Kututika 23 - Libuka Lya Kuyela

Kupwisha na Kulunga

¹ “Hinga ukendesha mbuzi ya mahalo. Hinga mukayavwa muntu wa mulandu na kupana wupaki wa mahalo.

² Hinga ukonka munayi babengi mukutenda wubi, hinge oho ba kupana wupaki uya wakukanisha kuyata na kupwisha.

³ Hinga wamba na shihota ha shambo sha mukakuyanda.

⁴ “Ndi ukuwana ngombe wa kamalamo kobe hinge mbongolo wendi nayongo, pe ukamubweshe kukwendi.

⁵ Ndi mbongolo wendi unawu na shiyeko shendi, kaliha uku fwanina kumupitakana kumushiya, uku fwanina kumuyavwa na kumukatulamo.

⁶ “Ndi umo waku bantu benu wakuyanda ukuyatiwa, kaliha uku fwanina kuvwangavwanga shambo shendi.

⁷ Benguka ku shambo sha mahalo, hinga ukaziha muntu wakubula mulandu, ndaba nikayata muntu ou ukatenda shuma sha shibi shanoho.

⁸ Hinga ukatambula lizika kanwa, ndaba lizika kanwa likuzimananisha meho a bantu ku byakwoloka na ku shanwisha shambo sha naba bakubula mulandu.

⁹ “Hinga wikalisha lipukwenda na shilala, ukulimuka eshe ayuvwanga lipukwenda mu mutima wendi, ndaba nobe kami wengile lipukwenda mu litunga lya Engepita.”

Mwaka wa mutanu na yibili na mutena wa mutanu na abili

¹⁰ “Ku myaka mutanu na umo ukashange mafuba wobe na kuteza mbuto yawo.

¹¹ Ngoboni ha mwaka wa mutanu na yibili, hinga ukashangamo, ukawalehe taha akalaluke, kami hinga ukatezamo mbuto ya kulimenena. Pe bakakuyanda bakalye ebye bikamenamo kami na tuyamana twa lishaka mwanga tukatweshe kulya ebye bikushalamo. Nisho kami ukatenda na mafuba obe a mikolobozi ya mikabo ya shinyanca na nawa a mitondo ya olive.

¹² “Ukatenda milimo yobe ha matena mutanu na umo, ngoboni ha mutena wa mutanu na abili ukakatale, nohobene ngayi bandungo bobe na mapukwenda aba ba kukutendela milimo na bimuna byobe mwanga bikatweshe kukatala.

¹³ “Yuvwilila ku byuma nimwabyo biya Ami Nyambi ya Ngula ninamba kukwobe. Hinga ukalombela ku banyambi bashenge, hinga wezeka hinge kutoya mazina wabo.

Bimbo byabinene Bihatu

¹⁴ “Ukapinge bimbo bihatu ha mwaka bya kundemeeka.

¹⁵ Mu ngonda wa Ambimbi, ngonda owe niye wafumine nendi mu Engepita, pinga shimbo sha mankende a kubula mumena ngonehe nakutongwezele. Ukalya mankende a kubula mumena ku matena mutanu na abili a shimbo. Hinga ukeza na kundemesha kwakubula kuleta ntupu.

¹⁶ “Ukapinge shimbo sha kuhoma, oho mukatatika kuteza mbuto yobe. “Ku mamaninino a mwaka ukapinge shimbo sha kubuyisha mikabo ku mafuba wobe.

¹⁷ Bikati bihatu ha mwaka balume nimwabo bakamoneka ku meho wami, Ami Nyambi ya Ngula, Nyambi yenu.

¹⁸ “Hinga ukatendesha mankende a mumena oho mukakombelela shimuna kukwami. Pe mazi a bimuna owo ukatendesha bimbo byami hinga akashalaho kukuma na ku lumenemene.

¹⁹ “Ukaleta byabiwahe bya kutatika kuteza mu mafuba wobe ku Litala lya Nyambi ya Ngula, Nyambi yobe ha mwaka na mwaka. “Hinga ukatelekesha mwana mbelele hinge mwana mpongo na mahwe a mandiyendi.

Bikulupisho na kufundiziza

²⁰ “Nikatuma lingeloyi kumbili yobe na kumi lama mu nzila nakakutwala ku mbalila eye nawahishi.

²¹ Ukamwombatale na kuyuvwilila ebye akwamba. Hinga ukamufutulukila ndaba Ami namutumu, pe kukayatila milandu yobe ufwako ndaba lizina lyami lili mumwendi.

²² Ngoboni ndi ukamwombatala na kutenda nimwabyo ebye nikukutongweza, pe nikalwisha bamalamo bobe nimwabo.

²³ Lingeloyi lyami likaya kumbili yobe na kukutwala mu litunga lya Baamoli na lya Bahita na lya Bapelizi na lya Bakenaani na lya Bahivi na lya Bayembushi, pe nikabalobesha.

²⁴ Hinga ukalamba ku banyambi babo hinge kubalemesha. Hinga ukahembwizika ebye bakatenda obo bantu, ngoboni ukanongeshe banyambi babo na kunyemuna tuula twabo twa mamanya twa kulemeshela.

²⁵ Ndi mukandemesha Ami Nyambi ya Ngula, Nyambi yenu, pe nikamitandalisha na byakulya na mema, kami nikamiyambulula malweli nimwawo.

²⁶ Mu litunga lyobe kowa mbuyama ukafwashangila, hinge kwinga mumba. Nikakukulumpalisha.

²⁷ “Aba bantu bakakukanangana nikabayuvwisha bowa wakuntina, nikaleta lumpa hakati ka bantu aba mukalwisha, kami nikashintulula bamalamo bobe ngayi bafume lubilo kukwenu.

²⁸ Nikapalanganisha bamalamo benu, pe nikatanda Bahivi na Bakenaani na Bahita kumbili yenu.

²⁹ Kukabatanda nimwabo ha mwaka wumo nifwako, kutina litunga likafutuka lipembe pe batuyamana ba lishaka bakakuvulila shikuma.

³⁰ Ngoboni nika kutandilabo shashishe shashishe, hantu nimwenu munavulu na kutwesha kukona litunga.

³¹ Nikatenda zinginza za litunga lyobe kubalika ku likobo lya Akaba kukuma ku Mushinzi wa Yufuleti, kami kubalika ku liwate lya Menditaleniya kukuma ku libelelengwa. Nikakupana ngovu za kupitakana bamwine litunga, pe ukabatanda.

³² Hinga ukaliyuvwa nabo hinge na banyambi babo.

³³ Hinga muketabilisha obo bantu kuzika mu litunga lyenu. Ndi mukabetabilisha, pe bakamitendesha wubi kukwami. Ndi ukalemesha banyambi babo, shikenga kukwobe lunyimbwa lwa ku kulobesha.”