Kulaba 22 - Libuka Lya Kuyela

¹ Baishalela batuntukile, pe batendele munkungwa mu zimbuwa za Mowambi ku mushamuko wa Yondana, kuliyahikiza na Yeliko.

Mwene waku Mowambi ukwihana Mbalaamu

² Oho Mwene Mbalaki mwana Zipola waku Mowambi ayuvwile ebye batendele Baishalela ku Baamoli naneshe bavulile Baishalela,

³ Mowambi na bantu nimwabo bekalile na bowa.

⁴ Bamowambi bambile kubakakutwaminina ba Bamindiyani ngayi, “Ou muhoko ukalobesha sha wangu byuma nimwabyo binatuzinguluku, ngonehe shiya nkunzi alyanga mumayembelelo.” Nohobene Mwene Mbalaki mwana Zipola

⁵ watumine miluwe mukwihana Mbalaamu mwana Mbeyola, ou wekalile ku Petola kwakwipi na mushinzi wa Yufuleta mu litunga lya Amawu. Batwalile lizu elye lya kuli Mbalaki ngayi, “Nikushinga ulimuke ngayi mukoka nimwawo unafumu ku Engepita, bantu bawo bali na kupanzanina nimwako kami bali na kufumbila kutambula litunga lyetu.

⁶ Banatupitakana ku wingi, nohobene hekulu, yeka ubankutile. Niho, kampe tukatwesha kubatampwisha na kubatanda mu litunga. Nalimuku ngayi oho ukwamba bya mfuywezi, bantu bakwinga bamfuywezi, pe kami oho ukwamba bya shikuto pe banakutiwi.”

⁷ Nohobene bakulwane ba Bamowambi na Bamindiyani batwalile bya kuyumba bya ku taha Mbalaamu na kumupanika mazu a Mbalaki.

⁸ Mbalaamu wambile kukwabo ngayi, “Lalenu wushiku walelo kuno, pe nzona nikamishimikile ebye anantongweze Nyambi ya Ngula.” Nohobene bakakutwaminina ba Bamowambi bekalile hamo na Mbalaamu.

⁹ Nyambi wezile kuli Mbalaamu na kumwipula ngayi, “Kati balume aba bali na kwikala na nobe hamo bayani?”

¹⁰ Pe Mbalaamu wambile kuli Nyambi ngayi, “Mbalaki mwana Zipola mwene waku Mowambi unabatumu kukwami mu kuntongweza

¹¹ ngayi bantu aba banafumu ku Engepita banapanzanini mu litunga nimwamo. Ukushinga ngayi nimukutilebo ngayi atweshe kubalwisha na kubatanda.”

¹² Nyambi wambile kuli Mbalaamu ngayi, “Hinga uya na bantu aba kami hinga ukuta aba bantu ba Ishalela ndaba bali na mfuywezi zami.”

¹³ Oho kwashileko Mbalaamu wayile ku babilolo ba Mbalaki pe wambile ngayi, “Bokenu kukwenu, Nyambi ya Ngula nankanishi kuya nanenu.”

¹⁴ Nohobene Bamowambi babokele kuli Mbalaki na kumutongweza ngayi Mbalaamu wakana kwiza nabo.

¹⁵ Niho Mbalaki atumine wa bakakutwaminina babengi, aba bengile babalemu kupitakana bakutatika.

¹⁶ Bayile kuli Mbalaamu na kumutwalila lizu lya kuli Mbalaki mwana Zipola ngayi, “Hekulu, hinga kwikala shuma sha ku kukanisha kwiza ku kwami!

¹⁷ Nikakupana maleema amanene na kutenda shuma nimwasho eshe ukwamba. Hekulu, yeka na kunkutila aba bantu.”

¹⁸ Ngoboni Mbalaamu wakumbwile ngayi, “Hinge ndi Mbalaki unampaniki shiliva nimwawo na ngolinde mu musheke wendi, kukatwesha kubula kwombatala ndayano za Nyambi ya Ngula, Nyambi yami ha shuma tuhu shashisheshishe nifwako.

¹⁹ Ngoboni bahekulu lalenu wushiku walelo kuno, ngonehe shiya batendele bamina, ngayi mwanga nilimuke ngayi ndi Nyambi ya Ngula uli na shuma shamina kami sha kuntongweza.”

²⁰ Wushiku uyo Nyambi wezile kuli Mbalaamu na kwamba ngayi, “Ndi bantu aba banezi na kukunyepa ngayi muye nabo, lishakashake, pe uye, ngoboni tenda tuhu ebye nikukutongweza.”

²¹ Nohobene oho kwashile lumenemene Mbalaamu wakandamine ha mbongolo yendi, pe wayile hamo na bakakutwaminina ba Bamowambi.

Mbalaamu na Mbongolo yendi

²² Nyambi wapilamine oho Mbalaamu ayile, pe oho Mbalaamu endelenga ha mbongolo yendi, hinga ashindikiziwa na bakamilimo bendi babili, lingeloyi lya Nyambi ya Ngula lyemanine mu nzila mu kuzika nzila yendi.

²³ Oho mbongolo amonene lingeloyi lya Nyambi ya Ngula hinga lyemana kuyo na kwata mukwale, washanukile mu nzila na kuya mu mafuba. Mbalaamu wakamine mbongolo pe wamubweshele mu nzila yendi.

²⁴ Niho lingeloyi emanine oku kwashepela nzila mukati ka mafuba abili a shinyanca, hamo na lwanda lwa limanya hambalila nimwayo ya nzila.

²⁵ Oho mbongolo amonene lingeloyi lya Nyambi ya Ngula, walikulwilile kukembi, pe wanjoyelelele liwulu lya Mbalaamu kukembi. Kami Mbalaamu wakamine mbongolo.

²⁶ Pe kami lingeloyi lyayile kumbili na kwimana hambalila aha hashepela nzila kuyo kwakubula mwanya wakupitila hinge kunkumo.

²⁷ Oho mbongolo amonene lingeloyi, walanganine hanci. Mbalaamu wapilamine pe watatikile kukama mbongolo na muwana wendi.

²⁸ Niho Nyambi ya Ngula ambishile mbongolo, pe mbongolo wambile kuli Mbalaamu ngayi, “Kati bishini natende kukwobe? Kati shumangani unankamini bikati ebye bihatu?”

²⁹ Mbalaamu wa kumbwile uya mbongolo ngayi, “Ndaba unanyebeshe! Shinga nekala na mukwale shinga nakuzihi.”

³⁰ Mbongolo wakumbwile Mbalaamu ngayi, “Kati kaliha nili uya mbongolo ou wakandamangaho mu kuyoya kwobe nimwako ndi? Mwakangani nakutendele nehe?” Pe Mbalaamu wakumbwile ngayi, “Byo.”

³¹ Niho Nyambi ya Ngula atoneshele meho a Mbalaamu, pe wamonene lingeloyi uya wemanine kuyo na mukwale wendi, pe Mbalaamu waliwishilile hanci na kufukumana hinga akinka lupala lwendi hanci.

³² Lingeloyi wamwambilile ngayi, “Kati shumangani unakamini kahatu mbongolo wobe? Nezi mu kuzika nzila yobe ndaba kaliha wafwanina kuya owu mukala.

³³ Ngoboni mbongolo wobe wamononga pe niho ashanuka kahatu. Shinga niye hembwe, shinga nakuziha na kuleha mbongolo.”

³⁴ Mbalaamu wakumbwile lingeloyi lya Nyambi ya Ngula ngayi, “Nabipishi. Kaliha nalimuka ngayi wemana mu nzila mu kunkanisha, ngoboni haya ndi ukuhanganika ngayi shinengi Kubipisha kukwami kuyako, pe nikuboka ku munzi.”

³⁵ Ngoboni lingeloyi wambile ngayi, “Yanga hamo nanaba bantu, ngoboni amba tuhu ebye nikakutongweza kwamba.” Nohobene Mbalaamu wayile na babilolo ba Mbalaki.

Mbalaki ukutambula Mbalaamu

³⁶ Oho Mbalaki ayuvwile ngayi Mbalaamu uli na kwiza, wayile na kumushimbawilila ku Ali, munzi waku mushinzi wa Anoni ku nginza ya Mowambi.

³⁷ Mbalaki wambile kuli Mbalaamu ngayi, “Oho nakutuminine ha muntanzi kati shumangani wabulilile kwiza? Kati wahanganikile ngayi kutwesha kukupanika ncuungu yayiwahe nifwako ndi?”

³⁸ Mbalaamu wakumbwile Mbalaki ngayi, “Nka nezakale bene ndi nifwako? Ngoboni haya, ngovu ngani eze nili nazo? Nikutwesha kwamba tuhu ebye Nyambi akuntongweza kwamba.”

³⁹ Nohobene Mbalaamu wayile hamo na Mbalaki ku munzi wa Kiliyati Huzoti,

⁴⁰ niho Mbalaki akombelelele zingombe na bambelele, pe wapanine nyama kuli Mbalaamu na bakakutwaminina aba bekalile nendi hamo.

Kulubulula kwa Mbalaamu kwakutatika

⁴¹ Oho kwashile lumenemene Mbalaki watwalile Mbalaamu ku Mbamoti Mbaalu. Okwe Mbalaamu atweshele ku mona mbalila ya bantu ba Ishalela.