Kulaba 5 - Libuka Lya Kuyela

Bantu bakubula kuyela

¹ Nyambi ya Ngula wambile kuli Moshesha ngayi,

² “Layelela bantu ba Ishalela kufumisha ha munkanda wa munkungwa bantu nimwabo baya bali na wulweli wakuliyambwisha, hinge bantu nimwabo bali na wulweli wakundweka ha lutu, hinge bantu nimwabo banabipi ndaba ya kukwata ha mutuntu wa muntu.

³ Bantu aba nimwabo banabipi bafumishenu, balume na bakazi, ngayi babule kuzilulula munkungwa oku nazika mukati ka bantu bami.”

⁴ Baishalela bombatalile, pe babafumishile mu munkungwa nimwabo. Batendele ngonehe Nyambi ya Ngula alayelele Moshesha.

Bya kuyumba ha kubipishila

⁵ Nyambi ya Ngula wambile kuli Moshesha ngayi,

⁶ “Amba ku bantu ba Ishalela ngayi, oho ndi mulume hinge mukazi akubipishila minendi pe nabipishili ami Nyambi ya Ngula,

⁷ uku fwanina kwitabila wubi wendi ku muntu uya anabipishili na kumuyumbila mulandu wa nzimba na kuyakaho na nkambiko ya makumi abili ha mwanda na mwanda.

⁸ Ngoboni ndi uya muntu babipishila unafu kami ufwaye kawushinda wendi waha mutima ou waku fwanina kuyumbila, iya ndando yikapanikiwa kuli Nyambi ya Ngula kwinga ya mukankombela. Kuyumbisha okwe kuli nakufungilako shikungwe wa mbelele wakuliyavwisha ha kutenda shiheka sha kulyambwilila ku muntu wawana mulandu.

⁹ Nohobene zinkombela nimwazo, eze Baishalela bakutupula kuli Nyambi ya Ngula zinengi za mukankombela kuli ou bali na kuzipanika.

¹⁰ Zinkombela nimwazo za kuyela za muntu na muntu zikenga zendi, ngoboni zinkombela nimwazo muntu na muntu akupana kuli mukankombela zikenga za mukankombela bene.”

Byambo bya Balume ba lihungu na bakazabo

¹¹ Nyambi ya Ngula wambile kuli Moshesha ngayi,

¹² “Tongweza Baishalela ngayi, hamina mukazi ukashanuka na kwongeza mukokwendi na kulibipisha kutenda wumambe na mulume washenge,

¹³ ngoboni mukokwendi wabula kulimuka akulala nendi, ndaba kami ndi mukazendi walimba mulume kami kwabulile paki, pe kami kaliha wawaniwile mu shilambalili.

¹⁴ Ndi mulume ukuyuvwila lihungu mukazendi ou unalibipishi, hinge kuyuvwila lihungu lya kuhanganikila ngayi mukazendi natende wumambe na mulume washenge, hinge ndi kaliha walibipisha.

¹⁵ Mulume ukatwala mukazendi kuli mukankombela, pe ukatwala na ntupu yashingiwangaho ya muhunga wa mbale wakulingana kilongilamu imo. Hinga akayitilaho mazi amina a olive hahawo hinge incence hanoyo nkombela ndaba yinengi nkombela mu shambo sha lihungu mu ku shingishisha kupwisha.

¹⁶ “Mukankombela ukaleta mukazi, pe ukamwimika ku meho a Nyambi ya Ngula.

¹⁷ Mukankombela ukayitila mema akuyela mu lulonga lwa kukunama lwa lima, kami ukazomona limvu hanci mu ntanda ya shikungulukilo na kuliyaka mu mema kuwengisha amalulu, aya akaleta shikuto.

¹⁸ Niho mukankombela ukayimika uya mukazi, ku meho a Nyambi ya Ngula na kumumangulula huki, pe ayake mu maboko wendi ntupu ya muhunga washanukisho, eye yikenga nkombela ya ha lihungu. Mukankombela akakwate lulonga lunenzala na mema amalulu aya akuleta shikuto.

¹⁹ Niho mukankombela ukaletesha mukazi kulibeza ngayi, ‘Ndi ufwako kulibipisha kutenda wumambe, kuka kaula ha mbeza eze zikwiza na mema awa wufwako.

²⁰ Ngoboni ndi unalibipishi ha kutenda wumambe,

²¹ mwanga Nyambi ya Ngula akakute lizina lyobe mukati ka bantu bobe. Mwanga ashimbe luhemo lwobe na kuzimbisha livumo lyobe.

²² Mwanga mema awa engine mu livumo lyobe na kulizimbisha, luhemo lwobe lukashinke.” Pe mukazi ukambe ngayi, “Netabili, Nyambi ya Ngula mwanga atende noho.”

²³ “Niho mukankombela ukatikita shikuto eshe mu libuka, pe ukashandola ntikitilo eye mu lulonga lwa mema amalulu.

²⁴ Oho shilolokale anwishe mukazi awa mema, hamina akamushingishila kukola shikuma,

²⁵ mukankombela ukashimba ntupu ya muhunga mu maboko a mukazi, kuwu kwatilila na kuwu fungwila kuli Nyambi ya Ngula, pe hikuwuleta na kuwu yaka ha kaala.

²⁶ Niho mukankombela ukashimba liboko lya kwinzala kwinga ntupu ya shanukisho na kuyihokeshela ha kaala. Niho akapane uya mukazi mema ngayi anwe.

²⁷ Ndi nalibipishi natende wumambe, mema akamukolesha shikuma na livumo lyendi likazimba na luhemo lwendi lukashinka. Lizina lyendi likafutuka shikuto mukati ka bantu bendi.

²⁸ Ngoboni ndi kulibipisha wufwako, pe kuka kaula wufwako, ukatwesha kubeleka bana.

²⁹ “Ou niwo mulao waha byambo bya lihungu, ndi mukazi ukushanuka na kulibipisha niyemwine hinge ndi uli mu maboko a mukokwendi,

³⁰ hinge ndi mulume uli na lihungu na mukazendi, niho mukazi ukatwaliwa ku meho a Nyambi ya Ngula na kumwimanikako, pe mukankombela ukatenda shiheka eshe.

³¹ Mulume ukenga wakubula mulandu, ngoboni mukazi ndi unawana mulandu, uku fwanina kulileyekamo niyemwine.”