Kututika 22 - Libuka Lya Kuyela

Ndayano zaha kuhingishila

¹ “Ndi muntu ukuyiba ngombe hinge ndi mbelele, pe ha kuyipununa, hinge ndi kuyilandisha, uku fwanina kuhingisha zingombe mutanu ha ngombe umo na bambelele banaa ha mbelele umo.

² “Ndi mwizi unakwatiwi hatubula litala wushiku ha kuzihiwa, pe kowa mulandu ukekala ha muntu ou ukamuziha.

³ Ngoboni ndi ukuwaniwa mutena watutikakale, pe ou ukumuziha ukekala na mulandu wakuziha mponde. Mwizi uku fwanina kuhingisha haneshe ayiba. Ndi kowa ebye alinabyo pe niye uku fwanina kulandishiwa ha wizi wendi.

⁴ Ndi shimuna wakuyibiwa ukawaniwa mu liboko lyendi wamumi, hinge ngombe, hinge mbongolo, hinge mbelele, pe ukahingishamo babili ha shimuna umo.

⁵ “Ndi muntu ukwitabilisha bimuna byendi kubuyila mu mfuba hinge mu mfuba yendi ya shinyanca, pe hibikubembulukila na kulya mbuto mu mfuba ya muntu wamina, uku fwanina kuyumba na kuhingisha mbuto yayiwahe yamu mfuba yendi niye mwine, hinge mikabo yayiwahe yamu mfuba yendi ya shinyanca.

⁶ “Ndi muntu ukubangiza mundilo mu mfuba yendi, pe hiwukwandukila mu mwila na kukuma ku mfuba ya muntu wamina na kuhokesha mishiinzi ya mbuto, hinge ndi mbuto yaku ntende, ou unabangizi mundilo ukabihingishamo.

⁷ “Ndi muntu ukwitabila kukonga mali a muntu wamina hinge wuheti, pe hibikuyibiwila ku litala lyendi uya muntu, ndi uya nabiyibi ukuwaniwa ukabihingishamo kabili.

⁸ Ngoboni ndi mwizi nabulu kuwaniwa, pe uya muntu wakonganga wuheti bakamuhenyeshela kuli Nyambi, pe niko akahahilile ngayi kaliha wakwatileko ku wuheti wa muntu wamina.

⁹ “Ku shambo nimwasho sha nkani ha wuheti, hinge shikwinga sha ngombe, hinge sha mbongolo, hinge sha mbelele, hinge sha bivwalo, hinge ndi shinge shumangani nimwasho sha kuyonga, ha bantu babili ba kulikananganisha ha shiheti, bakatwaliwa ku mwanya wakulemeshela. Owo akawana Nyambi ngayi uli na mulandu ukayumbila uya minendi kabili.

¹⁰ “Ndi muntu ukwitabila kulamina minendi mbongolo, hinge ngombe hinge mbelele, hinge shimuna nimwasho, pe shimuna shikufwa hinge kulemana, hinge kupukuliwa na makombe, ndi kowa muntu wamonako,

¹¹ pe uya muntu uku fwanina kuya ku mwanya wakulemeshela na kukulupisha ngayi niye kukwata ha shimuna waminendi. Ndi shimuna wabula kuyibiwa na mwine wendi unetabili ngayi shinayongo, pe muntu uyo kutwesha kumuhingishila ufwako.

¹² Ngoboni ndi shimuna wayibiwile, uya muntu ukahingishila mwine wendi shimuna washenge.

¹³ Ndi shimuna waliwile ku tunzama twamu lishaka, pe nafwanini kuleta ebye binashalaho kwinga shilubwilisho shendi, kami niye kukahingisha kunowo waliwile ku tunzama ufwako.

¹⁴ “Muntu ukushimba shimuna ku minendi, pe hishikulemana hinge kufwa oho mwine wendi kowa, uya muntu uku fwanina kuhingishamo shimuna washenge.

¹⁵ Ngoboni ndi mwine wendi niko ali uya muntu kukamuhingisha ufwako. Ndi shimuna wunengi wakutendela ncuungu, iya ncuungu yika hinga ha kufwa kwa shimuna.”

Ndayano zaha biheka na Ndayano za Wunyambi

¹⁶ Ndi mulume ukuhonga kankanga ou wakubula kuhuhwiwa, pe ha kulala nendi, pe ukapana byonda na kumuyeka.

¹⁷ Ngoboni ndi tatiyendi ukukana ngayi hinga amuyeka, uku fwanina kuyumbila tatiyendi mali akukuma ha byonda bya kuyeka kankanga.

¹⁸ “Hinga muketabilisha mbuyama wamalele kuyoya.

¹⁹ “Muntu nimwendi wakulangana na shimuna akazihiwe.

²⁰ “Muntu nimwendi wakukombelela ku nyambi washenge, kupitakana Nyambi ya Ngula pe akalobeshiwe.

²¹ “Hinga ukekalisha lipukwenda na shilala, hinge kumumonesha malwa, ndaba nenu kami mwengile mapukwenda mu litunga lya Engepita.

²² “Hinga ukekalisha mfwile, hinge nginga na shilala.

²³ Ndi ukabayandisha, pe Ami Nyambi ya Ngula nikaba kumbula na kubayavwa,

²⁴ oho bakakalokela kukwami, pe nikakaliha shikuma na kumiziha mu nzita na bakazenu bakenga bamfwile na bana benu bakenga banginga.

²⁵ “Ndi mukapana mukuli wa mali ku muntu umo waku bantu bami wakuyanda uli hakati kenu, hinga mukekala na lunongo hinge kuyakila nkambiko.

²⁶ Ndi mukakwata mukuli shivwalo sha minenu, ngayi mwanga akamiyumbile, ukafwanina kushibwesha kukwendi oho shilolo mutena wulele,

²⁷ ndaba niwo mwayi wendi alifwikanga hiwupwa wamutukumishanga. Hayabo niye ukalifwika bishini? Oho akakalokela kukwami ngayi nimuyavwe, pe nikamukumbula ndaba Ami nenga wa nceshe.

²⁸ “Hinga ukahandula Nyambi, kami hinga ukakutula mukakutwaminina waku bantu benu.

²⁹ “Hinga mwihala kumpana na kuntupwila zintupu za ku mbuto yenu na waine yenu naku mazi wenu a olive, oho byahokakale. “Mukampane bana benu babalume ba bamyeli.

³⁰ Kami mukampane wakutatika kuhemuwa wa nkunzi waku zingombe na bambelele benu. Wakutatika kuhemuwa wa nkunzi wukekala na mandiyendi matena mutanu na abili, pe ha mutena wa mutanu na ahatu mukamutupule kukwami.

³¹ “Enu muli bantu bami, nohobene kaliha munafwanina kulya nyama ya kayamana nimwendi uya unaliwili mu lishaka ku tunzama, ngoboni mukayipane ku batuwa.”