Kulaba 6 - Libuka Lya Kuyela

Ndayano za Banazaleta

¹ Nyambi ya Ngula wambile kuli Moshesha ngayi,

² “Tongweza bantu ba Ishalela, mulume hinge mukazi wakulibeza na mbeza ya kulizilika kwinga Kanazaleta na kulifungwila niyemwine kuli Nyambi ya Ngula.

³ Kaliha wafwanina kunwa waine hinge sha kunwa nimwasho sha ku kolwesha. Hinga anwa waine ya kuzonga ku mikabo ya shinyanca hinge sha kunwa nimwasho sha ku kolwesha, hinga anwa mema a shinyanca hinge kulya mikabo ya shinyanca ya kubombola hinge ya kuyuma.

⁴ Shikati eshe ashili mu mbeza za kwinga Kanazaleta, kulya shuma shamina shiya sha ku mikabo ya shinyanca ufwako, hinge mimi bene hinge bihwahwa bya mikabo.”

⁵ Shikati eshe ashili mu mbeza za Wunazaleta, ku fwanina kuketwila huki zendi hinge ku sheha ufwako. Unamangiwi na mbeza ha shikati shiyo anafunguliwili kuli Nyambi ya Ngula pe ukaleha huki zendi na mulevu wendi ngayi bikule.

⁶ Kukonga huki zendi shinengi shilimukisho sha kulifungwila kuli Nyambi. Nohobene haya ku fwanina kulizilula niyemwine ha kuhenyena kwakwipi na mutuntu wa muntu wakufwa afwako.

⁷ Hinge uyo bene mutuntu wa tatiyendi, hinge wa mandiyendi, hinge wa yayiyendi hinge wa mukonzo wendi wa mulume, hinge wa mpanzendi.

⁸ Shikati eshe ashili Kanazaleta nalifungwili kuli Nyambi ya Ngula.

⁹ Ndi huki za kuzilikiwa za Kanazaleta zinalizilulu ndaba unakundama kwakwipi na muntu umo unafwili mu meho wendi, uku fwanina kutatilila matena mutanu na abili pe niho ashehe huki zendi na mulevu wendi, pe nihoboni enge wa kuyela.

¹⁰ Ha mutena wa mutanu na ahatu ukaleta matela abili hinge bankilimba babili kuli mukankombela ku menginino aku ntanda ya shikungulukilo.

¹¹ Mukankombela ukapanika umo kwinga ntupu ya ha wubi kami wamina kwinga nkombela ya kuhokesha, kupinga shimbo sha kuliyelesha ndaba ya kukwata ku mutuntu wa muntu wakufwa. Wowo mutena mulume ukateula huki zendi,

¹² pe ukafungwila kami kuli Nyambi ya Ngula shikati shendi kwinga Kanazaleta. Shikati sha kunyima kulabiwa shifwako, ndaba huki zendi za kuteuliwa zabipile. Ha ntupu ya kukuliza ukaleta mbelele wa mwaka umo.

¹³ “Oho Kanazaleta akamanisha mbeza zendi ukatenda shiheka shashizila. Ukaya ku menginino a ntanda ya shikungulukilo,

¹⁴ na kupana kuli Nyambi ya Ngula babimuna bahatu bakubula nyanco nkunzi wa mwana mbelele wa mwaka umo wa nkombela yakuhokesha na mbelele wamukazi wa mwaka umo kwinga ntupu ya ha wubi na shikungwe wa mbelele kwinga nkombela ya kulilumikila.

¹⁵ Kami ukatupula ntumba ya mankende akuvuba a kubula mumena, mipumpa yayiliti ya kutendiwa na muhunga wakuvuba na mazi a olive na tunkende twa kulambiwa na mazi a olive na zinkombela za kushingiwa za mpeka na waine.

¹⁶ “Mukankombela ukaleta ebye nimwabyo kuli Nyambi ya Ngula na kukombelela ntupu ya ha wubi na nkombela yakuhokesha.

¹⁷ Ukakombelela shikungwe wambelele kuli Nyambi ya Ngula kwinga nkombela ya kulilumikila hamo na ntumba ya mankende a kubula mumena na kuleta zintupu za mpeka na waine.

¹⁸ Kanazaleta ukasheha huki zendi ku menginino aku ntanda na kuya na kuziyumbila ha mundilo uya bahokeshelanga nkombela yaha kulilumikila.

¹⁹ “Niho mukankombela ukashimba shiboko sha shikungwe wa mbelele oho shatelekiwakale, pe ukashimba mupumpa umo wawuliti wa mankende na kankende kamo kakashe ha ntumba na kubiyaka nimwabyo hamo mu maboko a Kanazaleta.

²⁰ Nohoboni haya, mukankombela ukabiyengayengeshela kuli Nyambi ya Ngula kwinga ntupu ya kuyengayengesha kuli Nyambi. Bikwinga shimamo sha mukankombela sha kuyela, mu kufungilako na kapumpo kaya kayengayengeshiwa na shilama sha shikungwe wa mbelele shiya sha kombeleliwa. Nohoboni Kanazaleta mwanga anwe waine.

²¹ “Eze nizo ndayano za Kanazaleta, ngoboni ndi Kanazaleta ukukulupisha ntupu kupitakana ebye alibeza ngayi apanike, uku fwanina kupanika shiwahewahe ebye akulupisha.”

Mfuywezi zaha nkombela

²² Nyambi ya Ngula wambile kuli Moshesha ngayi,

²³ tongweza Aloni na bana bendi, ha kufuywela bantu ba Ishalela bambenga ngayi,

²⁴ “Nyambi ya Ngula mwanga amifuywele, na kumi lama.

²⁵ Nyambi ya Ngula wamiyuvwilile nceshe, na kwikala na shikeketima hahenu,

²⁶ Nyambi ya Ngula mwanga amiyamizize, na kumipana ku mwena.”

²⁷ Pe Nyambi ya Ngula wambile ngayi, “Ndi ba kutangashana lizina lyami ngo mfuywezi ha bantu ba Ishalela, pe mwa shikuma nikabafuywela.”