Kututika 11 - Libuka Lya Kuyela

Mwalwa a wulikumi Lufu lwa bana babalume ba bamyeli ba Baengepita

¹ Niho Nyambi ya Ngula ambile kuli Moshesha ngayi, “Nikaleta tuhu kashushwilo kamo hali Fwalo wamu Engepita na bantu bendi. Nihoboni akamitabilishe ngayi mukaye. Pe oho akamitabilisha ngayi mukaye, ukamitanda nimwenu muno mu litunga.

² Haya amba ku bantu ba Ishalela na kubatongweza ngayi nimwabo banyepe kuli bandambo babo bya kuliyenga bya shiliva nabya ngolinde.”

³ Nyambi ya Ngula wengishile Baengepita kulemeeka Baishalela, pe babilolo ba Fwalo na bantu ba mu Engepita bahanganikile Moshesha kwinga muntu wamuleemu shikuma.

⁴ Moshesha wambile kuli Fwalo ngayi, “Nyambi ya Ngula unamba nehe ngayi, Hakati ka wushiku nikapita mukati ka litunga lya Engepita nimwalyo.

⁵ Pe bana ba bamyeli nimwabo babalume mu Engepita bakafwa, kubalikila kuli ou uli ha litanda mwana Fwalo wa mulume wa mweli ou ukenga ncwana yendi, kutwala ku mwana ndungo wa mbuyama ou wapelanga mpeka ha limanya. Pe bimuna nimwabyo bya kutatika kuhemuwa bikafwa.

⁶ Kukekala mbingo zazinene mu Engepita nimwamo, za kwinga hinga kwatanga kwikala mbingo za kufweka ngo eze, hinge kukekalako kami zifwako kumbili.

⁷ Ngoboni ku Baishalela hinge kawa kukaboza wufwako, hinge ku bimuna byabo, mwanga mulimuke ngayi Nyambi ya Ngula wukutapulula mukati ka Baengepita na Baishalela.”

⁸ Ha kumanisha Moshesha wambile ngayi, “Babilolo bobe bakeza kukwami na kulamba kumbili yami, pe bakandomba ngayi, Yanga! Shimba bantu bobe nimwabo, muyenga! Nihoboni nikaye.” Niho Moshesha afumine kuli Fwalo na kuvundangila.

⁹ Nyambi ya Ngula wambile kuli Moshesha ngayi, “Fwalo kukayuvwilila kukwobe wufwako, ngayi mwanga nitende malwa amina mu litunga lya Engepita.”

¹⁰ Ba Moshesha na Aloni batendele malwa awa nimwawo ku meho a Fwalo, ngoboni Nyambi ya Ngula wakaluhishile mutima wa Fwalo, pe kaliha wetabilishile bantu ba Ishalela ngayi bafume mu litunga lyendi.