya kuzenga ku mutwe na lunyimbwa lwa wuhombo.

³⁸ Aloni ukakavwalanga ha lupala lwendi, ngayi mwanga Ami Nyambi ya Ngula nikatambule zintupu ziya nimwazo bakafungwila kukwami Baishalela, hinge ndi bantu banatende shibi ha kutupula eze zintupu.

³⁹ “Ukatungile Aloni shikobelo shashiwahe ha likwiza lya kulelema, pe ukatende kahoshi ka likwiza lyaliwahe, lya kulelema lya kuzenga ku mutwe. Ukatende kami kaponda kakutunga mabalamabala.

⁴⁰ “Ukatungile bana ba Aloni bikobelo na tuponda na tuhoshi, bikenge bya kubapana maleema na manono.

⁴¹ Bivwalo ebye ukabivwike yayiyobe Aloni na bana bendi. Niho ukabafungwile na kubawabisha mazi, ngayi mwanga bantendelenga kwinga Bakankombela.

⁴² Kami ukabatungile tuputula twa kuvwala twa kukumina ha bilama twa likwiza lya kulelema, pe mwanga bakabule kulihandula nibo bamwine.

⁴³ Aloni na bana bendi nibo tuhu bakabivwalanga shikati nimwasho oho bakwingina mu ntanda ya shikungulukilo, hinge kuhenyena ku kaala mukutenda mulimo wakukombelela mu Mwanya wa Kuyela, ngayi mwanga bakabule kuzihiwa ha kulihandula nibo bamwine. Eze zikenga ndayano kuli Aloni na bazukulyendi mwaya myaka.”