Kulaba 32 - Libuka Lya Kuyela

Mishobo ya bantu bali ku mushamuko wa Yondana

¹ Mishobo ya Lubena na Ngandi bekalile na matanga amanene a zingombe. Oho bamonene eshe lyafwanina litunga lya Yaza na Ngiliyande ku zingombe,

² pe bana ba Ngandi bayile kuli Moshesha na mukankombela Eliza na bakakutwaminina bamina ba likunge, niho bambile ngayi,

³ “Litunga elye Nyambi ya Ngula anayavwa Baishalela kulikoma mwekala minzi ya Ataloti na Ndimboni na Yaza na Nimila na Heshimboni na Eliyale na Shibamu na Nembo na Mbeyoni,

⁴ linengi litunga lyaliwahe ku zingombe, pe kami bakamilimo bobe bali na zingombe zazingi.

⁵ Hekulu tukulomba ngayi ndi unawahilili nanetu pe tupanike litunga elye kwinga likona lyetu, kami hinga tuzabuka Mushinzi wa Yondana ngayi tukazikemo.”

⁶ Moshesha wakumbwile bana ba Ngandi na bana ba Lubena ngayi, “Kati mukushinga kwikala kuno aha baminenu Baishalela bakuya ku nzita ndi?

⁷ Haya shumangani mukushinga kukwangisha bantu ba Ishalela kuzabuka Yondana kuya mu litunga elye abapanikile Nyambi ya Ngula?

⁸ Shiya nisho batendele batatizenu oho nabatumine ku Kandeshi Mbaneya mu kuhokela litunga.

⁹ Bayile, bakakuminine ku Mukulo wa Eshikolu, pe bamonene litunga ngoboni oho babokele bakwangishile bantu kwingina mu litunga elye abapanikile Nyambi ya Ngula.

¹⁰ Nyambi ya Ngula wakalihilile uya mutena pe wabezele ngayi,

¹¹ ‘Nikubeza ngayi ndaba aba bantu kaliha bekalile bakulunga kukwami, pe kowa hakati kabo uli na myaka makumi abili hinge kupitakana, aba bafumine ku Engepita bakengina mu litunga liya na kulupishile kuli Abulahama na Ishaki na Yakobo.

¹² Eshi shakundamine ku bantu nimwabo, ndele Kalembu mwana Yefuna Kakenezi na Yoshuwa mwana Nune, ndaba bengile bakulunga kuli Nyambi ya Ngula.’

¹³ Nyambi ya Ngula wapilamine na bantu ba Ishalela, pe waba yambanganishile mu libelelengwa myaka makumi anaa, hantu shihemunwino nimwasho shiya shamanine kufwa, shabulile kumuwahililisha.

¹⁴ Pe haya enu munashimbi mwanya wa batatizenu, shihemunwino shashipya sha bantu bababi banaliwahishi kuleta wukali wakubamba kami wa Nyambi ya Ngula ha Baishalela.

¹⁵ Ndi enu kami Bakalubena na Bakangandi mu kukana kumukonka hano, pe Nyambi ya Ngula ukashiya bantu aba nimwabo mu libelelengwa, pe mukekala na shihepwa ha kuloba kwabo.”

¹⁶ Bahenyenene kuli Moshesha pe bambile ngayi, “Twitabilishenu taha, tutende bipata bya mamanya bya kushinkila bambelele betu na minzi ya bipata ya lupashi lwetu.

¹⁷ Niho tukalishakashaka kuya ku ngunga hamo na baminetu Baishalela na kutwaminina nzita hantu tunaba kumishi na kubazikisha mu litunga liya likenga lyabo. Mu shikati osho lupashi lwetu bakatwesha kwikala kuno mu minzi ya twimbi, ku balamwina ku bantu ba litunga lino.

¹⁸ Kuboka ku minzi yetu tufwako hantu Baishalela nimwabo bamina banatambulu likona lya litunga ngonehi babenikilalyo.

¹⁹ Kukatambula likona lya wuheti wa mukati kabo hambalila yamina ya mu nciza ya Yondana tufwako, ndaba tunatambulu shitapilo shetu kuno ku mushamuko wa Yondana.”

²⁰ Moshesha wakumbwile ngayi, “Ndi mwa shikuma ebye munamba nibyo, pe haya kuno ku meho a Nyambi ya Ngula lishakashakenu kuya ku ngunga.

²¹ Balume benu nimwabo bakakupakata bilwisho bakazabuka Yondana, mukwendeshiwa kwa Nyambi ya Ngula, bakatanda bamalamo betu hantu nabapitakana,

²² na kutambula likona lya litunga. Nohoboni mukatweshe kuboka ndaba munashoboloko kuli Nyambi ya Ngula nakubaminenu Baishalela. Niho Nyambi ya Ngula ukamitongweza ngayi litunga elye lya ku mushamuko wa Yondana lyengakale lyenu.

²³ Ngoboni ndi kulama shikulupisho shenu mufwako, monenu mukenga baka kubipishila Nyambi ya Ngula. Hinga mu pocakana ha shuma eshe, muka shushuliwa ha wubi wenu. Pe anukenu ngayi wubi wenu ukamiwana.

²⁴ Nohobene tendenu minzi na bipata bya bambelele benu, pe kami mutende ebye mwakulupishile!”

²⁵ Bantu ba ku Ngandi na Lubena bambile kuli Moshesha ngayi, “Hekulu, tukutenda ngonehe eshe ukwamba.

²⁶ Bakazetu na banabetu na bimuna byetu na zingombe zetu na bambelele betu, bikashala kuno mu minzi ya Ngiliyande.

²⁷ Ngoboni etu nimwetu bakamilimo bobe tunalishakashakili kuya ku nzita mukwendeshiwa kwa Nyambi ya Ngula. Tukazabuka Yondana na kulwa ngonehe eshe munamba hekulu.”

²⁸ Nohobene Moshesha wapanikile ndayano eze kuli mukankombela Eliza na kuli Yoshuwa naku bakakutwaminina bamina ba Ishalela ngayi,

²⁹ “Ndi bantu ba Ngandi na Lubena bakazabuka Yondana na kulishakashaka ha bya ngunga ngonehe ku ndayano za Nyambi ya Ngula, kami ndi hamo na kuyavwa kwabo, himukutwesha kukoma litunga, niho bapanikenu litunga lya Ngiliyande kwinga likona lyabo.

³⁰ Ngoboni ndi kuzabuka Yondana na kuya mukati ka ngunga hamo nanenu bafwako, pe bakatambula shitapilo shabo sha likona mu litunga lya Kenaani ngonehe mukutenda enu.”

³¹ Bantu ba Ngandi na Lubena bakumbwile ngayi, “Hekulu, tukatenda ngonehe anamba Nyambi ya Ngula.

³² Tukazabukila mu nciza ya litunga lya Kenaani na kuya ku ngunga mukwendesha kwendi ngayi tukatweshe kutambula likona lyetu kuno ku mushamuko wa Yondana.”

³³ Nohobene Moshesha waketwililile ku mishobo ya Ngandi na Lubena na shitika sha mushobo wa Manashe mwana Yoshefwa litunga nimwalyo lya Mwene Shihoni wa Baamoli na Mwene Ongi waku Mbashani, kuyakako na minzi na litunga lina bazinguluku.

³⁴ Bazukulya Ngandi banatendululu minzi ya bipata yaku Ndimboni na Ataloti na Aloya,

³⁵ na Atiloti Shofwani na Yaza na Yongimbeha,

³⁶ na Mbeti Nimila na Mbeti Halani minzi yamu bipata batendele milaka ya bambelele babo.

³⁷ Bazukulya Lubena nibo batendulwile Heshimboni na Eliyale na Kiliyatayimu,

³⁸ na Nembo na Mbaalu Meyoni (awa mazina bawafutwile) na Shimbima. Batumbile awa mazina amapya ku minzi batendulwile.

³⁹ Livumo lya Makiya mwana Manashe lyakatukilile litunga lya Ngiliyande na kulitambula, pe batandilemo Baamoli aba bekalilemo.

⁴⁰ Nohobene Moshesha wapanikile Ngiliyande ku livumo lya Makiya, bazukulya Manashe pe nibo bazikilemo.

⁴¹ Yayila, wa mushobo wa Manashe, walwile na kukwata minzi yimo pe wayitumbile ngayi, “Minzi ya Yayila.”

⁴² Nombahi walwile pe wapukwile Kenati na minzi yawo, pe wawutumbile kami Nombahi nehe niyemwine.