Kututika 19 - Libuka Lya Kuyela

Baishalela ku lipili lya Shinayi

¹ Ha mutena wakutatika wa ngonda wawuhatu oho Baishalela bafumakale mu Engepita, ha mutena uyabene bakakuminine mu libelelengwa lya Shinayi.

² Pe oho bafumine ku Lefwindima, bezile na kutendela munkungwa wabo ku nceto ya lipili lya Shinayi.

³ Niho Moshesha akandamine ku lipili mu kuliwana na Nyambi. Pe Nyambi ya Ngula wamwihaninine ku lipili, wamutongwezele kwamba ku Baishalela bazukulya Yakobo ngayi,

⁴ “Mwamonene eshe natendele ku Baengepita naneshe namishimbile ngonehe ngonga ashimbanga bana bendi ha mbando zendi na kumileta kukwami.

⁵ Haya ndi mu kunyombatala na kulama kulimama kwami, pe mukenga bantu bami. Hanci nimwaho henga hami, ngoboni enu mukenga bantu bami ba kuhatiwa.

⁶ Pe mukenga mukoka wa bakankombela na bantu ba kuhatiwa kukwami tuhu ninkayami. Awa niwo mazu ukapana ku bantu ba Ishalela.”

⁷ Nohobene Moshesha wakunkulukile ku nceto ya lipili, pe wehanine bakulwane hamo. Wabatongwezele byuma nimwabyo biya amutongwezele Nyambi ya Ngula.

⁸ Niho bantu nimwabo bakumbwile hamo ngayi, “Tukatenda byuma nimwabyo biya anamba Nyambi ya Ngula.” Moshesha kami wabweshele mazu a bantu kuli Nyambi ya Ngula.

⁹ Nyambi ya Ngula wambile kuli Moshesha ngayi, “Nikeza kukwobe mu likumbi lyaliliti, ngayi mwanga bantu bakayuvwe eshe nikwamba na nobe, mwanga bakakulupile kukwobe kubalika lelo na kumbili.” Niho Moshesha atongwezele Nyambi ya Ngula ebye bakumbwile bantu,

¹⁰ Nyambi ya Ngula wambile kukwendi ngayi, “Yanga ku bantu ukabatongweze ngayi bonze tuhu lelo na nzona baliyeleshe nibo bamwine ha kulemesha. Baku fwanina kuyowesha bivwalo byabo,

¹¹ pe baliwahishile bya nzuzi. Ha mutena uyo, nikashulukila ha lipili lya Shinayi, oku bantu nimwabo bakatwesha ku mona.

¹² Obe kami ukafundile bantu shifunda sha kuzingwilisha lipili ngayi bantu hinga bakakiluka shifunda. Pe ukabatongweze ngayi hinga bakandama ha lipili, hinge kukuntula kunkumo yalyo, Nimwendi ukakuntulako liwulu ukazihiwa,

¹³ ukafwanina kupuhiwa mamanya hinge kuyahiwa na mivwi, ngoboni muntu hinga amukwata na maboko. Eshe shikakundama ku bantu hinge ku bimuna, ba ku fwanina kupuhiwa mamanya ngayi bafwe. Ngoboni oho mpandula yashibiwakale, nihoboni bantu bakakandame ku lipili.”

¹⁴ Niho Moshesha akunkulukile ku nceto ya lipili na kutongweza bantu ngayi baliwahishile shilumweza ha kulemesha. Nohobene bayoweshele bivwalo byabo,

¹⁵ kami Moshesha wabatongwezele ngayi, “Liwahishilenu ku mutena wa nzuzi mwinge ntapa malili na bambuyama ku matena a shikati eshe.”

¹⁶ Ha mutena wawuhatu ku lumenemene kwekalile mishika na kumwesha ha lipili na likumbi lyaliliti lyaholokele hayilu ya lipili, pe mungunina wakutendoka shikuma wa mpandula wayuvwanikile. Bantu nimwabo bekalile mu munkungwa bakankile shikuma.

¹⁷ Niho Moshesha atutwishile bantu ha munkanda wa munkungwa ngayi mwanga bakashimbawile Nyambi, pe bemanine ku nceto ya lipili.

¹⁸ Lipili nimwalyo lya Shinayi lyafwikiwile na wishe, ndaba Nyambi ya Ngula washulukile hayilu yalyo mu mundilo. Kami wishe walyo wakandaminenga ngo wishe waku ngaanze, pe lipili nimwalyo lyakankile shikuma.

¹⁹ Kami mungunina wa mpandula watendokele shikuma kupitakana. Niho Moshesha ambile, pe Nyambi wamukumbwile na mushika.

²⁰ Nyambi ya Ngula washulukile hayilu ya lipili lya Shinayi, niho ehanine Moshesha hayilu ya lipili. Pe Moshesha wakandamine.

²¹ Niho Nyambi ya Ngula ambile kukwendi ngayi, “Kunkulukila hanci pe ushiwulule bantu ngayi hinga bakiluka shifunda kwiza na kumpenza, ndi ba kutenda noho pe wingi wabo ba kufwa.

²² Hinge bakankombela, aba bezanga kwakwipi na nami, ba ku fwanina kuliyelesha nibo bamwine, ndelewa nikabashushula.”

²³ Niho Moshesha ambile kuli Nyambi ya Ngula ngayi, “Bantu kutwesha kukandamako ku lipili lya Shinayi bafwako, ndaba watutongwezele ngayi, fundilenu lipili na kulizilika ngayi linge lya shizila.”

²⁴ Nyambi ya Ngula wakumbwile ngayi, “Kunkuluka ukalete Aloni. Ngoboni bakankombela na bantu kaliha ba ku fwanina kukiluka shifunda kwiza kukwami, ndelewa nikubashushula.”

²⁵ Nohobene Moshesha wakunkulukilile ku bantu na kubatongweza eshe ambile Nyambi ya Ngula.