Kulaba 31 - Libuka Lya Kuyela

Nzita ya kulwisha Mindiyani

¹ Nyambi ya Ngula wambile kuli Moshesha ngayi,

² “Shushula Bamindiyani hanebye batendele ku bantu ba Ishalela. Oho wamanishakale kubashushula, nohoboni ukafwe.”

³ Nohobene Moshesha wambile ku bantu ba Ishalela ngayi, “Lishakashakenu bya nzita, ngayi mukalwishe Mindiyani na kubashushula hanebye banatende kuli Nyambi ya Ngula.

⁴ Ku mushobo na mushobo nimwawo wa Ishalela tuma balume likulukazi limo ku nzita.”

⁵ Nohobene balume 1,000 bahatiwile ku mushobo na mushobo, bantu nimwabo bengile 12,000 balishakashakilile bya nzita.

⁶ Moshesha wabatumine ku nzita mukwendeshiwa kwa Fwinihashi mwana mukankombela Eliza, ou washimbile wukulwane wa byuma bya shizila na zimpandula za kupanikanga bilimukisho.

⁷ Balwishile Mindiyani ngonehe ambile Nyambi ya Ngula, kuli Moshesha pe bazihile balume nimwabo.

⁸ Bazihilile kumo na bamyene mutanu ba Mindiyani, ba Evi na Lekema na Zuli na Hula na Leba. Bazihile kami na Mbalaamu mwana Mbeyola.

⁹ Bantu ba Ishalela bakwatile bantapwa babakazi na batwanuke ba Bamindiyani, bashimbile zingombe zabo na matanga a bambelele. Bapukwile wuheti wabo nimwawo,

¹⁰ pe bahokeshele minzi yabo nimwayo na minkungwa yabo nimwayo.

¹¹ Bashimbile lipuku nimwalyo liya bapukwile, lya bantapwa na bimuna,

¹² babiletele kuli Moshesha na mukankombela Eliza naku likunge nimwalyo lya bantu ba Ishalela, aba bekalile ku munkungwa ha zimbuwa za Mowambi mu nciza ya Yondana kuliyahikiza na Yeliko.

Bakanzita ba kuboka

¹³ Moshesha na mukankombela Eliza na bakakutwaminina nimwabo ba likunge bafumine ku munkungwa mu ku shimbawila bakanzita.

¹⁴ Moshesha wakalihilile babilolo na bakulwane ba mihoko ya banzita na matanga anaba bafumine ku nzita.

¹⁵ Wabepwile ngayi, “Kati shumangani eshe munatentekele aba bambuyama ngayi bayoye?

¹⁶ Anukenu ngayi mbuyama nibo bakonkelenga kufundiziza kwa Mbalaamu pe batwamininine bantu ba Ishalela kwinga ba kulungwa kuli Nyambi ya Ngula ku Peyola. Biyo nibyo byaletele wulweli wakubula kutwesha kupangiwa.

¹⁷ Nohobene haya zihenu batwanuke nimwabo babalume, kami zihenu bambuyama nimwabo balala na balume.

¹⁸ Ngoboni yoyeshenu na kulikowezela bashimbi na bambuyama nimwabo batunkanga.

¹⁹ Haya nimwenu enu munazihi muntu hinge munakwata ha mutuntu wa muntu mu ku fwanina kwikala ha munkanda wa munkungwa ku matena mutanu na abili. Ha mutena wawuhatu na mutena wa mutanu na abili liyeleshenu nimwenu na bambuyama aba munapukulu.

²⁰ Mu ku fwanina kami kuyelesha kantabwila ka likwiza na byuma nimwabyo byatendiwa na shitembe sha kunyuka na bya wushako wa mpongo, hinge bya shitondo.”

²¹ Mukankombela Eliza wambile ku balume aba bafumine ku nzita ngayi, “Eze nizo ndayano ziya Nyambi ya Ngula anapaniki kuli Moshesha.

²² Byuma nimwabyo biya bya kubula kuhoka, bya kwinga ngonehe, ngolinde na shiliva na lubemba, shondo na shiwalawala, hinge shondo sha loto,

²³ bikwinga bya kuyeleshiwa na kubipitisha ha mundilo. Byuma nimwabyo byamina bikayeleshiwa na mema akuyelulwisha.

²⁴ Ha mutena wa mutanu na abili mu ku fwanina kuyowesha bivwalo byenu, niho mukenge ba kuyela pe niho muketabilishiwe kwingina mu munkungwa.”

Bitapilo bya lipuku

²⁵ Nyambi ya Ngula wambile kuli Moshesha ngayi,

²⁶ “Obe na mukankombela Eliza, hamo na bakakutwaminina bamina ba ku likunge balabe byuma nimwabyo biya bya pukuliwa, ku yakaho na bantapwa na bimuna.

²⁷ Tapa ebye byakashimbiwa mulwapanda lwa kwezekela hamo, shimo ku banzita pe shimina ku bantu nimwabo.

²⁸ Ku shitapilo shiya shikwinga sha bakanzita, tolenuho umo ku bantapwa ba myanda mutanu kwinga mutelo wakuli Nyambi ya Ngula, tolenuho kami naku zingombe na bambongolo naku bambelele naku bampongo.

²⁹ Bipanenu kuli mukankombela Eliza kwinga shitapilo sha mukungwila kuli Nyambi ya Ngula.

³⁰ Ku shitapilo shinapanikiwi ku wingi wa bantu ba Ishalela, shimbaho umo ha bantapwa makumi mutanu, pe tolenu noho kami na shitapilo shimo sha zingombe na sha bambongolo na bambelele na bampongo. Bipanikenu kuli Balevi aba bali na kulama ntanda ya shikungulukilo.”

³¹ Moshesha na mukankombela Eliza batendele ebye Nyambi ya Ngula abatongwezele.

³² Owe niwo muhoko wa byuma biya byashalileko kubiya bapukwile na bakanzita, mu kufungila kunebye balikowezelele nibo bamwine bengile 675,000 bambelele na bampongo,

³³ kami zingombe zengile 72,000,

³⁴ bambongolo bengile 61,000.

³⁵ Batunkanga bengile 32,000 aba babula kulangana na mulume.

³⁶ Shitapilo sha bakanzita shengile 337,500 bambelele naba mpongo,

³⁷ kami mutelo wakuli Nyambi ya Ngula wengile 675 bambelele na bampongo,

³⁸ shitapilo sha bakanzita shengile 36,000 zingombe, kami mutelo wakuli Nyambi ya Ngula wengile zingombe 72.

³⁹ Shitapilo sha bakanzita sha bambongolo bengile 30, 500 kami mutelo wakuli Nyambi ya Ngula shengile bambishi 61

⁴⁰ na batunkanga baya babulile kulala na balume bengile 16,000, kami mutelo wakuli Nyambi ya Ngula bengile batunkanga 32.

⁴¹ Nohobene Moshesha wa panikile mukankombela Eliza owe mutelo kwinga mukungwila wawunene kuli Nyambi ya Ngula, ngonehe amutongwezele.

⁴² Shitapilo sha bantu ba Ishalela shengile ngo kami nehi shiya sha bakanzita.

⁴³ Shitapilo sha likunge shengile bakanzita, 337,500, bambelele na bampongo,

⁴⁴ pe shitapilo sha zingombe shengile 36,000,

⁴⁵ na bambongolo bengile 30,500,

⁴⁶ na batunkanga bengile 16,000.

⁴⁷ Kufuma ku shitapilo eshe Moshesha washimbile umo ku bantapwa ba makumi mutanu na bimuna kami, ngonehe amutongwezele Nyambi ya Ngula ngayi ukabipanike ku Balevi, aba bekala na kulama ku Ntanda ya Shikungulukilo.

⁴⁸ Niho babilolo aba bendeshelenga bakanzita bayile kuli Moshesha,

⁴⁹ pe bashimikile ngayi, “Hekulu, tunalaba bakanzita bali mu maboko wetu pe kowa umo kukwabo unabuluho.

⁵⁰ Nohobene tuli na kuleta ntupu ya bya kuyenga bya ngolinde na makaya aha mikoko na makaya aku maboko na tumbalaminwe na tunkunda twa ku matu na mikali yiya twashimba nimwetu. Tukupanika kuli Nyambi ya Ngula kwinga bya kuyumba ha wumi wetu.”

⁵¹ Moshesha na mukankombela Eliza batambwile ngolinde, wingi wabyo byengile bya kuliyenga.

⁵² Mukungwila nimwawo wa babilolo wengile makilongilamu 200.

⁵³ Obo babulile kwinga babilolo balamine bya lipuku ebye bashimbile.

⁵⁴ Nohobene Moshesha na mukankombela Eliza batwalile ngolinde ku Ntanda ya Shikungulukilo, nohobene mwanga alame bantu ba Ishalela.