Kulaba 8 - Libuka Lya Kuyela

Bya mimuni

¹ Nyambi ya Ngula wambile kuli Moshesha ngayi,

² “Tongweza Aloni oho akuyaka zimuni mutanu na zibili ha lyeyeko lya zimuni, uku fwanina kuzimunika ngayi mwanga zitweshe ku monesha liyeye kumbili.”

³ Aloni wombatalile, pe wayakile mimuni ha lyeyeko ngayi zitweshe ku monesha liyeye kumbili. Ngonehe Nyambi atongwezele Moshesha.

⁴ Kufuma hayilu kutwala ku nceto, lyeyeko lyatendiwile ha ngolinde wakufula na shikoma, ngonehe shifwanikizo shiya Nyambi ya Ngula amoneshele Moshesha.

Kuyeleshiwa na kufunguliwa kwa Balevi

⁵ Nyambi ya Ngula wambile kuli Moshesha ngayi,

⁶ “Utapulule Balevi ku bantu nimwabo ba Ishalela, pe ubayeleshe.

⁷ Mu nzila eye, bamyanzile na mema a kuyeleshesha, pe bashehe zinyutu zabo nimwazo na kuyowesha bivwalo byabo ngayi bakenge ba kuyela.

⁸ Niho bakashimba mwana nkunzi na ntupu ya mpeka yashingiwanga ya muhunga wakuvuba na mazi a olive, kami mukashimba nkunzi wawubili wa ntupu ya ha wubi.

⁹ Niho, mukungule shikungulukilo nimwasho sha ba Ishalela, pe wimike Balevi kumbili ya ntanda yaku meho wami.

¹⁰ Bantu ba Ishalela bakakambika maboko wabo ha mitwe ya Balevi,

¹¹ niho boni Aloni ukafungwila Balevi kukwami kwinga nkombela yakuyengayengesha yaku Baishalela, ngayi mwanga bakatende mulimo wami.

¹² Balevi bakakambika maboko wabo ha mitwe ya bankunzi babili, umo ukwinga wakupanikiwa kwinga ntupu ya ha wubi na wamina ukwinga nkombela yakuhokesha, ngayi mwanga kutendiwe shimbo sha kwambwililisha Balevi.

¹³ “Mfungwile Balevi, kami yimika Aloni na bana bendi ngayi babatwamininenga. Balevi bakwinga nkombela yakuyengayengesha kukwami.

¹⁴ Eye niyo nzila ukatapulule Balevi ku Baishalela nimwabo, nohobene ngayi mwanga bakenge bami.

¹⁵ “Kunyima yakubayelesha na kubafungula balevi, kwinga nkombela yakuyengayengesha, nihoboni bakenge bakakutwesha kutenda mulimo mu ntanda ya shikungulukilo.

¹⁶ Na yakamo Balevi mu mwanya wa bana ba bamyeli babalume nimwabo ba Baishalela, pe bakenga bami.

¹⁷ Oho nazihile bamyeli nimwabo mu Engepita nazilikile mwana wa mweli wa lupashi lwa Kaishalela na Kaishalela, shimuna na shimuna wakutatika kuhemuwa ukwinga wami.

¹⁸ Haya nili na kushimba Balevi mu mwanya wa bamyeli nimwabo ba Baishalela,

¹⁹ kami nili na kubapanika kuli Aloni naku bana bendi kwinga shishemo sha Baishalela, kutendela milimo bantu ba Ishalela mu ntanda ya shikungulukilo, kutenda shimbo sha kulyambwililisha sha kukoweza Baishalela ku makando aya akushinga kubezilila, ndi bakahenyena kwakwipi shikuma na mwanya wakuzila.”

²⁰ Nohobene Moshesha na Aloni na bantu nimwabo ba Ishalela bafungwile Balevi, ngonehe Nyambi ya Ngula atongwezele Moshesha.

²¹ Balevi baliyeleshele nibo bamwine, pe bayoweshele bivwalo byabo, pe Aloni wabafungwile kwinga nkombela yakuyengayengesha kuli Nyambi ya Ngula Kami watendele shimbo sha kulyambwililisha kwabo.

²² Bantu batendelele byuma nimwabyo biya Nyambi ya Ngula atongwezele Moshesha. Balevi batatikile kutenda milimo mu ntanda ya shikungulukilo, kumbili ya Aloni na bana bendi.

²³ Nyambi ya Ngula wambile kuli Moshesha ngayi,

²⁴ “Ku balika ku myaka 25, Kalevi nimwendi ukabalika kutenda milimo yendi mu ntanda ya shikungulukilo,

²⁵ pe kukuma ku myaka makumi mutanu ukaleha.

²⁶ Ku balika haya ukayavwa baminendi Balevi mukutenda milimo mu ntanda ya shikungulukilo, ngoboni ku fwanina kutenda milimo ninkayendi ufwako. Eshe nisho ukemika ndayano za milimo ya Balevi.”