Kulaba 29 - Libuka Lya Kuyela

Zintupu zaha shimbo sha ha mwaka wawupya

¹ Ha mutena wakutatika wa ngonda ya mutanu na abili mukekala na shikungulukilo sha kuyela sha kulemesha, kami kowa mulimo mukafwanina kutenda. Ha mutena uyo mukashiba zimpandula

² Kombelelenu nkombela ya kuhokesha ya livumba lyaliwahe lya ku wahililisha Nyambi ya Ngula. Nkombela eye yikwinga mwana nkunzi umo na shikungwe umo wambelele na bana babikungwe bambelele mutanu na babili ba mwaka umo, nimwabo bakubula nyanco.

³ Tupulenu ntupu ya yayiwahe ya mpeka ya muhunga wakuvuba na mazi a olive. Muhunga wa makilongilamu ahatu hamo na nkunzi na muhunga wa makilongilamu abili hamo na shikungwe wambelele,

⁴ kami na muhunga wa kilo imo ha mbelele na mbelele.

⁵ Kombelelenu kami shikungwe wa mpongo umo kwinga ntupu ya ha wubi, kami mu nzila eye mutende shiheka sha kwambwililisha bantu.

⁶ Kombelelenu ebye mu kufungila ku nkombela ya kuhokesha ya kubula kukatala yaha mutena wakukatala wa ngonda, hamo na ntupu yayo ya mpeka na ntupu ya waine. Eze zintupu za byakulya zikwinga za livumba lya kuwahililisha Nyambi ya Ngula.

Zinkombela zaha Mutena Wakulyambwilila

⁷ Ha mutena wa likumi wa ngonda ya mutanu na zibili mukekala na shikungulukilo sha kuyela pe mukazile kulya, kami hinga mukatenda mulimo.

⁸ Mukakombelela nkombela ya kuhokesha kuli Nyambi ya Ngula, livumba lyayo likamuwahililishe. Nkombela eye yikwinga mwana nkunzi umo na shikungwe wa mbelele umo na bana babikungwe ba bambelele mutanu na babili ba mwaka umo, bakenge bakubula nyanco.

⁹ Mukatupule zinkombela za mpeka hamo na zinkombela eze nimwazo, tupulenu muhunga wangongo wakuvuba na mazi a olive. Wa makilongilamu ahatu hamo na nkunzi na muhunga wa makilongilamu abili hamo na shikungwe wambelele,

¹⁰ na muhunga wa kilo yimo ha mwana mbelele na mwana mbelele.

¹¹ Mukakombelele kami shikungwe wa mpongo umo kwinga ntupu ya ha wubi, mu kufungila ku mpongo wakombeleliwanga ku shimbo sha kwambwililisha bantu na nkombela yakuhokesha yaha mutena ha mutena, hamo na nkombela yayo ya mpeka na nkombela ya waine.

Zinkombela zaha shimbo sha minkungwa

¹² Ha mutena wawulikumi na mutanu wa ngonda ya mutanu na zibili mukekala na shikungulukilo sha kuyela sha kulemesha Nyambi ya Ngula. Mukapinga shimbo eshe ha matena mutanu na abili kuli Nyambi ya Ngula kami hinga mukatenda mulimo.

¹³ Ha mutena ou wakutatika, mukakombelela kuli Nyambi ya Ngula nkombela ya kuhokesha ya byakulya, pe livumba lyayo likawahililisha Nyambi ya Ngula. Nkombela eye yikwinga ya bana ba bankunzi likumi na bahatu na bikungwe babili ba bambelele na bana ba bambelele babikungwe likumi na banaa ba mwaka umo, bakenga bakubula nyanco.

¹⁴ Mukatupule zinkombela za mpeka ya muhunga wawuwahe wa kuvuba na mazi a olive. Mukatupule muhunga wa makilongilamu ahatu ha nkunzi na nkunzi na muhunga wa makilongilamu abili ha shikungwe na shikungwe wa mbelele,

¹⁵ kami na muhunga wa kilo yimo ha mwana mbelele na mwana mbelele na ntupu yayo ya waine.

¹⁶ Mukakombelele kami shikungwe wa mpongo umo kwinga ntupu ya ha wubi. Mukakombelela ebye mu kufungila na nkombela ya kuhokesha yaha mutena ha mutena, hamo na ntupu yayo ya mpeka na ntupu yayo ya waine.

¹⁷ Ha mutena wawubili, mukakombelela bana ba bankunzi likumi na babili na bikungwe babili ba bambelele na bana ba bambelele babikungwe likumi na banaa ba mwaka umo, nimwabo bakenge bakubula nyanco.

¹⁸ Mukakombelele na zintupu zabo za mpeka naza waine, hamo na bankunzi na bikungwe ba bambelele babikungwe bakwezeka mu wingi wabo ngonehe kwalayiwile.

¹⁹ Mukakombelele kami shikungwe umo wa mpongo kwinga ntupu ya ha wubi, kufungila ku ntupu yayo ya mpeka na ntupu yayo ya waine.

²⁰ Ha mutena wawuhatu mukakombelele bana ba bankunzi likumi na umo na bikungwe babili, ba bambelele na bana babambelele babalume likumi na banaa ba mwaka umo, bakenge bakubula nyanco.

²¹ Mukakombelele hamo na zinkombela zabo na bankunzi na bikungwe ba bambelele na bana ba bambelele babikungwe kwezeka mu wingi wabo ngonehe kwalayiwile.

²² Mukakombelela kami shikungwe umo wa mpongo kwinga ntupu ya ha wubi, kufungila ku nkombela yakuhokesha yaha mutena ha mutena, hamo na nkombela yayo ya mpeka na nkombela yayo ya waine.

²³ Ha mutena wa wunaa, mukakombelela bana ba bankunzi likumi na bikungwe babili ba bambelele na bana bambelele babikungwe likumi na banaa ba mwaka umo, bakenge bakubula nyanco.

²⁴ Mukakombelela hamo na zintupu zabo za mpeka naza waine, hamo na bankunzi na bikungwe ba bambelele na bana ba bambelele babikungwe, kwezeka mu wingi wabo ngonehe kwalayiwile.

²⁵ Mukakombelela kami shikungwe umo wa mpongo kwinga ntupu ya ha wubi, kufungila ku nkombela yakuhokesha yaha mutena ha mutena, hamo na nkombela yayo ya mpeka na nkombela yayo ya waine.

²⁶ Ha mutena wa mutanu, mukakombelele bana ba bankunzi mutanu na banaa na bikungwe babili ba bambelele na bana ba bambelele babikungwe likumi na banaa ba mwaka umo, bakenge bakubula nyanco.

²⁷ Mukakombelele hamo na zintupu zabo za mpeka naza waine, hamo na bankunzi na bikungwe ba bambelele na bana ba bambelele babikungwe bakwezeka mu wingi wabo ngonehe kwalayiwile.

²⁸ Mukakombelele kami shikungwe umo wa mpongo kwinga ntupu ya ha wubi, kufungila ku nkombela yakuhokesha yaha mutena ha mutena, hamo na nkombela yayo ya mpeka na nkombela yayo ya waine.

²⁹ Ha mutena wa mutanu na umo, mukakombelele bana ba bankunzi mutanu na bahatu na bikungwe babili ba bambelele na bambelele babikungwe likumi na banaa ba mwaka umo, bakenge bakubula nyanco.

³⁰ Mukakombelele hamo na zintupu zabo za mpeka naza waine, hamo na bankunzi na bikungwe ba bambelele na bana ba bambelele babikungwe, bakwezeka mu wingi wabo ngonehe kwalayiwile

³¹ Mukakombelele kami shikungwe umo wa mpongo kwinga ntupu ya ha wubi, kufungila ku nkombela yakuhokesha yaha mutena ha mutena, hamo na nkombela yayo ya mpeka na nkombela yayo ya waine.

³² Ha mutena wa mutanu na abili, mukakombelele bana ba bankunzi mutanu na babili na bikungwe babili ba bambelele na bana bambelele babikungwe likumi na banaa ba mwaka umo, bakenge bakubula nyanco.

³³ Mukakombelele hamo na zintupu zabo za mpeka naza waine, hamo na bikungwe ba bambelele na bana ba bambelele babikungwe, bakwezeka mu wingi ngonehe kwalayiwile.

³⁴ Mukakombelele kami shikungwe umo wa mpongo kwinga ntupu ya ha wubi, kufungila ku nkombela yakuhokesha yaha mutena ha mutena, hamo na nkombela yayo ya mpeka na nkombela yayo ya waine.

³⁵ Ha mutena wa mutanu na ahatu, mukekala na shikungulukilo sha kuyela sha kulemesha, pe hinga mukatenda mulimo.

³⁶ Ngoboni mukakombelele nkombela ya kuhokesha kwinga nkombela ya byakulya na mundilo kuli Nyambi ya Ngula. Livumba lyalyo likuwahililisha Nyambi ya Ngula. Eye nkombela yikenga nkunzi umo na shikungwe umo wambelele na bana bambelele babikungwe mutanu na babili ba mwaka umo, bakenge bakubula nyanco.

³⁷ Mukakombelele hamo na zintupu zabo za mpeka naza waine hamo na bankunzi na bikungwe ba bambelele na bana bambelele babikungwe, bakwezeka mu wingi ngonehe kwalayiwile.

³⁸ Mukakombelele kami shikungwe umo wa mpongo kwinga ntupu ya ha wubi, kufungila ku nkombela yakuhokesha yaha mutena ha mutena, hamo na nkombela yayo ya mpeka na nkombela yayo ya waine.

³⁹ Eze nizo ndayano zaha zinkombela za kuhokesha na zinkombela za mpeka na zinkombela za waine na zinkombela za kulilumikila, ziya mukakombelela kuli Nyambi ya Ngula ku bimbo byenu bya kwimikiwa. Eze zikufungiliwa ku zinkombela ziya mu kukombelela mu kuhahulula luhaho hinge zintupu za kupana na kufunga.

⁴⁰ Nohobene Moshesha watongwezele bantu ba Ishalela byuma nimwabyo biya amutongwezele Nyambi ya Ngula.