Kulaba 35 - Libuka Lya Kuyela

Minzi bapanikile kuli Balevi

¹ Nyambi ya Ngula wambile kuli Moshesha muyo mu zimbuwa za Mowambi mu nciza ya Yondana kuliyahikiza na Yeliko, ngayi,

² “Tongweza Baishalela ngayi ku likona ba kutambula ba ku fwanina kupanika Balevi minzi yimo mwakwikala na mabuyishilo amawahe anazinguluku minzi,

³ Minzi eye yikenga ya Balevi, pe nimo bakekalanga. Mabuyishilo akenga a zingombe na bimuna byabo nimwabo.

⁴ Mabuyishilo akabalika ha munkanda wa munzi na munzi wa kembi mamita 450.

⁵ Nohobene ngayi kukekale mbalila ya kwezekela hamo, mamita 900 kukuma ku yawo, hamo na munzi mukati.

⁶ Mukapanike Balevi minzi mutanu na umo ya kwitukila oku muntu akutwesha kupanzila ndi ukuziha minendi na mapuza. Bakapanike minzi yamina makumi anaa na yibili ya kufungilako

⁷ hamo na mabuyishilo. Minzi yikenga makumi anaa na mutanu na yihatu, hamo na mabuyishilo wayo.

⁸ Minzi nimwayo ya Balevi ku mushobo na mushobo wa Ishalela ukashingiwa kufwanikiza ku wunene wa litunga lyawo.”

Minzi ya Kwitukila

⁹ Nyambi ya Ngula watongwezele Moshesha ngayi,

¹⁰ “Tongweza bantu ba Ishalela ngayi, oho mukazabuka Mushinzi wa Yondana na kwingina mu litunga lya Kenaani,

¹¹ mwanga mukahate minzi ya kwitukila eye muntu akutwesha kupanzila ndi ukuziha minendi na mapuza.

¹² Kuyo niko bakamuholeka kumutinisha ku bawushinda wa mukakufwa aba bakushinga kubwesha wubi ku wubi. Muntu wakuziha mponde ku fwanina kuzihiwa kwakubula kuyatishiwa ku babengi ufwako.

¹³ Hatenu minzi mutanu na umo,

¹⁴ yihatu ku mushamuko wa Yondana na yihatu kami mu litunga lya Kenaani.

¹⁵ Eye minzi mutanu na umo yikenga minzi ya kwitukila ya Baishalela na mapukwenda na bayeni hinge kuzikililila. Muntu nimwendi ou ukuziha minendi na mapuza ukutwesha kupanzila ku munzi umo kukwayo.

¹⁶ “Hinge shingi noho, ndi muntu kakatendeshe shilwisho sha shondo hinge limanya, hinge shitondo, kuziha minendi, pe uli na mulandu wakuziha muntu wa mponde na kufunga, pe naye kami uku fwanina kuzihiwa.

¹⁷ Pe ndi wamupuha limanya, uya muntu ha kufwa, uli na mulandu wakuziha muntu wa mponde na kufunga, pe naye uku fwanina kuzihiwa.

¹⁸ Hinge ndi ukumukama na shitondo, pe na uya muntu akufwa, pe uya na mukama uli na mulandu wa mponde, pe naye kami uku fwanina kuzihiwa.

¹⁹ Kawushinda wa mufu waha mutima ukutwesha kuziha mukakupoonda. Oho akumuwana, uku fwanina kumuziha.

²⁰ “Ndi muntu akuzimba minendi ha kumunyakwila hanci pe ha kufwa, hinge kumuyaha shuma shimo kukwendi ha kufwa,

²¹ hinge kumukama na nkoni yendi ha kufwa, uli na mulandu wakuzila minendi wa mponde na kufunga pe ukuzihiwa. Kawushinda wa mufu waha mutima uli na ngovu za kuziha uya muntu waziha minendi. Oho akumuwana, uku fwanina ukumuziha.

²² “Ngoboni hamina muntu akuziha minendi, ou abula kuzimba na mapuza, hinge kumunyakwila hanci ha kufwa, hinge kumuyaha shuma shimo ha kufwa,

²³ hinge hamina muntu ukupuha limanya likuziha muntu umo ou abula ku mona, kami ou wabulile kwinga kamalamo wendi pe kami kaliha washingile ngayi amulemeke.

²⁴ Mu byambo ebye bya nahiyo, likunge likayata na kuyamiziza muntu ou unalete lufu ngoboni kaliha na kuyamiziza kawushinda wa mufu ou uli na kubweshela wubi ku wubi.

²⁵ Likunge likapulwisha muntu wakuziha minendi na mapuza ku kawushinda wa muntu wakufwa, pe bakamubwesha ku munzi wakwitukila kuya apanzilile. Uku fwanina kwikala kuyo hantu ha lufu lwa uyo Mukulwane wa bakankombela nimwabo ha shikati shiyo.

²⁶ Ndi muntu ou wawaniwa na mulandu wakuziha minendi na mapuza ukufuma mu munzi wakwitukila omu apanzilile,

²⁷ pe ndi kawushinda wa muntu wa kufwa ukumuwana ha kumuziha, ntendelo eye ya kubweshela wubi ku wubi kaliha ya mponde ya kufunga.

²⁸ Muntu unawaniwi na kuziha muntu na mapuza uku fwanina kwikala mu munzi wakwitukila hantu lufu lwa Mukulwane wa bakankombela nimwabo, ngoboni kubalika hayo akaboke kukwabo.

²⁹ Eze ndayano zikakundama naku bazukulyobe nimwabo oku mwize mukekale nimwako.

³⁰ Muntu ukuyatishiwa ha mulandu wa bya mponde ya kufunga ukuwaniwa na mulandu wakufwa ndele tuhu kuwaniwe bapaki bakakutontolola babili hinge kupitakana. Kutontolola kwa muntu umo kulingana kushumisha shambo shampoonde ya kufunga kufwako.

³¹ Mukakuziha uku fwanina kuzihiwa. Kutwesha kupanza ku mulandu owe ha kuyumba mali ufwako.

³² Hinga mwitabila muntu ou unatinini ku munzi wakwitukila kuyumba mali ngayi abokele kukwabo oho shilolo Mukulwane wa bakankombela nimwabo afwe.

³³ Ndi mukutenda eshe, mukabipisha litunga omu muli nakuzika. Kuvwisha mukeza kuku bipisha litunga. Kami kowa nzila ya kutenda shimbo sha kwambwililisha litunga oku kwavwililile mukeza wa muntu, ndele na mukeza wa muntu ou wakufwa ku mponde.

³⁴ Hinga muzilulula litunga omu muli na kwikala, ndaba Ami Nyambi ya Ngula nazika mukati ka bantu ba Ishalela.”