Kututika 20 - Libuka Lya Kuyela

Ndayano likumi

¹ Nyambi wambile mazu awa nimwawo ngayi,

² “Ami Nyambi ya Ngula, Nyambi yenu, ou wamifumishile mu litunga lya Engepita omu mwengile bandungo.

³ “Hinga ukalemeshanga nyambi washenge ndele Ami tuhu.

⁴ “Hinga ukalitendela shifwekesha sha kubaza shinge shumangani hinge shuma ngani shili muyilu, hinge shili hano hanci, hinge shili mu mema ku nceto ya limvu.

⁵ Hinga ukashungumana ku kanankishi kenge kanahiti hinge kanahiti na kukalemesha, ndaba Ami Nyambi ya Ngula, Nyambi yenu nenga Nyambi walihungu. Nikaleta kashushwilo hanobo banzimba naha bazukulyabo ku shihemunwino sha wuhatu na sha wunaa.

⁶ Ngoboni nikamonesha nceshe zami za mwaya myaka ku bihemunwino bya makulukazi kunobo ba ku haka Ami na kulama ndayano zami.

⁷ “Hinga ukatendeshanga lizina lyami mu nzila yayibi, ndaba Ami Nyambi ya Ngula, Nyambi yenu nikashushula muntu nimwendi ou uku bipisha lizina lyami.

⁸ “Ukalamenga mutena wakukatala na kuwu zilikila.

⁹ Ukatendenga milimo yenu nimwayo ha matena mutanu na umo,

¹⁰ ngoboni mutena wa mutanu na abili wunengi mutena wakukatala, ou wafunguliwile kukwami. Ha mutena uyo kowa wakutenda milimo, hinge enu, hinge bana bobe, hinge bandungo bobe, hinge bimuna byobe, hinge mapukwenda aba bazika mu litunga lyobe.

¹¹ Nyambi ya Ngula, walengele liyilu na hanci na liwate na byuma nimwabyo bilimo mu matena mutanu na umo, ngoboni wakatalile ha mutena wa mutanu na abili, niho atandalishile mutena wakukatala na kuwu zilika.

¹² “Lemeeka tatiyobe na mandiyobe, ngayi mwanga ukayoye shikati shashitali mu litunga liya nika kupana.

¹³ “Hinga uziha.

¹⁴ “Hinga utenda wumambe.

¹⁵ “Hinga uyiba.

¹⁶ “Hinga ubangila muntu wumo mulandu wa mahalo.

¹⁷ “Hinga ulishoza litala lya minobe. Hinga ulishoza mukaza minobe, hinge bandungo bendi, hinge zingombe zendi, hinge bambongolo bendi, hinge shuma nimwasho shiya aheta.”

Bowa wa bantu

¹⁸ Oho bantu nimwabo bayuvwile mishika na kutendoka kwa mpandula, pe bamonene kumwesha kwa lumuni na wishe hiwututuma ha lipili, bakankile shikuma pe bakemaninine kwakutali.

¹⁹ Bambile kuli Moshesha ngayi, “Amba kukwetu tukuyuvwako, ngoboni tuli na bowa wakufwa, ndi Nyambi ukamba kukwetu.”

²⁰ Pe Moshesha wakumbwile bantu ngayi, “hinga mutina, ndaba Nyambi unezi mukumyezeka ngayi amyombatalishe, nohobene ngayi mukabule kutenda wubi.”

²¹ Ngoboni bantu bakemaninine hahatali, ndele tuhu Moshesha niye wahenyenene kwakwipi na likumbi lya ku shipa omu mwekalile Nyambi.

Ndayano za ha Tuula

²² Nyambi ya Ngula wambile kuli Moshesha ngayi, “Tongweza Baishalela ngayi, munamono shiya Ami Nyambi ya Ngula nambanga kukwenu kufuma kuyilu.

²³ Hinga mukalifulila banyambi enu bamwine ba shiliva hinge ngolinde na kuba kundika kukwami ha kundemesha.

²⁴ Ukantendele kaala ka limvu, pe ukakombeleleko mbelele yobe na ngombe yobe kwinga nkombela yobe ya kuhokesha na nkombela yobe ya kulilumikila. Ku mbalila na mbalila kuyo nika kuhatila ngayi ukandemesheleko, pe nikeza kukwenu na kumifuywela.

²⁵ Ndi mu kuntendela kaala ka mamanya, hinga mushitenda na mamanya akubaza, ndaba ndi mu kushimangula na ncinzo pe mukashizilulula.

²⁶ Hinga munzikila kaala kali na tukandamisho ndi mukatenda noho, pe mukamonesha muhelengwa wenu ha kukandama.”