Kututika 24 - Libuka Lya Kuyela

Kulimama ku kushumishiwa

¹ Nyambi ya Ngula wambile kuli Moshesha ngayi, “Yeka kukwami, obe na Aloni na Nandabi na Ambihu, hamo na bakakutwaminina 70 ba Baishalela. Oho mushili tuhu kantabule, shungumanenu hanci na kulamba.

² Obe tuhu ukahenyena kwakwipi na nami ninkayobe, ngoboni bantu hinga bakakandama ku lipili.”

³ Moshesha wayile na kutongweza bantu mazu nimwawo a Nyambi ya Ngula na kufundiziza kwendi nimwako. Bantu nimwabo bakumbwile na lizu limo ngayi, “Nimo, tukatenda byuma nimwabyo ebye anamba Nyambi ya Ngula.”

⁴ Moshesha watikitile mazu nimwawo a Nyambi ya Ngula. Oho kwashile lumenemene wazikile kaala ku nceto ya lipili, pe wayakileho mamanya a shanukisho likumi na abili a mishobo likumi na yibili ya Baishalela.

⁵ Niho atumine bandumbana ba Baishalela, pe bahokeshele zinkombela kuli Nyambi ya Ngula, kami bakombelelele bimuna bimo kwinga zinkombela za kulilumikila.

⁶ Moshesha washimbile shitika sha mukeza wa bimuna pe wawuyakile mu zindonga na kuyitila shitika shamina ku kaala.

⁷ Niho ashimbile Libuka lya Kulimama omwe mwatikitiwile ndayano za Nyambi ya Ngula, pe walilabilile bantu na kukatula ku lizu. Pe bantu bambile ngayi, “Nimo, tukatenda nimwabyo ebye anatutongweze Nyambi ya Ngula na kumwombatala.”

⁸ Niho Moshesha ashimbile mukeza mu zindonga pe wawumyanzilile ha bantu. Wambile ngayi, “Ou niwo mukeza wakushumisha Kulimama oku anatende Nyambi ya Ngula nanenu aha amipanine eze ndayano nimwazo.”

⁹ Niho Moshesha na Aloni na Nandabi na Ambihu na bakakutwaminina ba Ishalela makumi mutanu na abili bakandamine ha lipili,

¹⁰ pe bamonene Nyambi wa Ishalela. Mu nceto ya mawulu wendi mwamonekele ngo limanya lyaliwahe lya kulema lya shafwila lya kulembuka, lya wuhombo ngo liyilu.

¹¹ Nyambi kaliha watendele shibi aba bantu bakakutwaminina Ishalela, bamonene Nyambi, pe balile na kunwa.

Moshesha ha lipili lya Shinayi

¹² Nyambi ya Ngula wambile kuli Moshesha ngayi, “Wize kukwami hano ha lipili, wutatililengaho, pe nika kupana matapa a mamanya hali ndayano zami na mulao ou natikitiho ku longesha bantu.”

¹³ Moshesha waliwahishile na Yoshuwa mukakumuyavwa, pe Moshesha wakandamine ha lipili lya Nyambi.

¹⁴ Moshesha wambile kubakakutwaminina ngayi, “Tutatililenu muno mu munkungwa hantu tunaboko. Tunamishiyi na Aloni na Hula, muntu nimwendi uli na shambo ukutwesha kuya kukwabo.”

¹⁵ Niho Moshesha akandamine ku Lipili lya Shinayi, pe likumbi lyafwikile lipili.

¹⁶ Kubyazima kwa wuwahe wa Nyambi ya Ngula kwezile ha lipili lya Shinayi, pe likumbi lyafwikile lipili matena mutanu na umo, pe ha mutena wa mutanu na abili Nyambi ya Ngula wehanine Moshesha mu likumbi.

¹⁷ Kubyazima kwa wuwahe wa Nyambi ya Ngula kwamonekele ngo mundilo ukubanga hayilu ya lipili ku bantu ba Ishalela.

¹⁸ Moshesha wakandamine hayilu ya lipili, pe wenginine mu likumbi. Wekalileho matena makumi anaa.