Kututika 27 - Libuka Lya Kuyela

Kaala ka kuhokeshela Zinkombela

¹ Ukabaze kaala ka mutondo wa mumbambangoma. Kakenge ka kwezekela hamo, mashentimita 229 mu wutali na mashentimita 229 muwipi na mashentimita 137 mu mwimo wako.

² Pe ukabaze ncengo ku zinkomi nimwazo zinaa za kaala. Nizo zikenge shuma shimo na kaala, pe nimwabyo bikafwikiwe na lubemba.

³ Kami ukatende binzoyo bya kukundwila mutoko na mafwosholo na zindonga za kukunama na tuhanto na binzoyo bya kukalila mundilo. Byuma ebye nimwabyo bikatendiwe na lubemba.

⁴ Kami ukafule luhalo lwa lubemba, ukayakeko mahuzi anaa aku kulikila a lubemba ha zinkomi za luhalo olwe.

⁵ Ukayake luhalo ku nceto ya mubalo wa kaala ngayi mwanga lukakumine hakatikati ka kaala.

⁶ Ukabaze mibanda ya ku kulikila ya mutondo wa mumbambangoma na kuyifwika na lubemba,

⁷ pe yikengiziwe mu mahuzi ku mbalila na mbalila ya kaala oko kakakulikiwa.

⁸ Ukatende kaala ha maleenge, kakenge ka mpako mukati. Ukatendesho ngonehe shiya nakufundizizile oho nakutongwezele ha lipili.

Shipango sha Ntanda ya Shikungulukilo

⁹ Ukazingwilisheko shipango ku Ntanda ya Shikungulukilo, shikenge sha miwumbo ya makwiza amawahe a kulelema. Kumbalila ya ku mabukubuku kukekale miwumbo ya mamita 46.

¹⁰ Shikemanine ha zimpangwa makumi abili za lubemba na tupona twazo twa lubemba makumi abili. Ngoboni tuhanto twazo na mikambo yayo bikafuliwe ha shiliva.

¹¹ Ukatende shuma shimo ku mbalila yaku ncelele ya shipango.

¹² Ku mbalila yaku mponci kukekale makwiza a miwumbo ya mamita 23 mu wutali, hamo na zimpangwa likumi na tupona likumi.

¹³ Ku menginino aku mbalila yaku mushamuko shipango shikenge sha mamita 23.

¹⁴ Ku mbalila yimo yaku menginino kukekale mu wumbo wa mamita mutanu na zimpangwa zihatu na tupona tuhatu.

¹⁵ Pe kumbalila yamina kami kukekale mu wumbo wa mamita mutanu na zimpangwa zihatu na tupona tuhatu.

¹⁶ Ku menginino kukekale mu wumbo wa mamita mutanu na anaa mu wutali wa makwiza amawahe a kulelema akutungila hamo na wutonge wa wuhombo nawa kufumbuluka nawa kufubila, akutowanisha mabalamabala. Ukemanine ha zimpangwa zinaa zikekale mu tupona tunaa.

¹⁷ Zimpangwa nimwazo za shipango zikangungikiwe na mbangilo za shiliva na tuhanto twazo tukenge twa shiliva na tupona twazo tukenge twa lubemba.

¹⁸ Shipango mu wutali washo shikenge mamita 44 na muwipi mamita 22 namu mwimo washo kupitakana mamita 2.2. Miwumbo yikatungiwe ha makwiza amawahe a kulelema na tupona twa lubemba.

¹⁹ Bingwalingwali nimwabyo bya kutendesha Ntanda na zimpimpi nimwazo za Ntanda naza shipango bikafuliwe ha lubemba.

Mwa kulamina Mimuni

²⁰ Nyambi ya Ngula watongwezele Moshesha ngayi, “Fundiziza Baishalela ngayi mwanga bakaletenga mazi amawahe a olive akuyengula akumunikisha mimuni mwanga yikamunikiwenga mazolo na mazolo.

²¹ Aloni na bana bendi bakayakenga lyeyeko lya mimuni mu Ntanda ya shikungulukilo, ha munkanda wa shibaamba eshe shikekala kumbili ya Likwati lya Kulimama. Mimuni yikabangenga ku meho wami kubalika mazolo kutwala naku lumenemene. Eze ndayano zikalamiwenga ku Baishalela ku bihemunwino byabo nimwabyo.”