Kulaba 30 - Libuka Lya Kuyela

Ndayano zaha Mbeza

¹ Moshesha wambile kubakakutwaminina ba mishobo ya Ishalela ngayi,

² “Oho muntu akulibeza lubeza lwa kupanika shuma shimo kuli Nyambi ya Ngula hinge lwa kulizilika ku shuma shimo kaliha wafwanina kukiluka shikulupisho shendi ngoboni uku fwanina kutenda shuma nimwasho shiya atoya ngayi ukushitenda.

³ “Oho kankanga ushili kwikala mu litala lya tatiyendi, ha kulibeza lubeza lwa kupanika shuma shimo kuli Nyambi ya Ngula, hinge kukulupisha, hinge kulizilika ku shuma shimo,

⁴ uku fwanina kutenda shuma nimwasho shiya alibezele hinge a kulupishile, ndele tatiyendi amukanine oho akuyuvwalwo.

⁵ Ngoboni ndi tatiyendi ukumukanisha kutenda shikulupisho oho akubiyuvwa, kaliha ku kushingiwa kululama. Nyambi ya Ngula ukamuyatila, ndaba tatiyendi unakana kumwitabila kululama.

⁶ “Ndi mbuyama ukulibeza oho shilolo ayekiwe, kampe na kufunga na mutima hinge na lihaza, hinge shikulupisho sha kulizilikila ku shuma shimo, pe nohoboni akuyekiwa,

⁷ uku fwanina kutenda shuma nimwasho shiya abezele hinge shiya a kulupishile, ndele mukokwendi amukanine oho akuyuvwalwo.

⁸ Ngoboni ndi mukokwendi ukumukanisha kutenda shikulupisho oho akuyuvwalwo, kaliha uku fwanina kululama. Nyambi ya Ngula ukamuyatila.

⁹ “Mfwile hinge mukazi wakulubula uku fwanina kulama lubeza olwe akubeza na shikulupisho nimwasho sha kulizilika ku shuma shimo.

¹⁰ “Ndi mbuyama wakuyekiwa ukubeza lubeza, hinge bikulupisho bya kulizilika ku shuma shimo,

¹¹ uku fwanina kutenda shuma nimwasho shiya alibezele hinge a kulupishile, ndele mukokwendi amukanine oho akuyuvwalwo kaliha wafwanina kulibezulula.

¹² Ngoboni ndi mukokwendi wamukanisha ku kulupisha ha kuyuvwabyo ku fwanina kulamalwo ufwako. Nyambi ya Ngula ukamuyatila, ndaba mukokwendi wamubibiza kululama lubeza lwendi.

¹³ Mukokwendi uli na ngovu za kushumisha hinge za kubezulula lubeza nimwalwo hinge shikulupisho shiya a kulupishile.

¹⁴ “Ngoboni ndi ha mutena uya oho wayuvwakale bya lubeza mulume uku mwena, mbuyama uku fwanina kutenda byuma nimwabyo biya alibeza nabyo hinge akulupisha. Unashumishi lubeza ha kubula kwamba ha mutena uya ayuvwile lubeza.

¹⁵ Ngoboni ndi ha kupita matena mukokwendi ha kukwanga kubezulula lubeza, uku fwanina kulileyekamo niyemwine ndaba wa kwangisha mukazendi kubezulula lubeza.”

¹⁶ Eze nizo ndayano Nyambi ya Ngula ambile kuli Moshesha ha mbeza zabeziwile ku mbuyama wakubula kuyekiwa wakwikala mu litala lya tatiyendi, hinge mbuyama wakuyekiwa.