Kututika 12 - Libuka Lya Kuyela

Shimbo sha Kupitilila

¹ Nyambi ya Ngula wambile kuli ba Moshesha na Aloni mu litunga lya Engepita ngayi,

² “Wuno ngonda wukenga ngonda wakutatika ku mwaka wenu.

³ Panenu ndayano eze ku shikungulukilo nimwasho sha Baishalela ngayi, ha mutena wa likumi wa ngonda uno, muntu na muntu akahate mwana mbelele hinge mwana mpongo wakulingana ba lupashi lwendi.

⁴ Pe ndi ba lupashi lwendi shimuna wunabanenehele ndaba ya wushe wabo, pe niye na ndambo yendi ou alilundamina nendi ku litala lyendi, baka lifungile kulya shimuna umo ngo aha hanakumu bantu. Uku fwanina kuhanganika ha wingi wa bantu baya bakalya uya shimuna, muntu na muntu omu akutweshela kulya.

⁵ Uku fwanina kwinga shimuna wuya wakubula muhendo, shikungwe wa mwaka umo, ukahate mbelele hinge mpongo.

⁶ Pe mazolo a mutena wawulikumi na anaa wa ngonda, likunge nimwalyo lya Baishalela bakapunune bimuna.

⁷ Niho bantu bakashimbe mukeza umo na kuwu yaka ha bikwiliti bibili naha bifumbamino bya matala, omu bakalila shimuna.

⁸ Ha wushiku uyo nyama yika yohiwe, pe bakalishe na linkende lya kubula mumena na mashiha amalulu.

⁹ Hinga mukalya yayibihu hinge ya kuteleka, ngoboni mukayohe nimwayo hamo na mutwe wendi na mawulu wendi na bya mukati kendi.

¹⁰ Kaliha mukafwanina ku shiyako yimo kukuma ku lumenemene, ndi kunashala yimo, yiku fwanina kuhokeshiwa.

¹¹ Eshe nisho mwafwanina kukamulya, hinga mwancunca bivwalo byenu ku zinkanda zenu na ncangwa ku mawulu wenu na mishako yenu mu maboko, pe muka mulye wanguwangu. Nisho shinengi shimbo sha kupitilila sha Nyambi ya Ngula.”

¹² “Ha wushiku wuyo nikapita mu litunga lya Engepita, pe nikaziha bamyeli nimwabo babalume mu litunga, wubili wabo bantu na bimuna. Nikashushula banyambi nimwabo bamu Engepita. Ami Nyambi ya Ngula,

¹³ mukeza ukenga shilimukisho sha ku matala wenu kwinga shilimukisho ku matala omu mwekalanga. Oho nikamona mukeza nikamipitilila, pe kukamilemeka nifwako oho nikashushula Baengepita.

¹⁴ “Mukalame mutena wuno. Wukenga wakumyanukishanga shimbo sha kulemeeka Nyambi ya Ngula. Mukalamanga kufundiziziwa ha kupinga shimbo shino ku bihemunwino byenu nimwabyo, mu kumyanukisha eshe natendele.”

Shimbo sha mankende a kubula mumena

¹⁵ Nyambi ya Ngula wambile ngayi, “Ku matena mutanu na abili mukafwanina kulya mankende a kubula mumena. Ha mutena wakutatika mukafumishe mumena nimwawo mu matala wenu, ndaba muntu nimwendi ukalya mankende a mumena kubalika ku mutena wakutatika kutwala ku mutena wa mutanu na abili, mwaka kukahanganikiwa kwinga umo wa bantu bami wufwako.

¹⁶ Ha mutena wakutatika naha mutena wa mutanu na abili akenga akuyela, mukekale na shikungulukilo sha kulemesha. Kowa mulimo ukatendiwa ha matena owo, ndele tuhu kuwahisha byakulya.

¹⁷ Pe mukalamenga shimbo eshe ndaba ha mutena uyo niwo nafumishile mishobo yenu mu litunga lya Engepita. Nohobene mukafwanina ku lamanga shimbo shino ku mutena wuno naku bihemunwino byenu nimwabyo.

¹⁸ Mukafwanina kukalya mankende a kubula mumena kubalika ku mazolo a mutena wa 14 wa ngonda wakutatika kukuma kumazolo a mutena wa 21 mu ngonda bene oyo.

¹⁹ Ku matena mutanu na abili mumena hinga ukawaniwa mu matala wenu. Ndi muntu ukalya mankende a mumena, hinge ndi wahemuwila mu litunga, hinge ndi lipukwenda mwazika nendi, kukahanganikiwa kwinga umo wa bantu bami wufwako.

²⁰ Hinga mukalya shuma nimwasho sha kutenda ha mumena mu matala wenu nimwamo, mukalye tuhu mankende a kubula mumena.”

Shimbo sha kutatika sha Kupitilila

²¹ Niho Moshesha ehanine bakulwane nimwabo Baishalela, pe wambile kukwabo ngayi, “Muntu na muntu ahate mwana mbelele hinge mwana mpongo na kumuziha ngayi ba lupashi lwendi batweshe kupinga Shimbo sha Kupitilila.

²² Mukashimbe kamwahi ka hishopu, mukakazubike mu mukeza wa shimuna owo wuli mu lulonga na kumyanzila mukeza ha bikwiliti naha shifumbamino shaha shipana. Hinga kukekala umo hakati kenu ukatutikila ha munkanda wa litala lyendi hantu hilumenemene.

²³ Oho Nyambi ya Ngula akapita mu Engepita mu kuziha Baengepita, pe oho akamona mukeza ha bifumbamino naha bikwiliti, Nyambi ya Ngula ukapitilila ha bipana, pe kuketabilisha Lingeloyi wa lufu kwingina mu matala na kumiziha wufwako.

²⁴ Enu na bana benu mukafwanina kwombatala kufundiziza okwe mwaya myaka.

²⁵ Pe oho mukengina mu litunga liya a kulupishile Nyambi ya Ngula kumipana, mukafwanina kulama eshe Shimbo.

²⁶ Oho bana benu bakamipula ngayi, shino Shimbo shikutontolola bishini?

²⁷ Mukabatongweze ngayi, ‘Eshe shinengi nkombela ya kwanuka Kupitilila kwa Nyambi ya Ngula na kumulemeeka, ndaba wazihile Baengepita ngoboni etu watutetelelele.’” Baishalela bafunkamine hanci na kulemesha.

²⁸ Niho Baishalela bayile, pe batendele ebye Nyambi ya Ngula atongwezele ba Moshesha na Aloni.

Lufu lwa bamyeli ba Baengepita

²⁹ Hakati ka wushiku Nyambi ya Ngula wazihile bamyeli nimwabo babalume mu litunga lya Engepita kubalika hali mweli wa Fwalo uli ha litanda, uya washingile kwinga ncwana yendi, kuleta kuli mweli wa ntapwa uya wekalilenga mu tolongo na bana babimuna bya kutatika kuhemuwa bazihiwile kami.

³⁰ Fwalo na babilolo bendi nimwabo na Baengepita nimwabo bapindukile wushiku wuyo, kami mwekalile mbingo mu Engepita nimwamo, ndaba kaliha kwekalile litala limo mwabulile kufwa mwana wa mulume.

³¹ Ha wushiku uyobene Fwalo wehanine ba Moshesha na Aloni, pe wambile ngayi, “Enu na bantu benu Baishalela, katukenu muyenga, mushiye bantu bami! Yenunga mukalemeshe Nyambi ya Ngula ngonehe mwanyepele.

³² Shimbenu bambelele benu na bampongo benu na zingombe zenu, ngonehe mwanyepele. Yenunga! Ngoboni nami kami muntandalishe.”

³³ Baengepita bakandamikile bantu ngayi banyankupe kufuma mu litunga lyabo, ndaba bambile ngayi, “Nimwetu tukafwa ndi kuya mufwako.”

³⁴ Nohobene bantu benzalishile muvuba wakubula mumena mu binzoyo byabo, babivungilile mu makwiza pe babishimbile ha bifuzi byabo.

³⁵ Baishalela batendele ngonehe abatongwezele Moshesha pe banyepele bya kuliyenga bya shiliva na ngolinde hamo na bivwalo.

³⁶ Nyambi ya Ngula wengishile Baengepita kulemeeka bantu ba Ishalela, pe babapanine ebye banyepele. Niho Baishalela bapukwile wuheti wa Baengepita.

Baishalela bakufuma mu Engepita

³⁷ Baishalela bafunzukile ku Lamashishi kulumba ku Shukota. Bengile balume ba kulingana 600,000, kaliha kwalabiwile bambuyama na batwanuke.

³⁸ Likunge lyalinene lya wingi wa bantu ba mishobo yamina hamo na bimuna byabingi, bya bambelele na bampongo, hamo na zingombe.

³⁹ Bayohele mankende a kubula mumena amuvuba uya bafumine nawo ku Engepita, ndaba batandiwile mu litunga lya Engepita na kubabazumuna. Kaliha bekalile na shikati sha kuwahisha byakulya byabo, hinge sha kuyaka mumena ku muvuba.

⁴⁰ Baishalela bekalile mu Engepita myaka 430.

⁴¹ Oho myaka 430 yamanine, ha mutena uyobene mishobo nimwayo ya bantu ba Nyambi ya Ngula bafumine mu litunga lya Engepita.

⁴² Wengile wushiku oho Nyambi ya Ngula akonkamine nakubafumisha mu litunga lya Engepita. Nohobene wushiku uyo Baishalela bakafwanina kukonkamanga ku bihemunwino byabo nimwabyo mu kulemeeka Nyambi ya Ngula.

Bifundizizo ha Shimbo sha Kupitilila

⁴³ Niho Nyambi ya Ngula ambile kuli Moshesha na Aloni ngayi, “Ebye nibyo bifundizizo bya Shimbo sha Kupitilila. Lipukwenda kukalyako wufwako,

⁴⁴ ngoboni ndungo na ndungo wakulanda uku fwanina kukalyako oho mwamutwalakale ku mukanda.

⁴⁵ Lipukwenda wakwiza na kwambola hinge mukamulimo ku fwanina kukalyako wufwako.

⁴⁶ Uya shimuna nimwendi ukafwanina kukaliwila mu litala limo, hinga mukatutwishila nyama ha munkanda. Pe kami hinga mukapokola shifupa hinge shimo sha uyo shimuna.

⁴⁷ Shikungulukilo nimwasho sha Ishalela shikafwanina kukapinga eshe shimbo,

⁴⁸ ngoboni mulume wa kubula kuya ku mukanda kukafwanina kukalyako wufwako. Ndi lipukwenda unaziki mukati kenu kami ndi ukushinga kupinga Shimbo sha Kupitilila sha kulemeeka Nyambi ya Ngula, ha kutatika mu ku fwanina kutwala balume nimwabo ba hamunkanda wendi ku mukanda. Nihoboni akenge ngonehe uya wahemuwila mu Ishalela, pe ukalifungila nenu mu Shimbo.

⁴⁹ Kukekala mulao umo tuhu kuli ou wahemuwila mu Ishalela na lipukwenda ou nalishompeke mukatikenu.”

⁵⁰ Baishalela nimwabo bombatalile, pe batendele ebye Nyambi ya Ngula atongwezele ba Moshesha na Aloni.

⁵¹ Pe ha mutena uyobene Nyambi ya Ngula wafumishile makunge a mishobo ya Baishalela mu litunga lya Engepita.