Kulaba 3 - Libuka Lya Kuyela

Bana ba Aloni

¹ Aba nibo ba lupashi lwa Aloni na Moshesha ha shikati shiya Nyambi ya Ngula ambile na Moshesha ku Lipili lya Shinayi.

² Aloni wekalile na bana babalume banaa. Bengile ba Nandabi niye wengile wa mukulwane na Ambihu na Eliza na Itama.

³ Aba bana ba Aloni bawabishiwile na kufunguliwa kwinga bakankombela.

⁴ Ngoboni Nandabi na Ambihu bazihiwile oho batupwile ntupu ya mundilo ya kubula ku fwanina kuli Nyambi ya Ngula mu Libelelengwa lya Shinayi. Babulile kwikala na bana, nohobene Eliza na Itama batendelenga mulimo wa mukankombela ha shikati sha kuyoya kwa Aloni.

Balevi bakwimikiwa kwinga bakankombela

⁵ Nyambi ya Ngula wambile kuli Moshesha ngayi,

⁶ “Leta mushobo wa Balevi kumbili, pe ubemike kwinga baka kuyavwa Aloni mukankombela.

⁷ Bakatenda mulimo ukushingiwa ku Ntanda ya Shikungulukilo na kutenda milimo ya kuyavwa bakankombela naya likunge nimwalyo.

⁸ Bakatilaminanga bingwalingwali nimwabyo bya ntanda na kutenda byamina bya Baishalela nimwabo.

⁹ Mulimo tuhu wawunene bali nawo Balevi wenga wakuyavwa Aloni na bana bendi.

¹⁰ Aloni na bana bendi ukabemika kwendesha mulimo nimwawo wa mukankombela, muntu nimwendi washenge ou wakwezeka kutenda noho ukazihiwa.”

¹¹ Nyambi ya Ngula wambile kuli Moshesha ngayi,

¹² “Balevi wuluno haya bengakale bami. Oho nazihile bamyeli nimwabo ba Baengepita nazilikile mweli wa mulume ku lupashi lwa Kaishalela na Kaishalela naku mweli wa shimuna na shimuna.

¹³ Ngoboni haya shiya nashinga ngayi nishimbe bamyeli babalume ba Baishalela mu Engepita ngayi benge bami nashimbiho Balevi, nibo bakenga bami. Ami nengi Nyambi ya Ngula.”

Kulabiwa kwa Balevi

¹⁴ Nyambi ya Ngula watongwezele Moshesha mu Libelelengwa lya Shinayi ngayi,

¹⁵ “Laba Balevi babalume nimwabo mu mavumo wabo namu mapashi kubalika wa ngonda umo hinge kupitakana oho.”

¹⁶ Pe Moshesha watendele noho.

¹⁷ Levi wekalile na bana bahatu babalume nibo bengile Ngeshona na Kohati na Melali,

¹⁸ awa niwo mazina a bana ba Ngeshona mu mapashi awo, limbini na Shimeyi.

¹⁹ Kohati wekalile na bana banaa babalume, bengile Amalama na Iza na Hembuloni na Uziyelu.

²⁰ Na Melali kami wekalile na bana babili bengile Mahili na Mushi. Obo bengile balevi bankaka za ba lupashi baya banatumbiwi na mazina wabo.

²¹ Livumo lya Ngeshona nimo mwatutikile mapashi aba Limbini na Shimeyi.

²² Bana babalume nimwabo ba ngonda yimo kukuhemuwa hinge kupitakana oho baya batikitiwile, bengile 7,500.

²³ Elye livumo lya Bangeshona lyatulilile ku mbalila yaku mponci ku mazezelo a ntanda,

²⁴ na Eliyashafwi mwana Layele wa mulume wengile mukulwane wa livumo lya Bangeshona.

²⁵ Pe mulimo bekalile nawo bana ba Ngeshona mu shikungulukilo wengile wakulama ntanda hamo na shifwiko shayo sha mukati na shifwiko shayo shaha munkanda na mu wumbo waku shipana,

²⁶ na mu wumbo waku shipango sha kuzingwilisha ntanda na kaala na mu wumbo waku shipana sha shipango. Bekalile na mulimo nimwawo wakukundama ku bingwalingwali ebye.

²⁷ Livumo lya Kohati nimo mwatutikile mapashi aba Amalama na Iza na Hembuloni na Uziyela.

²⁸ Bana babalume nimwabo balabiwile ba ngonda yimo hinge kupitakana oho baya batikitiwile bengile 8,600.

²⁹ Elye livumo lyatulilile ku mbalila yaku mabukubuku a ntanda,

³⁰ na Elizafwani mwana Uziyelu wengile mukulwane wa livumo.

³¹ Bekalile na mulimo wakulama Likwati lya Kulimama kwa Nyambi ya Ngula na tebulu na lyeyeko lya zimuni na tuula na bya kukwatila ebye batendeshanga bakankombela mu mwanya wa kuyela na shibaamba sha ku shipana sha ku mwanya wa kuyela shikuma. Bekalile na ngovu habya mulimo wa bingwalingwali ebye.

³² Eliza mwana mukankombela Aloni, niye mukulwane bantwamina ba balevi. Wengile mukakwendesha obo batendelenga milimo mu mwanya wakuzila.

³³ Mu livumo lya Melali nimo mwatutikile mapashi aba Mahili na Mushi.

³⁴ Bana babalume nimwabo ba ngonda yimo hinge kupitakana oho, baya balabiwile bengile 6,200.

³⁵ Pe wengile ntwamina wa livumo elye wengile Zuliyele mwana Ambihayile. Elye livumo lyatulilile ku mbalila yaku ncelele ya ntanda.

³⁶ Bahatiwile kwikala na mulimo ha maleenge a ntanda na mbangilo zayo na bishimi byayo na tupona na tukunzu twayo nimwato na mulimo nimwawo wakukundama ku bingwalingwali ebye.

³⁷ Bekalile kami na mulimo ha bishimi na tupona na zimpimpi na nyimbwa zaha munkanda wa shipango.

³⁸ Moshesha hamo na Aloni na bana bendi batulilile ku mbalila yaku mushamuko kumbili ya ntanda. Bekalile na mulimo wakwendesha mulimo wakutendela bantu ba Ishalela mu mwanya wakuzila. Muntu washenge ou wezekele kutenda noho wafwaninine kuzihiwa.

³⁹ Bana nimwabo ba Balevi babalume ba ngonda yimo hinge kupitakana, baya Moshesha na Aloni balabile mu mavumo, ha kulayelela kwa Nyambi ya Ngula bengile 22,000.

Balevi ba kuhinga mu mwanya wa bamyeli babalume

⁴⁰ Nyambi ya Ngula wambile kuli Moshesha ngayi, “Bana ba bamyeli babalume nimwabo ba Baishalela bakwinga bami. Nohobene laba bana ba bamyeli nimwabo ba Baishalela, ba ngonda yimo ha kutoya mazina wabo.

⁴¹ Ngoboni mu mwanya wabo nashimbiko Balevi nimwabo kwinga bami. Ami Nyambi ya Ngula. Nashimbiko kami bimuna bya Balevi kwinga byami mu mwanya wa bamyeli nimwabo babimuna ba bantu ba Ishalela.”

⁴² Moshesha wombatalile pe walabile bamyeli nimwabo babalume

⁴³ ba ngonda yimo hinge kupitakana oho, nimwabo bengile 22,273.

⁴⁴ Nyambi ya Ngula wambile kuli Moshesha ngayi,

⁴⁵ “Haya mfungwile Balevi kwinga bami mu mwanya wa bana ba bamyeli babalume nimwabo ba Baishalela, pe mfungwile kami babimuna nimwabo ba Balevi kwinga bami mu mwanya wa bimuna bakutatika kuhemuwa ba Baishalela. Ami Nyambi ya Ngula.

⁴⁶ Ha kuwana ngayi ha kulaba bamyeli babalume ba Baishalela bapitakanine Balevi na bantu 273, uku fwanina kukuliza bana babalume bayo banahumukuko.

⁴⁷ Ha umo na umo, yumba muwayawaya mutanu wa shiliva, ngonehe ndando yalandiwanga yaku ntanda yashizila,

⁴⁸ pe, upane mali awa kuli Aloni na bana bendi.”

⁴⁹ Moshesha wombatalile, pe washimbile

⁵⁰ mali a kukuliza a muwayawaya a shiliva 1,365 ngonehe ndando yalandiwanga yaku ntanda ya shizila,

⁵¹ pe wa wapanine kuli Aloni na bana bendi, kuya mazu awa Nyambi ya Ngula, alayelele Moshesha.