Kututika 15 - Libuka Lya Kuyela

Lwimbo lwa Moshesha

¹ Niho Moshesha na Baishalela bembilile lwimbo luno kuli Nyambi ya Ngula ngayi, “Nikembilila Nyambi ya Ngula ndaba, unakomo nzita na maleema a ngovu zendi, unayumbili bambishi na bakakukandamaho mu liwate.

² Nyambi ya Ngula nengi shipata shami sha ngovu, kami niye lwimbo lwami, unengi kupulwisha kwami. Unengi Nyambi yami, haya nikamuyemeza, wenga Nyambi ya batate, nikamulemesha ha wunene wendi.

³ Nyambi ya Ngula wenga kanzita, Nyambi ya Ngula nilyo lizina lyendi.”

⁴ Wayumbilile makoloyi a Fwalo wamu Engepita, na likunge lya nzita yendi mu liwate, na bakakutwaminina bendi babawahe shikuma, bandokamine mu liwate lya kufubila.

⁵ Limpunga lya liwate lya bafwikile, bandokamine ku nceto ngonehi limanya.

⁶ “Obe Nyambi ya Ngula, liboko lyobe lya shilyo linengi lya kukomokesha ku ngovu, liboko lyobe lya shilyo, obe Nyambi ya Ngula, likucancola bamalamo.

⁷ Mu wunene wa ngovu za wene wobe, wukupitakana bamalamo bobe, kami ukali wobe wukulasheka, pe wukubahokesha peluu ngo mwila.

⁸ Woyelele ha liwate pe mema alikungwilile hamo, emanine nkonka ngonehe kashinko, ku nceto ya limpunga lya kunonka lya liwate mema alikwatile nkwaa!”

⁹ Kamalamo wambile ngayi, “Nikabakonkelela na kubakwata, nikatapa wuheti wabo, nikabayangula byuma nimwabyo ebye nikushinga, nikahomona mukwale wami mu shipushu na kubaketozola.

¹⁰ Ngoboni obe Nyambi ya Ngula, mwoyelo wobe wengile tuhu kamo, pe liwate lya kupwile Baengepita, bandokamine ngonehe shondo mu mema akutinisha.”

¹¹ “Obe Nyambi ya Ngula, yani wakulifweka na nobe mukati ka banyambi bowa? Yani wakulifweka na nobe, wamunene mu kuyela? Yani ukutwesha kwikala na wulemu, ngo obe ha kutenda bikomokesho na milimo ya ngovu?

¹² Wolwele liboko lyobe lya shilyo, pe limvu lyaminine bamalamo betu.

¹³ Obe wenga wakulunga kukulimama kwobe, wendeshele bantu bobe aba wakulizile, na shishemo shobe sha mwaya myaka, Wabendeshele na kubakumisha, ku munzi wobe wa kuyela na nyala zobe.

¹⁴ Mikoka ya bantu bakayuvwako, pe bakakanka na bowa, Bafwilishitina bakekala na mutentu pe bakatampwa.

¹⁵ Bamyene bamu Endoma bakatampwa, balume bangovu bamu Mowambi bakakanka, ngovu za Bakenaani zikafwomoka.

¹⁶ Mutentu na bowa wawunene wukekala hahabo. Ha ku mona ngovu za liboko lyobe obe Nyambi ya Ngula, bakawungumana ngonehe limanya, hantu bantu bobe banapiti na kuwuluta, bantu bobe aba wakulizile ku wulungo.

¹⁷ Obe Nyambi ya Ngula ukabengiza na kubazikisha ha lipili lyobe, ha mwanya wuya wahatile kwinga munzi wobe, Obe Nyambi ya Ngula ha litala liya walitendelele obemwine.

¹⁸ Obe Nyambi ya Ngula, ukalela mwaya myaka.”

Lwimbo lwa Miliyamu

¹⁹ Baishalela bendelenga ha limvu lya kuyuma mukati ka liwate. Ngoboni oho makoloyi a Fwalo na bambishi na bakakwendesha babo benginine mu liwate, pe Nyambi ya Ngula wabokeshele mema hamo, pe aba kupwile.

²⁰ Niho Miliyamu muluwe wa Nyambi wambuyama mpanza Aloni, washimbile kancingili kendi, pe bambuyama nimwabo bamukonkele munyima yendi na kumbeta tuncingili na ku shinda.

²¹ Pe Miliyamu wabatumbililenga lwimbo ngayi, “Yimbilenu kuli Nyambi ya Ngula, ndaba unakomo nzita na wuwahe wa ngovu zendi, wunayumbili bambishi na bakakukandamaho mu liwate.”

Mema amalulu

²² Niho Moshesha atwamininine Baishalela, bafumine ku liwate lya kufubila, pe bayile mulibelelengwa lya Shula. Bendele matena ahatu mu libelelengwa ngoboni kaliha bawanine mema.

²³ Niho bakumine ku mbalila yatumbiwile ngayi Mala. Ngoboni mema akuyo engile amalulu, kaliha batweshele ku nwawo. Nisho shuma batumbilile uya mwanya ngayi Mala.

²⁴ Pe bantu balinyengelele kuli Moshesha, kami bepwile ngayi, “Hayaboni tukunwa bishini?”

²⁵ Niho Moshesha alombelele kuli Nyambi ya Ngula shikuma, pe Nyambi ya Ngula wamumoneshele shivutu sha mutondo, washiyumbilile mu mema, pe mema afutukile amawahe. Kuyo niko Nyambi ya Ngula atatikile lukuwa na bifundizizo bya kuyoya nabyo. Pe kuyo kami niko abezekelele,

²⁶ wambile ngayi, “Ndi mukanyombatala shiwahewahe na kutenda ebye nikuhanganika ngayi byabiwahe na kwenda mu zintambo zami na kulama ndayano zami, kukamishushula nifwako na malweli awa naletele ha Baengepita, ndaba Ami nenga Nyambi ya Ngula, ou wamipoleshanga.”

²⁷ Niho bezile ku Elimu, oku kwekalile tuheloke twa mema likumi na tubili na mitondo ya minkomona makumi mutanu na abili, pe niko batulilile hahepi na mema.