Kulaba 28 - Libuka Lya Kuyela

Ntupu ya ha Mutena ha Mutena

¹ Nyambi ya Ngula watongwezele Moshesha ngayi,

² “Ambila Baishalela, pe ubatongweze ngayi, ‘Bakombelele zintupu zami za byakulya byami bya kutupula ha mundilo. Livumba lya ku zintupu eze likungwahililisha shikuma, kakeyenu ngayi mukazitupule kukwami ha bikati byabyo.”

³ “Pe zinkombela eze za byakulya ziya zikakombeleliwa kuli Nyambi ya Ngula, ya kukombelela na mundilo yaha mutena ha mutena, zikenga bana babikungwe ba bambelele babili ba mwaka umo bakubula nyanco, kwinga nkombela yaha mutena ha mutena ya kubula kukatala.

⁴ Kakombelele mbelele wakutatika ku lumenemene na wawubili ku mazolo,

⁵ ku umo na umo kombelela hamo na ntupu ya mpeka ya muhunga wa kilo imo wakuvuba na lita imo ya mazi a olive akuyengula.

⁶ Eye niyo nkombela yakuhokesha yiya yaha mutena ha mutena, ya kubula kukatala yiya yatatikile kukombeleliwa ku Lipili lya Shinayi, kwinga nkombela ya byakulya ya kukombelela na mundilo kuli Nyambi ya Ngula. Livumba lya nkombela eye yikungwahililisha.

⁷ Nehe boni nkombela ya waine hamo na mbelele wakutatika, yitila lita imo ya waine.

⁸ Ku mazolo kombelela mbelele wawubili mu nzila yimo nehe nkombela ya lumenemene hamo na ntupu ya waine. Niyo kami yinengi ntupu ya byakulya. Livumba lya neye nkombela likuwahililisha Nyambi ya Ngula.”

Nkombela ya Mutena Wakukatala

⁹ Ha Mutena Wakukatala kombelela bambelele babili ba mwaka umo bakubula nyanco, hamo na makilongilamu abili a muhunga wakuvuba na mazi a olive kwinga ntupu ya mpeka na nkombela ya waine.

¹⁰ Eye nkombela yakuhokesha yikwinga yakukombeleliwa ha matena aku katala, mu kufungila na nkombela yaha mutena ha mutena, hamo na nkombela yayo ya waine.

Nkombela yaha Mutena Wakutatika wa Ngonda

¹¹ Leta nkombela ya kuhokesha kuli Nyambi ya Ngula ha kutatika kwa ngonda na ngonda. Nkombela eye yikwinga bana ba bankunzi babili na shikungwe umo wambelele na babikungwe ba bambelele mutanu na babili ba mwaka umo, nimwabo bakubula nyanco.

¹² Nkombela ya mpeka, nkombela ya muhunga wakuvuba na mazi a olive kwinga ntupu ya mpeka. Ha nkunzi na nkunzi, kombelela muhunga wa makilongilamu ahatu a muhunga, kami hamo na shikungwe wambelele, kombelela muhunga wa makilo abili.

¹³ Hamo mwanambelele na mwanambelele, tupula muhunga wa kilo imo. Eze zinkombela za kuhokesha zinengi zinkombela za byakulya zalivumba lya kuwahililisha Nyambi ya Ngula.

¹⁴ Nkombela ya kufwaninina ya malita abili a waine hamo na nkunzi na nkunzi na lita imo na shitika, hamo na shikungwe wa mbelele na lita imo ha mbelele na mbelele. Eze zinengi ndayano za nkombela yakuhokesha za mutena wakutatika wa ngonda na ngonda mukati ka mwaka.

¹⁵ Kami kufungilako ku nkombela yakuhokesha hamo na nkombela yayo ya waine, yaha mutena ha mutena kombelela shikungwe wa mpongo umo kwinga ntupu ya ha wubi.

Zinkombela za ku Shimbo sha Mankende A kubula Mumena

¹⁶ Shimbo sha kupitilila sha kulemeeka Nyambi ya Ngula shikatendiwenga ha mutena wa likumi na kanaa wa ngonda wakutatika.

¹⁷ Ha mutena wawulikumi na mutanu mukapinga shimbo sha matena mutanu na abili. Pe mukalya tuhu mankende akuvuba a kubula mumena.

¹⁸ Ha mutena wakutatika wa shimbo eshe mukekala na shikungulukilo sha kuliyelesha kami kowa mulimo ukatendiwa.

¹⁹ Mukakombelela nkombela ya kuhokesha na mundilo kwinga nkombela ya byakulya kuli Nyambi ya Ngula. Nkombela eye yikwinga bana ba bankunzi babili na shikungwe umo wa mbelele na bana babikungwe ba bambelele mutanu na babili ba mwaka umo, benge bakubula nyanco.

²⁰ Mukatupula zinkombela za mpeka hamo na zintupu eze nimwazo, muhunga wa ngongo wakuvuba hamo na mazi a olive. Tupulenu muhunga wa makilongilamu ahatu hamo nkunzi na nkunzi na muhunga wa makilongilamu abili hamo na shikungwe wa mbelele,

²¹ Mukakombelela nkombela wa kilo imo ha mbelele na mbelele.

²² Mukakombelela kami shikungwe wa mpongo umo kwinga ntupu ya ha wubi, pe mu nzila eye tendenu shimbo sha kwambwililisha bantu ku wubi wabo.

²³ Mukakombelela ebye mu kufungila ku nkombela yakuhokesha ya kubula kukatala yaha lumenemene na lumenemene.

²⁴ Mu nzila yimo, ku matena mutanu na abili mukakombelela kuli Nyambi ya Ngula nkombela ya byakulya yakuhokesha na mundilo. Livumba lyaliwahe lya nkombela eye likawahililisha Nyambi ya Ngula. Mukakombelela eye mu kufungila ku nkombela ya kuhokesha yaha mutena ha mutena na nkombela yayo ya waine.

²⁵ Pe ha mutena wa mutanu na abili mukekala na shikungulukilo sha kuyela sha kuliyelesha, kami kowa mulimo mu ku fwanina kutenda.

Zinkombela zaha Shimbo sha Kuteza

²⁶ Ha mutena wakutatika wa Shimbo sha kutatika kuteza, oho mukaleta ntupu ya byakulya byabipya kuli Nyambi ya Ngula, mukakunguluka mu kulemesha kami kowa mulimo mu ku fwanina kutenda.

²⁷ Kombelelenu nkombela yakuhokesha ya livumba lya kuwahililisha Nyambi ya Ngula. Nkombela eyi yikwinga bana ba bankunzi babili na shikungwe umo wa mbelele na babikungwe ba bambelele mutanu na babili ba mwaka umo, nimwabo bakubula nyanco.

²⁸ Tupulenu ntupu yayiwahe ya mpeka, ya muhunga wakuvuba na mazi a olive. Tupulenu muhunga wa makilongilamu ahatu hamo na nkunzi na muhunga wa makilongilamu abili hamo na shikungwe wa mbelele,

²⁹ kami muhunga wa kilo yimo ha mbelele na mbelele.

³⁰ Kami kombelelenu shikungwe sha mpongo umo kwinga ntupu ya ha wubi, pe mu nzila eye tendenu shiheka sha kwambwililisha bantu.

³¹ Kombelelenu ebye na nkombela ya waine mu kufungila ku ntupu ya mpeka yaha mutena ha mutena.