Kututika 14 - Libuka Lya Kuyela

Kuzabuka liwate lya kufubila

¹ Niho Nyambi ya Ngula ambile kuli Moshesha ngayi,

² “Tongweza bantu ba Ishalela baboke na kutulila kumbili ya Pi hahiloti, mukati ka Mingindo na liwate lya kufubila, hahepi na Mbaalu Zefwoni.

³ Fwalo ukahanganika ngayi, ‘Baishalela bali na kuyambangila mu litunga, kami ngayi libelelengwa lina bashinkili.’

⁴ Nikakaluhisha mutima wa Fwalo. Pe ukamikonka, nohobene ngayi kukoma kwami hali Fwalo na bakanzita bendi nimwabo kukaleta maleema kukwami. Baengepita bakalimuka ngayi Ami nenga Nyambi ya Ngula.” Baishalela batendele ngonehe abatongwezele.

⁵ Oho bashimikilile mwene wamu Engepita ngayi bantu banashili, pe Fwalo na babilolo bendi bafutwile mitima yabo hahabo, pe bambile ngayi, “Tunatende nahiti? Aha tunetabilishi Baishalela ngayi bashile, pe twabayawakale kwinga bandungo betu!”

⁶ Nohobene Fwalo wawahishile makoloyi endi a nzita hamo na bakanzita bendi nimwabo.

⁷ Washimbile makoloyi myanda mutanu na umo amawahe shikuma na kuyakaho wingi wa makoloyi amina kami aku Engepita, awa ekalile na bakakuwendesha.

⁸ Nyambi ya Ngula wakaluhishile mutima wa Fwalo, pe wakonkele Baishalela, aba bakatukile na kukanca kwa ku ndikangila.

⁹ Baengepita hamo na bambishi nimwabo na makoloyi a Fwalo na bakakwendesha bendi na bakanzita bendi, batandile Baishalela. Pe babawanine banatulu ku liwate lya kufubila, hahepi na Pi hahiloti na Mbaalu Zefwoni.

¹⁰ Oho Baishalela bamonene Fwalo na bakanzita bendi hibeza kukwabo na kuwuluta, Pe bekalile na bowa wawunene shikuma, niho bantu ba Ishalela bakalokelele kuli Nyambi ya Ngula ngayi abayavwe.

¹¹ Bambile kuli Moshesha ngayi, “Kati ku Engepita kowa binzimbi aha unatulete na kufwila muno mu libelelengwa ndi? Mona haya ebye watendakale kukwetu ha kutufumisha mu Engepita!

¹² Nka eshe nisho shiya twakutongwezele oho shilolo tufume mu Engepita ngayi shikamoneka. Twambile ngayi utulehe tuhu twinge bandungo ba Baengepita, kami nisho shengile shashiwahe kukwetu kwinga bandungo kupitakana kufwila muno mu libelelengwa.”

¹³ Pe Moshesha wakumbwile ku bantu ngayi, “Hinga mutina! Shumenu mitima, pe mu ku mona eshe enze atende lelo Nyambi ya Ngula mu kumipulwisha. Hinga mwaka mukatanga aba Baengepita kami kubamona.

¹⁴ Nyambi ya Ngula ukumilwila, pe enu kaliha mwafwanina kulifulankana.”

¹⁵ Nyambi ya Ngula wambile kuli Moshesha ngayi, “Kati shumangani mu kukalokela kukwami? Tongweza bantu ba Ishalela ngayi baye kumbili.

¹⁶ Olola muwana wobe, pe wolwele liboko lyobe ha liwate, mwanga mema alitape ngayi Baishalela batweshe kuzabuka mu liwate ha limvu lya kuyuma.

¹⁷ Pe nikakaluhisha mitima ya Baengepita ngayi mwanga bakamikonke munyima pe nikawane maleema ha kukoma Fwalo na bakanzita bendi na makoloyi endi na bakakwendesha bendi.

¹⁸ Oho nikabakoma, Baengepita bakalimuke ngayi Ami Nyambi ya Ngula.”

¹⁹ Niho lingeloyi lya Nyambi, ou watwamininenga kumbili ya likunge lya Baishalela wafumineko, wabokele munyima yabo. Kami likumbi lya kwimana nkonka lyafumine kumbili yabo na kwimana kunyima yabo,

²⁰ lyezile mukati ka Baengepita na Baishalela. Pe likumbi lyafutukile mincimpwe ku Baengepita, ngoboni lyapanine liyeye ku Baishalela. Kami makunge kaliha atweshele kwiza kwakwipi na kuliwana umo na wamina wushiku nimwawo.

²¹ Niho Moshesha olwele liboko lyendi ha liwate pe Nyambi ya Ngula wabweshele mema a liwate munyima na nkuli ya ngovu ya ku mushamuko wushiku nimwawo, pe wayumishile liwate na mema alitapile.

²² Baishalela bazabukile mukati ka liwate ha limvu lya kuyuma. Na mema emanine ngo tushinko, awa ku shilyo amina ku shimoho.

²³ Baengepita babatandile na kubakonkelela mu liwate na bambishi nimwabo na makoloyi abo na bakakwendesha babo.

²⁴ Ha shikati sha malungashiku Nyambi ya Ngula watilaminine hanci ku likunge lya nzita ya Engepita, hinga ekala mu likumbi lya kwimana nkonka na mu mundilo. Pe wabatampwishile na kubapocakana,

²⁵ wemikile mawili a makoloyi abo ngayi mwanga bawane wukalu wawunene hakwenda. Pe Baengepita bambile ngayi, “Tokonoko! Haya tutinenu! Tufume ku Baishalela, ndaba Nyambi ya Ngula uli na kubalwila na kutulwisha!”

²⁶ Niho Nyambi ya Ngula ambile kuli Moshesha ngayi, “Olwela liboko lyobe hayilu ya liwate, pe mema aboke ha Baengepita na makoloyi abo hamo na bakakwendesha babo.”

²⁷ Nohobene Moshesha wolwele liboko lyendi hayilu ya liwate, pe oho kwashile lumenemene mema abokele ngonehe ekalilenga mwaka. Baengepita bezekele kupanzana, ngoboni Nyambi ya Ngula waba kupwile na mema amu liwate.

²⁸ Mema abokelemo, akupwile makoloyi na bakakwendesha na likunge lya bakanzita ba Fwalo nimwalyo lya Baengepita liya lya konkelenga Baishalela mu liwate. Kowa hinga umo washalileho.

²⁹ Ngoboni Baishalela bendelenga ha limvu lya kuyuma mu liwate, mema engile kashinko awa ku shilyo awa ku shimoho.

³⁰ Ha mutena uyo Nyambi ya Ngula wapulwishile bantu ba Ishalela ku Baengepita, pe Baishalela bamonene mituntu ya Baengepita ku shibumbo sha liwate hinga ya ndiluka ya kufwa.

³¹ Oho Baishalela bamonene ngovu zazinene eze akomene nazo Nyambi ya Ngula Baengepita, pe batinine Nyambi ya Ngula. Nakukulupila muli Nyambi ya Ngula na muli mukamulimo wendi Moshesha.