Kulaba 21 - Libuka Lya Kuyela

Baishalela ba kukoma Bakenaani

¹ Oho mwene wa Bakenaani waku Alandi, waku mbalila yaku mabukubuku a Kenaani ayuvwile ngayi Baishalela bali na kwizilila ku nzila yaku Atalimi, wabalwishile na ku kwataho bamo.

² Niho Baishalela balibezele kuli Nyambi ya Ngula ngayi, “Obe ndi, shinga mwa shikuma uketabila ngayi tukakome aba bantu, pe tukabafungwila nimwabo na minzi kukwobe na kubalobesha.”

³ Nyambi ya Ngula wabayuvwile na kubayavwa kukoma Bakenaani. Nohobene Baishalela balobeshele nimwabo kulungu na minzi yabo, pe batumbile mwanya ngayi Homa.

Liyoka wakufuliwa ha lubemba

⁴ Baishalela bafumine ku Lipili lya Hola na nzila yiya yikulumba ku Liwate lya matete, ngayi baye na kuzinguluka litunga lya Endoma. Ngoboni ha nzila yabo bantu batampwile.

⁵ Bantu batatikile kulwisha Nyambi na Moshesha ngayi, “Haya shumangani munatufumishili mu Engepita ngayi tufwile muno mu libelelengwa, omu mwakubula byakulya hinge mema? Kami kutwesha kwimanina ha byakulya ebi bya kukimwisha ku mutima tufwako!”

⁶ Niho Nyambi ya Ngula atumine mayoka a wuhungu mukati ka bantu, pe Baishalela babengi bahumiwile na kufwa.

⁷ Bantu bezile kuli Moshesha pe bambile ngayi, “Tunabipishi, aha twambile na kulwisha Nyambi ya Ngula na kulwisha kami, obe. Haya lombela kuli Nyambi ya Ngula afumishe awa mayoka hakatiketu.” Nohobene Moshesha walombelelele bantu.

⁸ Niho Nyambi ya Ngula atongwezele Moshesha ngayi afule liyoka na kumuyaka ha luhonto lwa kuzika, ngayi muntu nimwendi ou nahumiwi mwanga atweshe kupenza kukwendi pe anyongomane.

⁹ Niho Moshesha afulile liyoka wa lubemba na kumuyaka ha luhonto. Muntu nimwendi uya wahumiwile oho apenzele ku liyoka wa lubemba wanyongomanine.

Kufuma ku Lipili lya Hola kukuma mu mukulo wa Bamowambi

¹⁰ Baishalela batuntukile na kutendela munkungwa wabo ku Omboti.

¹¹ Oho bafumine ku mbalila iyo ya Omboti, batendelele munkungwa ku mapembe Iye Ambalimu mu libelelengwa ku mushamuko wa litunga lya Bamowambi.

¹² Niho batendelele munkungwa mu Mukulo wa Zelendi.

¹³ Ha kufuma kuyo bayile kami na kutendela munkungwa hambalila yaku ncelele ya mushinzi wa Anoni, mu libelelengwa elye lya kukuma na mukati ka litunga lya Amoli. (Anoni yengile nginza mukati ka Bamowambi na Baamoli.)

¹⁴ Shiyo nisho shuma likwambila Libuka lya Zinzita za Nyambi ya Ngula ngayi, “Munzi wa Wahembu mu Mwanya wa Shufwahe, namu mikulo, mushinzi wa Anoni,

¹⁵ pe nkunkulukilo ya mikulo yiya yakuma ku munzi wa Ali na ku nginza ya Mowambi.”

¹⁶ Kufuma kuyo bayile ku mbalila yikutumbiwa ngayi Mbeeli, oku Nyambi ya Ngula ambilile Moshesha ngayi, “Leta bantu hamo, pe nikabapanika mema.”

¹⁷ Ha shikati shiyo bantu ba Ishalela bembilile lwimbo olwe ngayi “Mashima, tutwishenu mema wenu. Pe tukawashambilila na lwimbo!

¹⁸ Lishima lya kabile bamyene, hamo na bakakutwaminina bantu bakabile, na mishako yabo ya wene, hamo na mishako yabo ya kwendela.”

¹⁹ Kami kufuma ku Matana kuyo bayile kuya ku Nahaliyeli, nibo kami bafumine ku Nahaliyelu pe bayile ku Mbamoti,

²⁰ Kufuma ku Mbamoti bakumine mu mukulo wa litunga lya Mowambi, mu nceto ya Lipili lya Pishinga, kupenzesha ya libelelengwa.

Kukoma hali mwene Shihoni na mwene Ongi

²¹ Niho bantu ba Ishalela batumine miluwe kuli Shihoni Mwene wa Baamoli na kwamba ngayi,

²² “Twitabilishe tupite mu litunga lyobe. Etu na zingombe zetu kukashiya mukwakwa na kuya mukati ka mafuba wobe na mafuba wobe a shinyanca tufwako, kami ku kanwa mema aku mashima wobe tufwako tukwikala ha mukwakwa na kuya. Hantu tuli ha munkanda wa litunga lyobe.”

²³ Ngoboni Shihoni wabulile kwitabila bantu ba Ishalela kupita mukati ka litunga lyendi. Wakatwile banzita bendi pe bayile ku Yahazi mu libelelengwa na kulwisha Baishalela.

²⁴ Ngoboni Baishalela bazihile babengi ku bamalamo mu nzita na kutambula litunga lyabo, kubalika ku ncelele ku mushinzi wa Anoni kukuma na ku Yamboki, kukakuma naha nginza ya Baamoni ndaba nginza ya Baamoni yalamiwilenga shikuma.

²⁵ Nohobene bantu ba Ishalela bakwatile minzi nimwayo ya Baamoli, kulundikako na Heshimboni na minzi nimwayo ya zingulukako, pe bazikilemo.

²⁶ Heshimboni lwengile lukena lwalunene lwa Shihoni mwene wa Baamoli, ou walwishile mwene wa Bamowambi wakutatika, pe washimbile litunga lyendi nimwalyo kukakuma naku Mushinzi wa Anoni.

²⁷ Nisho shuma shiyo baka zinguli bembililenga ngayi, “Yeka ku Heshimboni, ku lukena lwa Mwene Shihoni! Tukushinga kulumona lwa kutendululiwa na kuhingamo.

²⁸ Ku mwaka ku lukena olwe lwa Heshimboni, bakanzita ba Shihoni baliyambile ngonehe mundilo, balobeshele lukena lwa Ali mu Mowambi, kami balobeshele binkanda bya ku mushinzi wa Anoni.

²⁹ Enu bantu ba ku Mowambi, makando wenu akenga anahiti! Enu mwalemeshanga Kemoshi munalobeshiwi! Ou nyambi yetu walehele bantu ngayi benge bantapwa, kami bambuyama bafutukile bantapwa ba mwene wa Baamoli.

³⁰ Ngoboni haya bazukulyabo banalobeshiwi, kubalika ku Heshimboni kutwala ku Ndimboni, kubalika ku Nashima kutwala ku Nofwa kwakwipi na Mendeba.”

³¹ Nohobene bantu ba Ishalela bazikile mu litunga lya Baamoli,

³² pe Moshesha watumine bantu mu kuhokela nzila yayiwahe ya kulwisha munzi wa Yaza. Baishalela bakomenewo na minzi yayo ya zingulukako, pe batandilemo Baamoli.

³³ Niho Baishalela babokele pe bayile na nzila ya kuya ku Mbashani, pe Mwene Ongi waku Mbashani wayile hamo na bakanzita bendi na kubalwisha ku Endileyi.

³⁴ Ngoboni Nyambi ya Ngula wambile kuli Moshesha ngayi, “Hinga umutina. Nikakupanika kukoma kwa kumupitakana na bantu bendi nimwabo na litunga lyendi. Kami ukatenda kukwendi ngonehe shiya watendele kuli Shihoni mwene wa Baamoli ou walelele ku Heshimboni.”

³⁵ Nohobene Baishalela bazihile Ongi na bana bendi na bantu bendi nimwabo na kubula ku shiyaho bamashaliza, pe niho batambwile litunga lyendi.