Kututika 25 - Libuka Lya Kuyela

Zinkombela za kutendesha Mwanya Wakuzila

¹ Nyambi ya Ngula watongwezele Moshesha ngayi,

² “Ufundizize Baishalela ngayi bakatupule ntupu kukwami. Ukatambule ntupu ku bantu nimwabo eye bakatupula na mitima yabo nimwayo.

³ Eze zintupu ukatambula, zikenga ngolinde na shiliva na lubemba,

⁴ na makwiza amawahe a kulelema na wutonge wawuhombo na kufumbuluka na wakufubila na makwiza akutenda ha wushako wa bampongo,

⁵ na bitembe bya bikungwe bya bambelele bya kulomba kufubila na bitembe bya bitutunga bya kunyuka na bitondo bya mumbambangoma,

⁶ na mazi a mimuni na lukumba lwa kuvwelesha mazi akuwaba na lukumba lwa kutendesha incence ya livumba lyaliwahe,

⁷ na tumanya twatuwahe twa kulelema na tumanya twamina twa kulelema twa kuyaka mukakobelo ka shizila namu kambandingwa kaha kapumpo.

⁸ Bantu ba ku fwanina kuntendela Ntanda ya Shizila, ngayi mwanga nikekale mukati kabo.

⁹ Ukayitende na byuma byamo nimwabyo ngonehe ku shihanganiko shiya nikuku monesha.”

Likwati lya Kulimama kwa Nyambi ya Ngula

¹⁰ “Bakabaze Likwati lya Kulimama lya mutondo wa mumbambangoma, mu wutali walyo likenge mashentimita 114, muwipi walyo likenge mashentimita 69 namu mwimo walyo likenge mashentimita 69.

¹¹ Ukalifwike na ngolinde yayiwahe mukati naha munkanda na kuliyaka mufumo wa ngolinde wakulizingwilisha.

¹² Ukafule kami mahuzi alyo anaa a ngolinde yayiwahe na kuwayaka ku mawulu alyo anaa, mahuzi alyo abili akekala ku mbalila na mbalila.

¹³ Ukabaze mibanda ya ku kulikila ya mutondo wa mumbambangoma, pe ukayifwike na ngolinde.

¹⁴ Ukengize mibanda mu mahuzi aku zimbalila zibili za Likwati lya Kulimama.

¹⁵ Mibanda yika shala hinga yakulikiwa mu mahuzi a Likwati, hinga yikafumishiwako.

¹⁶ Mukayakiwe matapa abili mu Likwati lya Kulimama Likwati lya Kulimama lya wupaki aya nika kupanika aha hanatikitiwi mazu a Nyambi.

¹⁷ “Ukafule kami muhuko wa nceshe wa ngolinde yayiwahe, wutali wawo wukenge mashentimita 114, muwipi wawo wukenge 69.

¹⁸ Ukatende makelumbi abili akufula ha ngolinde ya ku shuma,

¹⁹ likelumbi limo kunkumo na kunkumo ya muhuko. Ukawafule ngayi akenge shuma shimo na muhuko.

²⁰ Makelumbi bibumbwabumbwa bya kulifweka na mangeloyi bikalipenza limo na lyamina hayilu ya muhuko, pe mbando zawo za kutandubuka zikafwike muhuko.

²¹ Ukayake matapa abili a wupaki mu Likwati, pe ukafwikeho muhuko hayilu ya Likwati.

²² Niho nikaliwanina nenu hayilu ya muhuko wa likwati lya Kulimama lya wupaki, mukati ka makelumbi abili, nikamipana ndayano zami nimwazo ku bantu ba Ishalela.”

Tebulu ya mankende akutupwila kuli Nyambi

²³ “Ukabaze tebulu ya mutondo wa mumbambangoma, ya mashentimita 91 mu wutali na mashentimita 46 muwipi na mashentimita 69 mu mwimo.

²⁴ Mukayifwike na ngolinde yayiwahe shikuma na kuyizingwilisha mufumo wa ngolinde

²⁵ Ukafule mubalo, wuliti wawo ngonehe shikandi sha liboko lya muntu, pe ukazingwilisheko mufumo wa ngolinde.

²⁶ Ukafulileko mahuzi anaa a ngolinde akuyikulikila na kuwayaka ku zinkomi zinaa za tebulu ku mawulu wayo.

²⁷ Mahuzi akukwata mibanda ya ku shimbila tebulu akayakiwile hahepi na mubalo.

²⁸ Wukabaze mibanda ya mutondo wa mumbambangoma na kuyifwika na ngolinde.

²⁹ Ukayitendele zindonga za kuhelukila na zindonga za kukunama za kuyaka incence na zinkomoki na zintesho za kutendesha nkombela na malovu a shinyanca. Nimwabyo ebye bikwatilo bikatendiwa na ngolinde ya ku shuma yayiwahe.

³⁰ Ukayake mankende ashizila akutupula kukwami ha tebulu shikati nimwasho.”

Lyeyeko lya Mimuni

³¹ “Ukafule lyeyeko lya mimuni lya ngolinde ya yiwahe shikuma. Ukafule kapona kalyo na mukoto walyo likenge lya ngolinde lya kufula na nyundo na zintemo zalyo za kuyengiwa za makolwa na zintemo, bikenge bya shuma shimo.

³² Pe likekale na myahi mutanu na wumo yikashonkomana hahalyo kunkumo ya zimbalila, kumbalila yimo na yimo, myahi yihatu.

³³ Ku mwahi na mwahi wa lyeyeko, ku myahi mutanu na wumo kukekale zintemo zihatu za kuyengiwa za kufweka ngonehe alimonde za kushama na makolwa na zintemo.

³⁴ Kami lyeyeko lya mimuni likekale na zintemo zinaa za kuyengiwa za kufweka ngonehe ntemo za alimonde za ku shamuna na makolwa na zintemo.

³⁵ Pe ku myahi mutanu na wumo kukekale likolwa limo ku nceto ya mwahi na mwahi.

³⁶ Makolwa na myahi bikenga shuma shimo na lyeyeko lya mimuni, bikenge bya kufula na ngolinde ya yiwahe ya kufula na shikoma.

³⁷ Pe ukatende mimuni mutanu na yibili yaha lyeyeko lya mimuni, pe ukayimike ngayi yimunikenga mukati ka ntanda.

³⁸ Ukafule kami zimanya zalyo na mendeko walyo a ngolinde ya yiwahe.

³⁹ Ukatendeshe ngolinde yayiwahe ya wulemu wakukuma ku makilongilamu 34 ha kufula lyeyeko lya mimuni na bingwalingwali byalyo nimwabyo.

⁴⁰ Pe ukakeye ha kubitenda ngonehe shiya nakufundizizile ha lipili.”