Kulaba 25 - Libuka Lya Kuyela

Bantu ba Ishalela bali ku Peyola

¹ Oho Baishalela batulilile ku mukulo wa Mimbambangoma, balume batatikile kutenda wunjenge na bambuyama bekalile kuyo ba Bamowambi.

² Bambuyama aba babehanininenga ku bimbo byabo bya ku kombelela, oku balemeshelenga nyambi wa Bamowambi. Bantu balile byakulya na kulemesha aba banyambi.

³ Baishalela batatikile kulemesha Mbaalu waku Peyola. Nohobene Nyambi ya Ngula wabapilaminine

⁴ pe wambile kuli Moshesha ngayi, “Kungulula bakakutwaminina nimwabo ba Ishalela, pe ubapamike mwaanancanana mu likunge, ngayi mwanga wukali wa Nyambi ya Ngula ufume hali Ishalela.”

⁵ Moshesha wambile ku babilolo ngayi, “Muntu nimwendi hakati kenu azihe balume nimwabo bakulemesha Mbaalu waku Peyola.”

⁶ Muntu umo waku Baishalela wengizile mbuyama wa Kamindiyani mu ntanda yendi ku meho a Moshesha na likunge nimwalyo, oho balililenga ku menginino a ntanda ya shikungulukilo.

⁷ Oho Fwinihashi, mwana Eliza muzukulya mukankombela Aloni, amonene eshe, wakatukile pe washiyile shikungulukilo. Washimbile mulinga,

⁸ pe walambashanine mulume na mbuyama mu ntanda yendi, pe wabashwangashwangile mulinga nimwabo. Mu nzila eye wulweli uya wakubula kutwesha kupangiwa walobeshelenga Ishalela walehelesho,

⁹ ngoboni oho wazihakale bantu ba 24,000.

¹⁰ Nyambi ya Ngula wambile kuli Moshesha ngayi,

¹¹ “Ndaba ya neshe anatende Fwinihashi mwana Eliza, muzukulya mukankombela Aloni, kupilama kwami kwatulakale ha bantu ba Ishalela. Fwinihashi wanyuvwilileko lihungu ndaba balemeshelenga nyambi washenge kupitakana Ami. Kami ngayi shiya nisho shuma nabulili kubalobesha mu kupilama kwami.

¹² Nohobene mutongweze ngayi, ‘mona, nili na kulimama nendi, kulimama kwa kulilumikila.

¹³ Niye na bazukulyendi bakayakiwa kwinga bakankombela ba kulimama mwaya myaka, ndaba wanyuvwilileko lihungu pe waletele bya kuyatila kwa wubi wa bantu.”

¹⁴ Lizina lya Kaishalela ou wazihiwile hamo na mbuyama wa Kamindiyani lyengile Zimili mwana Shalu, mukulwane wa lupashi mu mushobo wa Shimiyoni.

¹⁵ Lizina lya mbuyama lyengile Kozimbi. Zuli, tatiyendi, wengile mukulwane waku litanga lya mavumo a Bamindiyani.

¹⁶ Nyambi ya Ngula watongwezele Moshesha ngayi,

¹⁷ “Lwishenu Bamindiyani na kubalobesha,

¹⁸ ndaba ya wubi ou batendele kukwenu aha bakwongezele ku Peyola na ndaba ya Kozimbi, ou wazihiwile ha shikati sha wulweli wakubula kutwesha kupangiwa waku Peyola.”