Kulaba 4 - Libuka Lya Kuyela

Milimo ya balevi ba lupashi lwa Kohati

¹ Nyambi ya Ngula wambile kuli Moshesha na Aloni ngayi,

² “Ulabe livumo lya Kohati mukati ka Balevi, balabe mu mavumo amashe namu mapashi,

³ na kulaba balume nimwabo bali mukati ka myaka makumi ahatu na makumi mutanu, aba batweshele kutenda milimo yamu ntanda yaku meho a Nyambi ya Ngula.

⁴ Mulimo wabo ku Ntanda wakundama ku byuma bya kuzila shikuma.”

⁵ Nyambi ya Ngula wafundizizile Moshesha kami nehe ngayi, “Oho shikenga shikati sha kutuntuka ha munkungwa, Aloni na bana bendi bakengina mu ntanda mu kushimba shibaamba hambili ya Likwati lya Kulimama kwa Nyambi ya Ngula na kufwikishako Likwati lya wupaki.

⁶ Bakayaka shifwiko sha shitembe sha shitutunga sha kunyuka shiwahe hayilu yalyo na kuyalaho likwiza lyaliliti lya wuhombo hayilu yalyo, pe niho kwingizamo mibanda ya kushimbila.”

⁷ “Bakayala likwiza lya wuhombo hayilu ya tebulu ya kuyaka mankende akutupula kuli Nyambi ya Ngula na kuyakaho zindonga na zinyungu za kuyohela mitondo ya kutwa yakuhokesha na zinyungu za nkombela na zintesho za waine za ntupu. Hakekalenga mankende ha tebulu shikati nimwasho.

⁸ Bakatandubula likwiza lya kufubila hayilu ya neshe nimwasho na kuyaka shifwiko sha shitembe sha shitutunga sha kunyuka shiwahe hayilu yasho, pe niho mukengize mibanda ya ku shimbila.

⁹ Bakashimba likwiza lya wuhombo na kufwika ha kuyakila mimuni hamo na mimuni yayo na zimanya na zihebe na mishashi ya mazi a olive nimwayo.

¹⁰ Bakayivungile mu shitembe sha shitutunga sha kunyuka shiwahe na byuma byayo nimwabyo na kuyiyaka ha maleenge akushimbila.”

¹¹ “Niho kami bakayala likwiza lya wuhombo hayilu ya kaala ka ngolinde, bakayaka shitembe sha shitutunga sha kufwika sha kunyuka shiwahe na kufwika hayilu yasho, pe hikwingiza mibanda ya ku shimbila.

¹² Bakashimba bitendesho nimwabyo bya kuliyavwisha nabyo mu mwanya wa kuyela na kuvungilabyo mu likwiza lya wuhombo na kuyaka shitembe sha shitutunga sha shifwiko sha kunyuka shiwahe na kufwika hayilu yabyo na kubiyaka ha maleenge akushimbila.

¹³ Bakakomba mutoko wa mazi kuwu fumisha ku kaala, pe bakatandubula likwiza lya kufumbuluka hayilu yasho.

¹⁴ Niho bakayakaho byuma nimwabyo bya kuliyavwisha ku mulimo waku kaala, nibyo binengi binzoyo bya kukalila mundilo na tuhanto na mafwosholo na zindonga za kukunama zazinene. Niho bakayala shitembe sha shitutunga sha kunyuka shiwahe sha kufwika hayilu yasho na kwingizamo mibanda ya ku shimbila.

¹⁵ Oho Aloni na bana bendi bamanishakale kufwika mwanya wa kuyela na bya kuliyavwisha nimwabyo, oho bantu ba kutuntuka mu munkungwa, livumo lya Kohati bakeza mu kushimba byuma bya kuzilikiwa, ngoboni kaliha bafwanina kukwata ku byuma bya shizila, ndelewa bakafwa. Ebye nibyo banafwanini kutenda bakalivumo lya Kohati shikati nimwasho oho ntanda yikutuntuliwa.”

¹⁶ “Eliza mwana mukankombela Aloni, ukalama mazi a mimuni na incence na zintupu za mpeka zaha mutena ha mutena na mazi akuwaba na byuma nimwabyo kami na byashenge bya mu ntanda biya byazilikiwa kuli Nyambi ya Ngula.”

¹⁷ Nyambi ya Ngula wambile kuli Moshesha na Aloni ngayi,

¹⁸ “Hinga witabila livumo lya Kohati ngayi balobe mukati ka Balevi,

¹⁹ ndi bakwiza kwakwipi na byuma ebye byazilikiwa. Aloni na bana bendi bakengina mukati mu kutontolola mulimo wa muntu na muntu na kumutongweza eshe akashimbanga.

²⁰ Ngoboni ndi baka Kohati bakengina mu ntanda na ku mona bakankombela hibawahisha bingwalingwali bya kuzilikiwa ha kulongalonga bakafwa.”

Milimo ya Balevi ba livumo lya Ngeshona

²¹ Nyambi ya Ngula watongwezele Moshesha ngayi,

²² “Laba livumo lya Ngeshona mukati ka Balevi, balabe mu mavumo amashe namu mapashi,

²³ kami ulabe balume nimwabo bali na myaka mukati ka makumi ahatu na makumi mutanu, aba ba kutwesha kutenda mulimo mu ntanda ya shikungulukilo.

²⁴ Bakekala na mulimo waku kulika bingwalingwali ebye Bangeshona,

²⁵ ntanda na shifwiko shayo sha mukati na shifwiko shayo sha ha munkanda na shifwiko sha shitembe sha shitutunga sha kunyuka shiwahe sha hayilu yayo, mu wumbo waku menginino,

²⁶ na miwumbo na nyimbwa za shipango shiya shazinguluka ntanda na kaala na miwumbo yaku menginino a shipango. Bakatenda milimo nimwayo yikushingiwa yaha byuma ebye.

²⁷ Ba Moshesha na Aloni nibo bakamona ngayi Bangeshona bakatenda milimo nimwayo na ku kulika byuma nimwabyo biya banabapaniki ba Aloni na bana bendi.

²⁸ Eye niyo milimo ya ba livumo lya Bangeshona mu ntanda ya shikungulukilo, pe mukakutwaminina ou mulimo ukenga Itama mwana mukankombela Aloni.”

Milimo ya Balevi ba livumo lya Melali

²⁹ Nyambi ya Ngula watongwezele Moshesha ngayi, “Laba livumo lya Melali mukati ka Balevi, balabe mu mavumo amashe namu mapashi wabo,

³⁰ kami ulabe balume nimwabo bali mukati ka myaka makumi ahatu na makumi mutanu, aba ba kutwesha kutenda mulimo mu ntanda ya shikungulukilo.

³¹ Bakekala na mulimo wakushimba maleenge na mikambo na bishimi na tupona twa ntanda,

³² na bishimi na tupona na zimpimpi na nyimbwa za shipango, shazingwilisha ntanda, twa kutendesha ha kuzikabyo. Muntu na muntu ukekala na mulimo waku kulika bingwalingwali banamutoyele.

³³ Ou ukenga mulimo wa livumo lya Melali mu ntanda ya shikungulukilo, pe mukakutwaminina ou mulimo ukenga Itama mwana mukankombela Aloni.”

Kulabiwa kwa Balevi

³⁴ Nohobene Moshesha na Aloni na bakakutwaminina makunge bakatukile kuya na kulaba Balevi mu mavumo a Kohati na Ngeshona na Melali na mavumo amashe namu mapashi,

³⁵ pe balabile balume nimwabo mukati ka myaka makumi ahatu na makumi mutanu, aba batweshele kutenda mulimo wa muntanda ya shikungulukilo.

³⁶ Pe balabile balume nimwabo ba livumo lya Kohati mukati ka myaka makumi ahatu kukuma ku ba myaka makumi mutanu, nimwabo balabiwile bengile 2,750.

³⁷ Aba nibo bantu balabiwile mu mapashi namu a Kohati aba batweshele kutenda mulimo mu Ntanda ya Shikungulukilo, aba Moshesha na Aloni balabile ngonehe Nyambi ya Ngula ambile kupitila muli Moshesha.

³⁸ Bana ba Ngeshona balabiwile mu mapashi na mu mavumo,

³⁹ Kwalabiwile balume ba myaka makumi ahatu kukuma naba myaka makumi mutanu aba batweshele kutenda mulimo wa muntanda ya shikungulukilo,

⁴⁰ bantu nimwabo mu mapashi na mu mavumo bengile 2,630.

⁴¹ Aba nibo bantu ba mapashi na mavumo a Ngeshona aba batweshele kutenda mulimo wa muntanda ya shikungulukilo aba Moshesha na Aloni balabile ngonehe Nyambi ya Ngula abalayelele.

⁴² Bantu nimwabo ba mapashi a bana ba Melali, balabiwile mu mapashi abo na mavumo wabo,

⁴³ kubalika bali na myaka makumi ahatu na myaka makumi mutanu, aba batweshele kutenda mulimo wa muntanda ya shikungulukilo,

⁴⁴ bantu nimwabo mu mapashi bengile 3,200.

⁴⁵ Aba nibo Moshesha na Aloni balabile ba mapashi na mavumo a Melali ngonehe Nyambi ya Ngula abalayelele.

⁴⁶ Balevi nimwabo balabiwile kuli ba Moshesha na Aloni naba bakakutwaminina ba Ishalela, balabiwile mu mapashi wabo na mu mavumo,

⁴⁷ kubalika ba myaka makumi ahatu kukuma ku ba myaka makumi mutanu, aba batweshele kutenda mulimo wa muntanda ya shikungulukilo,

⁴⁸ Obo balabiwile bengile 8,580.

⁴⁹ Ngonehe shiya Nyambi ya Ngula alayelele Moshesha, nisho abalabile, muntu na muntu kuya na mulimo wendi ou atweshele kutenda hinge waku kulika.