Kututika 17 - Libuka Lya Kuyela

Mema akututika mu limanya

¹ Shikungulukilo nimwasho sha Baishalela bafumine ku libelelengwa lya Shini, bendelenga hibaya na kutenda minkungwa ku ndayano za Nyambi ya Ngula. Batulilile ku Lefwindima, ngoboni kwabulile mema akunwa bantu.

² Balinyengelele hali Moshesha pe bambile ngayi, “Hayaboni tupane mema akunwa.” Moshesha waba kumbwile ngayi, “Shumangani mu kulinyengela nehe? Shumangani mukwezeka Nyambi ya Ngula?”

³ Ngoboni bantu bafwile ku linyontwa pe bantu bazaminine kulinyengela hali Moshesha ngayi, “Shumangani watufumishilile ku Engepita ngayi wutupunwishe ku linyontwa na banabetu na bimuna byetu?”

⁴ Moshesha walombelele shikuma kuli Nyambi ya Ngula ngayi, “Nikwinga nahiti nanaba bantu? Aba bakushinga kumpuha mamanya.”

⁵ Pe Nyambi ya Ngula wambile kuli Moshesha ngayi, “Shimbaho bakulwane bamo ba Baishalela, pe wutwamine kumbili ya bantu. Shimba na muwana wobe, ou wakamishile ha mushinzi wa Nayilo.

⁶ Ami nikemana kumbili yobe ha limanya ku lipili lya Shinayi. Ukakame ha limanya pe mema akapokomoka ku limanya ngayi bantu mwanga bakanwe.” Pe Moshesha watendele noho ku meho a bakulwane ba Ishalela.

⁷ Mwanya uya watumbiwile ngayi Masha na Melimba, ndaba Baishalela balinyengele na kwezeka Nyambi ya Ngula oho bepwile ngayi, “Kati Nyambi ya Ngula uli hamo na netu, ndi wufwako?”

Nzita na Baamaleki

⁸ Niho Baamaleki bezile na kulwisha Baishalela ku Lefwindima.

⁹ Pe Moshesha wambile kuli Yoshuwa ngayi, “Shimbaho balume bamo ngayi baye na kulwa na Baamaleki nzona. Nikemana hayilu ya lipili hinga na kwata muwana ou antongwezele Nyambi ngayi niwushimbe.”

¹⁰ Nohobene Yoshuwa watendele ngonehe amutongwezele Moshesha, wakatukile wayile na kulwisha Baamaleki, oho Moshesha na Aloni na Hula bakandaminenga ku lipili.

¹¹ Ha shikati nimwasho oho Moshesha akatwilenga maboko wendi Baishalela bakomenenga, ngoboni oho awishilenga maboko wendi Baamaleki batatikile kukoma.

¹² Oho maboko a Moshesha akwangile, Aloni na Hula batolele limanya ngayi ekaleho, niho bemanine kunkumo yendi hinga bakwatilila maboko wendi hayilu. Bawakwatililile shikuma kutinisha kunyenkana kukuma na kukulela kwa mutena.

¹³ Nohobene Yoshuwa wakomene Baamaleki mu nzita.

¹⁴ Niho Nyambi ya Ngula ambile kuli Moshesha ngayi, “Tikita eshe shambo sha kukoma mu libuka ngayi shikanukiwenga, kami tongweza Yoshuwa ngayi nikalobesha Baamaleki.”

¹⁵ Moshesha wazikile kaala na kukatumba ngayi, “Nyambi ya Ngula nengi ndembela ya kukoma kwami.”

¹⁶ Pe wambile ngayi, “Kinkenu mitima yenu ha ndembela ya Nyambi ya Ngula! Nyambi ya Ngula ukazamina kulwisha Baamaleki ku shihemunwino na shihemunwino mwaya myaka!”