Kulaba 9 - Libuka Lya Kuyela

Shimbo sha kupitilila sha wubili

¹ Nyambi ya Ngula wambile kuli Moshesha mu libelelengwa lya shinayi mu ngonda wakutatika wa mwaka wawubili oho bantu ba Ishalela bafumakale mu Engepita wambile ngayi,

² “Bantu ba Ishalela bakapinge Shimbo sha Kupitilila, ha shikati shahatiwile,

³ ha mutena wa 14 mu ngonda uno, ngonehe mwaya ndayano za Shimbo sha Kupitilila.”

⁴ Nohobene Moshesha watongwezele bantu ba Ishalela ku tendanga Shimbo sha Kupitilila,

⁵ pe batendele Shimbo sha Kupitilila mu ngonda wakutatika ha mutena wa 14 ku mazolo, mu Libelelengwa lya Shinayi. Bantu batendele byuma nimwabyo ngonehe Nyambi ya Ngula atongwezele Moshesha.

⁶ Ngoboni kuyo kwekalile balume bamo balibipishile, ndaba bakwatile mutuntu wa muntu wakufwa, kami kaliha batweshele kupinga Shimbo sha Kupitilila ha mutena uyo. Bayile kuli Moshesha na Aloni,

⁷ pe bambile ngayi, “Etu tunabipi ndaba tuna kwata mutuntu wa muntu wakufwa, ngoboni shumangani tunafumishiwi kukuleta ntupu ya Nyambi ya Ngula hamo na Baishalela nimwabo?”

⁸ Moshesha wakumbwile ngayi, “Tatilenu taha hantu natambulu kufundiziziwa kwa Nyambi ya Ngula.”

⁹ Nyambi ya Ngula watongwezele Moshesha ngayi,

¹⁰ “Amba ku bantu ba Ishalela ngayi, ndi umo hakati kenu hinge ku bazukulyenu unalizilulu ha kukwata mutuntu wa muntu wakufwa, hinge ndi uli kwakutali ha mukala, ngoboni ushili kushinga kupinga Shimbo sha Kupitilila,

¹¹ baketabilishiwa kupinga shimbo ku mazolo oho kwapitakale ngonda, ha mutena wa 14 wa ngonda wawubili. Bakapingesho na mankende a kubula mumena na mashiha amalulu.

¹² Hinga bakashiyako byakulya kukuma ku lumenemene, kami hinga bakapokola shifupa shimo sha shimuna. Kapingenu Shimbo sha Kupitilila kuya ngo omu mwayila ndayano nimwazo.

¹³ Ngoboni uya muntu nayele, kami kuya ha mukala ufwako, pe kami nabulu kupinga ku Shimbo sha Kupitilila, mwaka kukahanganikiwila kwinga umo waku bantu bami ufwako, ndaba niye kaliha nalete kukwami ha shikati shahatiwile. Uya muntu ukalileyekamo niyemwine.

¹⁴ “Ndi lipukwenda wazika mukati kenu ukushinga kupinga Shimbo sha Kupitilila, uku fwanina kupinga omu mwayila ndayano. Ndayano zimo zikapanikiwa ku bantu nimwabo, hinge Kaishalela hinge lipukwenda.”

Likumbi lya kuyekula

¹⁵ Ha mutena yemikiwile Ntanda ya shikungulukilo, likumbi lyezile na kuyifwika. Kufuma ku mazolo kukuma na ku lumenemene likumbi lya monekele ngo mundilo.

¹⁶ Nisho shekalilenga, likumbi lyafwikile, ku wushiku lyamonekele ngo mundilo.

¹⁷ Shikati nimwasho, likumbi oho lyakatukilenga bantu ba Ishalela batuntukilenga, pe nimwako oku likumbi lyayilenga na kutulila niko bakatukililenga bantu na kutenda minkungwa kami.

¹⁸ Bantu batuntukilenga na ndayano za Nyambi ya Ngula, pe mu ndayano zendi nimo batuntulwilenga munkungwa. Shikati nimwasho, likumbi lyekalilenga hayilu ya ntanda hinge ndi shengile shikati sha kukuma hati, bekalilenga mu mwanya umo wa munkungwa.

¹⁹ Oho ndi likumbi linekala hayilu ya ntanda matena amengi, bantu ba Ishalela kami bombatalilenga Nyambi ya Ngula, pe kaliha batuntukilenga.

²⁰ Bikati bimo likumbi lyemaninenga hayilu ya ntanda ha matena tuhu amashe, hamina bekalilenga tuhu mu munkungwa hinge kuhenya lifwako, ngonehe ku ndayano za Nyambi ya Ngula.

²¹ Hamina likumbi lyemanine tuhu kubalika ku mazolo kutwala ku lumenemene, kami bakatukile wanguwangu oho likumbi lyakatukilenga. Shikati osho nimwasho, lyakatukilenga likumbi, pe nabo kami bakatukile.

²² Hinge nilyo lyekalile matena abili, hinge ngonda umo, hinge mwaka, hinge ndi shikati shashitali, osho shikati lyekalilenga likumbi hayilu ya ntanda, hinge shikati sha kukuma hati nibo kaliha bahenyenenga. Ngoboni oho lyakatukilenga baishalela kami bakatukilenga.

²³ Bazikilenga munkungwa na kutuntula munkungwa hakwombatala ku ndayano za Nyambi ya Ngula eze atongwezele Moshesha.