Kulaba 27 - Libuka Lya Kuyela

Bana ba Zelofwendi Bambuyama

¹ Bana ba Zelofwehandi mwana Hefwa, Hefwa mwana Ngiliyande, Ngiliyande mwana Makiya, Makiya mwana Manashe, Manashe mwana Yoshefwa, bana ba bambuyama bengile ba Mahila na Nowa na Hongila na Milika na Tiliza.

² Bayile na kwimana kumbili ya Moshesha na mukankombela Eliza bakakutwaminina na likunge nimwalyo ku menginino a ntanda ya shikungulukilo, pe bambile ngayi,

³ “Tatiyetu wafwililile mu libelelengwa na kubula ku shiya bana babalume. Kaliha wekalile mu litunga lya Kola ou wafutulukilile Nyambi ya Ngula wafwile ndaba ya wubi wendi niyemwine.

⁴ Kati shumangani lizina lya tatiyetu likulobela mu Ishalela, ndaba ngayi kaliha wekalile na bana babalume ndi? Tupanike likona lyetu mukati ka bawushinda wa tatiyetu.”

⁵ Moshesha waletele shambo eshe kuli Nyambi ya Ngula,

⁶ kami Nyambi ya Ngula wambile kukwendi ngayi,

⁷ “Ebye bananyepe bana ba Zelofwehandi ba bambuyama binengi bya kupwisha, ngayi ubapanike likona mukati ka bawushinda wa tatiyabo. Shashiwahe likona lyendi liye kukwabo.

⁸ Tongweza bantu ba Ishalela ngayi ndi muntu ukufwa wakubula ku shiya mwana wa mulume, mwanendi wa mbuyama ukukona wuheti wendi.

⁹ Ndi mwana wa mbuyama ufwaye, pe bayayizendi hinge bakonzobendi babalume ba kubikona.

¹⁰ Ndi bayayizendi hinge bakonzobendi babalume ufwabo, pe batunyantu twendi ba kubikona.

¹¹ Ndi bayayizendi hinge bakonzobendi na batunyantu twendi ufwabo, niho kawushinda waha mutima ukubikona na kubiheta kwinga likona lyendi niyemwine. Bantu ba Ishalela bakalamenga eshe ngo lundayano lwa kushingiwa, ngonehe eshe namitongwezele Ami Nyambi ya Ngula.”

Yoshuwa ukuhatiwa kwinga ncwana kuli Moshesha

¹² Nyambi ya Ngula wambile kuli Moshesha ngayi, “Kandama ha Lipili lya Ambalimu pe upenze ku litunga liya nili na kupanika ku Baishalela.

¹³ Wamanisha kulimona niho ukafwe, ngonehe yayiyobe Aloni atendele,

¹⁴ ndaba wubili wenu mwalwishile ndayano zami mu libelelengwa lya Zini. Oho likunge nimwalyo lyalinyengelele hahami ku Melimba, mwakanine kulimuka ngovu zami za kuyela kumbili yabo.” (Melimba kanengi kaheloke ku Kandeshi mu libelelengwa lya Zini.)

¹⁵ Moshesha walombelele kuli Nyambi ya Ngula ngayi,

¹⁶ “Obe Nyambi, Obe Nyambi ya wumi wa myoyo nimwayo, nikulomba ngayi, hata muntu ou ukutwesha kutwaminina bantu,

¹⁷ Ou ukutwesha kubendesha mu nzita, ngayi likunge lyobe libule kwinga ngo bambelele bakubula mulishani.”

¹⁸ Nyambi ya Ngula wambile kuli Moshesha ngayi, “Shimba Yoshuwa mwana Nune, muntu wangana, pe kambika maboko wobe ha mutwe wendi.

¹⁹ Umwimike kumbili ya mukankombela Eliza naku likunge nimwalyo kuyo, kumbili yabo nimwabo ukamutoye kwinga ncwana yobe.

²⁰ Mupanikeko ngovu zobe zimo ngayi likunge nimwalyo lya Baishalela bamwombatale.

²¹ Yoshuwa ukakinka mutima kuli mukankombela Eliza ou ukashingishisha sha mutima wami ha kutendesha Ulimu na Tumimi.”

²² Moshesha watendele ngonehe amutongwezele Nyambi ya Ngula. Waletele Yoshuwa na kumwimika kumbili ya mukankombela Eliza na likunge nimwalyo.

²³ Wakambikile maboko wendi ha mutwe wa Yoshuwa na kumwimika kwinga ncwana yendi.