Kututika 2 - Libuka Lya Kuyela

Kuhemuwa kwa Moshesha

¹ Kwekalile mulume umo waku mushobo wa Balevi, wayekele mbuyama waku mushobo wendi.

² Pe mbuyama wemitile, wamubelekelele mwana wa mulume. Oho amonene ngayi nengi mwana wa muwahe, wamuholekele zingonda zihatu.

³ Ngoboni oho abulile kutwesha kumuholekanga, pe washimbile shibondo sha matete na kushizikazika na lingongwe kukanisha kwingiza mema. Walangikilemo mbututu, pe niho ashiyakile mukati ka matete kunkumo ya mushinzi wa Nayilo.

⁴ Kami mpanzendi uya mbututu wemanine kantabule ku mona eshe shikumwizilila.

⁵ Niho mwana Fwalo wa mbuyama wayile mu kuyowela ku mushinzi wa Nayilo, oho bakamilimo bendi ba bambuyama ba kulishilenga ha shibumbo sha mushinzi na kumulama. Mwana Fwalo abazumukile tuhu shibondo mukati ka matete, pe watumine ndungo yendi wa mbuyama mu kushileta.

⁶ Pe oho afukulwilemo, wawaninemo mbututu wa mulume. Kami mbututu wa lililenga, pe wamuyuvwilile nceshe niho ambile ngayi, “Ou mbututu nengi waku bambututu ba Bahebelu.”

⁷ Niho mpanzendi mbututu epwile mwana Fwalo ngayi, “Ukushinga niye naku kwihanina mbuyama wa Kahebelu ngayi akulelele ou mbututu ndi?”

⁸ Wakumbwile ngayi, “Yanga, ukamwihane.” Niho ayile na kwihana manda uya mbututu.

⁹ Mwana Fwalo wa mbuyama watongwezele mbuyama ngayi, “Shimba ou mbututu ukamundelele, ami nika kupanika ncuungu yobe.” Nohobene mbuyama washimbile mbututu pe wa ka mulelele.

¹⁰ Oho kanuke akulile, niho amutwalile kuli mwana Fwalo wa mbuyama, ou wamufutwile kwinga ngo mwanendi wakulibelekela. Wambile ngayi, “Namuzabwile mu mema, nohobene nikumutumba ngayi Moshesha.”

Moshesha ukushilila ku Mindiyani

¹¹ Mutena umo, oho Moshesha wakulakale, wayile na kuzingula bawushinda wendi Bahebelu. Pe wamonene eshe babakandamikilenga kutenda milimo yayikalu. Wamonene kami Kaengepita ha kama Kahebelu waku bantu bendi.

¹² Moshesha washetokele nokunoku, pe oho amonene ngayi kowa muntu uli na kumumona wazihile Kaengepita, pe wamuvumbikile mu lihekelela.

¹³ Oho kwashile kami wabokeleko na kuzingula bawushinda wendi, pe wamonene Bahebelu babili babalume hibalwa. Wambile kuli ou watendelenga minendi shibi ngayi, “Kati shumangani uli na kukamina minobe wa Kahebelu?”

¹⁴ Niye wamukumbwile ngayi, “Yani unakwingi kalela na mukakuyata hakatiketu? Ukushinga unzihe nehe wa ziha uya Kaengepita?” Niho Moshesha atinine, pe walyambishile niye mwine ngayi, “Mwa shikuma bantu bantoshakale eshe ninatende.”

¹⁵ Oho Fwalo ayuvwile eshe shatendiwile, wezekele ngayi azihe Moshesha, ngoboni Moshesha wabembulukile na kutinina ku litunga lya Mindiyani, pe wekalile hahepi na lishima.

¹⁶ Mukankombela wamu Mindiyani Yetilo wekalile na bana ba bambuyama mutanu na babili, bezile na kutekula mema. Pe batekwililile mankuluba a mema akunwisha matanga a bambelele na bampongo ba tatiyabo.

¹⁷ Ngoboni balishani bamo bezile na kubatanda. Moshesha wezile na kubalamwina, niho abanwishilileko bimuna byabo.

¹⁸ Oho bakumine kuli tatiyabo Leule, wabepwile ngayi, “Shumangani munaboko shawangu lelo?”

¹⁹ Bamukumbwile ngayi, “Kaengepita umo unatulamwini ku balishani. Pe kami unatutekwili mema na kunwisha bimuna byetu.”

²⁰ Yetilo wepwile bana bendi ngayi, “Uli kuti? Shumangani munamushiyili ou mulume? Yenunga mukamwihane tulye nendi.”

²¹ Niho Moshesha etabilile kuzika nendi, pe Yetilo wamupanine mwanendi Zipola kwinga mukazendi.

²² Zipola wamubelekelele mwana wa mulume. Pe Moshesha wamutumbile lizina lya Ngeshoma ndaba wambile ngayi, “Ninengi lipukwenda mu litunga lyashenge.”

²³ Kwapitile myaka mwene wa Engepita wafwile. Ngoboni Baishalela bekalile na kukalikiza na ku shunga mu wulungo wabo. Niho bakalokelenga ngayi bawane wakubayavwa, pe kulila kwabo kwakumine kuli Nyambi.

²⁴ Nyambi wayuvwile ku shunga kwa makalikiza wabo. Niho anukile kulimama kwendi kuya alimamine na Abulahama na Ishaki na Yakobo.

²⁵ Wamonene wulungo wa bantu ba Ishalela, Pe walimukile nyinkalo yabo.