Kututika 10 - Libuka Lya Kuyela

Malwa a mutanu na ahatu Mikumbi

¹ Nyambi ya Ngula wambile kuli Moshesha ngayi, “Yanga ukalimone na Fwalo. Namukaluhishakale mutima hamo na babilolo bendi, ngayi mwanga nitende ebye bikomokesho mukati kabo.

² Pe mukatweshe kutongweza bana benu na bazukulyenu ebye natende ha kufutozola Baengepita oho natendele bikomokesho, nimwenu mwanga mulimuke ngayi Ami Nyambi ya Ngula.”

³ Nohobene ba Moshesha na Aloni bayile kuli Fwalo, pe bambile kukwendi ngayi, “Nyambi ya Ngula, Nyambi wa Bahebelu unamba nehe ngayi, bikati binga kati ukakana kulilimbwilisha kukwami? Yitabilisha bantu bami baye bakandemeshe.

⁴ Ndi ukuzamina kukana, pe nzona nikaleta mikumbi mu litunga lyobe.

⁵ Yika bumba hanci nimwaho, mwanga hakabule kutwesha ku moneka. Pe yikalya byuma nimwabyo biya byabulile kunongeshiwa ku likandavula, yikalya mitondo yenu nimwayo.

⁶ Yikenzala mu misheke yenu nimwayo na mumatala a babilolo bobe nimwawo nawa a bantu bobe nimwabo. Byuma biya batatizenu hinge bankakazenu hinga batanga kubimona.” Niho Moshesha akatukile na kuya.

⁷ Babilolo ba Fwalo bambile kukwendi ngayi, “Shikati ngani ou muntu eze akalehe kutuyandisha? Lehenu balume ba Baishalela baye bakalemeshe Nyambi ya Ngula, Nyambi yabo. Kati ku mona wufwako ngayi Engepita walobakale ndi?”

⁸ Nohobene Moshesha na Aloni baletiwile kuli Fwalo, pe wambile kukwabo ngayi, “Yenunga mukalemeshe Nyambi ya Ngula, Nyambi yenu. Ngoboni bayani aba bakaya?”

⁹ Moshesha wakumbwile ngayi, “Nimwetumwetu tukaya, hamo na banabetu na batukulukazi betu. Tukaya hamo na banabetu babalume na banabetu ba bambuyama na bambelele betu na bampongo betu na zingombe zetu, ndaba tuku fwanina kupingila Nyambi ya Ngula shimbo sha kumulemesha.”

¹⁰ Pe mwene wambile kukwabo ngayi, “Nyambi ya Ngula ekale nenu ndi ami nikumitabilisha ngayi mushimbe bakazenu na bana benu! Shinamoneke shiwahewahe ngayi muli na kufunga wubi wakumfutulukila mu mitima yenu.

¹¹ Byo! Kuye tuhu balume na kulemesha Nyambi ya Ngula ndi eshe nisho mukushinga.” Pe ba Moshesha na Aloni batandiwile ku meho a Fwalo.

¹² Niho Nyambi ya Ngula ambile kuli Moshesha ngayi, “Olwela liboko lyobe ha litunga lya Engepita. Mikumbi yize mu kulya byuma nimwabyo ebye bikumena, hinge ebye byuma nimwabyo byashalile ku likandavula.”

¹³ Nohobene Moshesha wolwele liboko lyendi na muwana, pe Nyambi ya Ngula waletele mpepo ya ku mushamuko na kupepokeshela ha litunga mwaana na wushiku nimwawo. Kulumenemene mpepo yaletele mikumbi.

¹⁴ Pe libimbe lya mikumbi lyezile na kutulila ha litunga nimwalyo. Lyengile libimbe lyalinene shikuma lya mikumbi ngayi hinga kwatanga kaliha yekalileko hinge kukamoneka kami yifwako.

¹⁵ Lyafwikile hanci nimwaho, pe lyashipishile litunga. Lyalile nimwabyo biya byamenene na mikabo nimwayo yaku mitondo, eye yashalile ku likandavula. Kowa shuma shashibihu shashalile ku mutondo hinge mbuto mu litunga lya Engepita nimwalyo.

¹⁶ Niho Fwalo anyankupile kwihana ba Moshesha na Aloni, wambile ngayi, “Nabipishi kuli Nyambi ya Ngula, Nyambi yenu, hamo nanenu.

¹⁷ Haya nyatilenu wubi wami hahano bene na kulombela kuli Nyambi ya Ngula, Nyambi yenu, ngayi afumishe kukwami kashushwilo kakufwana.”

¹⁸ Nohobene Moshesha wafumine kuli Fwalo, pe walombelele kuli Nyambi ya Ngula.

¹⁹ Pe Nyambi ya Ngula wafutwile mpepo ya ngovu shikuma ku mponci, eye yatwalile mikumbi na kuyipepwila mu Liwate lya kufubila. Kowa hinge mukumbi wumo washalile mu Engepita nimwamo.

²⁰ Ngoboni Nyambi ya Ngula wakaluhishile mutima wa Fwalo, kaliha wetabilishile Baishalela ngayi baye.

Malwa a mutanu na anaa Mincimpwe

²¹ Nyambi ya Ngula wambile kuli Moshesha ngayi, “Olwela liboko lyobe kuyilu ngayi mwanga kwikale mincimpwe yayinene yifwike litunga lya Engepita.”

²² Moshesha wolwele liboko lyendi kuyilu, pe kwekalile mincimpwe bwii mu litunga nimwalyo lya Engepita matena ahatu.

²³ Baengepita kaliha batweshele kulimona umo na wamina, kami kowa muntu wafumine mu litala lyendi ha matena ahatu. Ngoboni Baishalela nimwabo bekalile mu mwaana oku bekalilenga.

²⁴ Niho Fwalo ehanine Moshesha pe wambile ngayi, “Mu ku fwanina kuya mu kulemesha Nyambi ya Ngula hamo na bakazenu na bana benu. Ndele tuhu bambelele benu na bampongo benu na zingombe zenu nimwabyo bikushala kuno.”

²⁵ Ngoboni Moshesha wakumbwile ngayi, “Uku fwanina kutwitabilisha ngayi tuye na bimuna bya zinkombela na zinkombela za kuhokesha mwanga tukakombelele kuli Nyambi ya Ngula, Nyambi yetu.

²⁶ Tunafwanini kushimba bimuna byetu nimwabyo, kowa umo ukashala. Tukafwanina kukahata bimuna etu bamwine bya kulemesha nabyo Nyambi ya Ngula, Nyambi yetu. Kulimuka bimuna ebye tukahate bya kukombelela kuli Nyambi ya Ngula tufwako ndele ndi tunakakumu.”

²⁷ Ngoboni Nyambi ya Ngula wakaluhishile mutima wa Fwalo, pe kaliha wabetabilishile ngayi baye.

²⁸ Niho Fwalo ambile kuli Moshesha ngayi, “Fuma ku meho wami! Keya haya kukamona kami wufwako, ha mutena uyo wakamona pe ukafwa.”

²⁹ Moshesha wakumbwile ngayi, “Nimo! Hinga mwaka ukatanga kami ku mona lupala lwami.”