Kututika 13 - Libuka Lya Kuyela

Kufunguliwa kwa bana ba bamyeli

¹ Nyambi ya Ngula wambile kuli Moshesha ngayi,

² “Mfungwile bamyeli nimwabo babalume. Mweli nimwendi wa mulume wa Kaishalela na shimuna nimwendi wa mulume wakutatika kuhemuwa, nimwabo banengi bami.”

Shimbo sha Mankende a kubula Mumena

³ Moshesha wambile ku bantu ngayi, “Anukenu mutena uno, mutena ou mwafumine nawo ku Engepita, mu litunga muya mwengile bandungo. Ou niwo mutena uya Nyambi ya Ngula amitutwishile na liboko lyendi lya ngovu zazinene. Kowa mankende a mumena akaliwa.

⁴ Ha mutena unobene wa ngonda wakutatika, ngonda wa Ambimbi muli na kututika mu Engepita.

⁵ Nyambi ya Ngula walibezele ku bankakazenu kumipana litunga lya Bakenaani na Bahita na Baamoli na Bahivi na Bayembushi. Oho akamitwala mu litunga liyo likukunkula mahwe na wushi, mukafwanina kukapinganga shimbo eshe mu ngonda wakutatika ha mwaka ha mwaka.

⁶ Ha matena mutanu na abili mukafwanina kukalya mankende a kubula mumena, pe ha mutena wa mutanu na abili kukekala shimbo sha kulemeeka Nyambi ya Ngula.

⁷ Ku matena mutanu na abili mukalya mankende a kubula mumena, mankende a mumena hinga akamoneka kukwenu, kami mumena hinga ukamoneka mukati kenu mu litunga lyenu nimwalyo.

⁸ Oho shimbo shikatatika mukatontwelele bana benu babalume ngayi mukutenda eshe nimwasho ndaba ya neshe atendele, Nyambi ya Ngula kukwenu oho mwafuminenga mu Engepita.

⁹ Ha kupinga eshe shimbo shikamyanukishanga ngo shuma shinamangiwili ku maboko wenu naha zimpala zenu. Shikamyanukishanga ngayi mwanga muzamine kutonta mulao wa Nyambi ya Ngula, ndaba Nyambi ya Ngula wamifumishile mu Engepita na liboko lyendi lya ngovu zazinene.

¹⁰ Nohobene mukapingenga Shimbo eshe ha mwaka ha mwaka ha shikati sha kwimikiwa.

Bana ba bamyeli

¹¹ “Nyambi ya Ngula ukamitwala mu litunga lya Bakenaani kumipanalyo, ngonehe alibezele kukwenu na ku bankakazenu. Oho akamipanalyo,

¹² mukafwanina kupana kuli Nyambi ya Ngula mweli wa mulume nimwendi na bimuna nimwabyo bya balume bya kutatika kuhemuwa, nimwabo bakenga ba Nyambi ya Ngula.

¹³ Ngoboni mukafwanina kukuliza kuli Nyambi ya Ngula mbongolo wa nkunzi wakutatika kuhemuwa na kukombelela mwana mbelele mu mwanya wendi. Ndi kumukuliza mufwako, pe mukafwanina kupokola mukoshi wendi. Ngoboni mukafwanina kukuliza bamyeli nimwabo ba bana benu babalume.

¹⁴ Pe oho shikati sha kumbili bana benu babalume bakamipula ngayi, kati eshe shikutontoloka nahiti? Mukabatongweza ngayi, Nyambi ya Ngula ha ku monesha liboko lyendi lya ngovu zazinene watufumishile ku litunga lya Engepita oku twengile bandungo.

¹⁵ Oho Fwalo wamu Engepita akaluhishile mutima wendi pe wakanine kutwitabilisha ngayi tuye, Nyambi ya Ngula wazihile bamyeli nimwabo babalume mu litunga lya Engepita, bantu na bimuna. Eshe nisho shuma tukukombelelela bana babimuna nimwabo babalume bakutatika kuhemuwa kuli Nyambi ya Ngula, ngoboni tukukuliza banabetu babalume ba bamyeli.

¹⁶ Ha kupinga shimbo eshe shikatwanukishanga ngo shuma shinamangiwili ku maboko wetu naha zimpala zetu, shikatwanukishanga kami ngayi Nyambi ya Ngula, niye watufumishile mu Engepita na liboko lyendi lya ngovu zazinene.”

Likumbi na mundilo

¹⁷ Oho Fwalo etabilishile Baishalela ngayi baye, Nyambi kaliha wabapitishile na nzila yikuya ku shibumbo sha liwate yaku litunga lya Fwilishitiya, hinge ndi yengile ya muketu, ndaba Nyambi wahanganikile ngayi, “Kushinga nifwako ngayi bantu bafutule mitima yabo na kuboka ku Engepita oho bakamona nzita yina bashintikizi.”

¹⁸ Ngoboni Nyambi wabapitishile na nzila ya kwongoloka ya libelelengwa ku shangula ku liwate lya kufubila. ( Penza 10:19) Pe oho bantu ba Ishalela bafumine mu litunga lya Engepita bashimbile bilwisho bya nzita.

¹⁹ Pe Moshesha washimbile bifupa bya Yoshefwa wayile nabyo, ndaba Yoshefwa wambile ngayi, “Oho Nyambi akamilamwina, mukafwanina kufumisha mutuntu wami ku mwanya uno.” Pe Baishalela balibezele kuli Yoshefwa ngayi bakatenda noho.

²⁰ Baishalela bafumine ku Shukota, pe batulilile ku Etami, kunkumo ya libelelengwa.

²¹ Shikati sha mwaana Nyambi ya Ngula wabatwamininine kumbili yabo mu likumbi lya kwimana nkonka kubamonesha nzila. Pe ku wushiku Nyambi ya Ngula wabatwamininine kumbili yabo mu likumbi lya mundilo lya kwimana nkonka mu kubapana liyeye, ngayi mwanga batweshe kwenda mwaana na wushiku.

²² Likumbi lya kwimana nkonka shikati nimwasho lyekalile kumbili ya bantu mwaana nimwawo, kami liyeye lya mundilo ku wushiku.