Kulaba 20 - Libuka Lya Kuyela

Byatendiwile ku Kandeshi

¹ Mu ngonda wakutatika likunge lya bantu nimwabo ba Ishalela bezile ku libelelengwa lya Zini na kuzika munkungwa ku Kandeshi. Kuyo niko afwilile Miliyamu na kufundiwilako.

² Kuyo bazikilile munkungwa kwabulile mema akunwa, pe likunge lya bantu bakungulukilile hamo na kufutulukila Moshesha na Aloni,

³ bantu balikananganishile na Moshesha, pe bambile ngayi, “Nisho shengile shashiwahe taha shinga twafwililile kumbili ya ntanda ya Nyambi ya Ngula hamo na baminetu Baishalela.

⁴ Haya shumangani kati eshe mwatuletela muno mukati ka libelelengwa? Nka haya tuli na kufwila tuhu kumo hamo na bimuna byetu?

⁵ Haya shumangani mwatufumishilile mu Engepita kutuleta mu mbalila yino ya makalikiza omu mwakubula ni kumena shuma? Muno mwakubula mpeka, hinge nkuyu, mwakubula mikolobozi ya shinyanca, mwakubula na manzenze. Muno mwabula hinge mema akunwa!”

⁶ Niho Moshesha na Aloni bafumine ku bantu pe bemanine ku menginino a Ntanda ya Shikungulukilo. Bashinkamine hinga bakinka zimpala zabo hanci, pe lumuni lwa kubyazima lwaku meho a Nyambi ya Ngula lwaholokele kukwabo.

⁷ Nyambi ya Ngula wambile kuli Moshesha ngayi,

⁸ “Shimba muwana uya wayakile kumbili ya Likwati lya Kulimama, pe niho obe na yayiyobe Aloni mwanga mukungule likunge nimwalyo. Ku meho wabo nimwabo, ukambe ku limanya liyo likalihayo, ngayi litutwishe mema, niho ukatutwishila mema bantu, ku limanya ngayi mwanga bakatweshe kunwa hamo na bimuna byabo.”

⁹ Moshesha wayile na kutola muwana ngonehe amutongwezele Nyambi ya Ngula.

¹⁰ Moshesha na Aloni ba kungwile likunge lya bantu kumbili ya limanya, pe Moshesha wambile ngayi, “Yuvwililenu, enu bakakulwisha. Kati tumitutwishile mema ku limanya elye ndi?”

¹¹ Niho Moshesha akatwile muwana pe wawukamine ku limanya kabili, pe kashinzi kengile kakanene na mema ashabikile, pe bantu nimwabo banwine mena na bimuna byabo.

¹² Ngoboni Nyambi ya Ngula wambilile Moshesha na Aloni ngayi, “Ndaba munabulu kunkulupila na kubula kulimukisha kuyela kwami ku meho a bantu ba Ishalela, kuka batwala mu litunga liyo naba kulupishile kubapanalyo mufwako.”

¹³ Eshe shamonekele ku Melimba, oku balinyengelelenga bantu ba Ishalela hali Nyambi ya Ngula, kami oku nikwo abamoneshele ngayi wa kuyela.

Mwene waku Endoma ukukanisha Baishalela kupita

¹⁴ Oho bashili ku Kandeshi, Moshesha watumine miluwe yayile kuli mwene waku Endoma. Bambile ngayi, “Lizu elye lya ku bawushindawenu, ba mishobo ya Ishalela. Hiwulimuka makando twayanda,

¹⁵ eshe bayile bankakazetu ku Engepita, oku twakekalile myaka yayingi. Baengepita bekalishile bankakazetu nanetu na shilala,

¹⁶ pe twabilikizile kuli Nyambi ya Ngula ngayi atuyuvwe. Niho ayuvwile kulila kwetu pe watumine lingeloyi, ou watututwishile mu Engepita. Hano haya tuli ku Kandeshi, munzi uli ku nginza ya litunga lyobe.

¹⁷ Haya hekulu twitabilishe tupite mu litunga lyobe. Etu na bimuna byetu kukashiya nzila, hinge kuya na kupita mu mafuba wenu tufwako, hinge mu mafuba a shinyanca, kami ku kanwa mu mashima wenu tufwako. Tukekala ha likululu na kupita hantu tuli ha munkanda wa litunga lyobe.”

¹⁸ Ngoboni Endoma wambile ngayi, “Kumitabilisha kupita mu litunga lyetu tufwako, ndi mukezeka kutenda noho, pe nikeza na mukwale na kumilwisha.”

¹⁹ Bantu ba Ishalela bambile ngayi, “Tukekala ha mukwakwa wawunene tuhu, pe ndi etu hinge ndi babimuna byetu bakanwa mema amo ku mema wenu pe tukayumba, eshe tukushinga tuhu kupita.”

²⁰ Endoma wambile kami ngayi, “Eshe tunakana!” Pe wakatukilile mutakwe na banzita bangovu kuya mu kulwisha bantu ba Ishalela.

²¹ Ndaba Endoma kaliha wetabilile Baishalela ngayi bapite mu litunga lyabo, Baishalela babokele, pe bayile na nzila yashenge.

Lufu lwa Aloni

²² Likunge nimwalyo lya Ishalela bafumine ku Kandeshi pe bakumine ku Lipili lya Hola,

²³ ha nginza ya Endoma. Niko kuyo Nyambi ya Ngula ambile kuli Moshesha na Aloni ngayi,

²⁴ “Aloni kuya mukwingina mu litunga elye na kulupishile kupanika ku Baishalela ufwako, ndaba wubili wenu mwa lwishile ndayano zami ku Melimba.

²⁵ Shimba Aloni na mwanendi Eliza, pe mukandame ku Lipili lya Hola,

²⁶ pe uvule Aloni bya wunkombela, ubivwalike Eliza. Aloni uli na kuya na kufwilako.”

²⁷ Moshesha watendele ebye amutongwezele Nyambi ya Ngula, bakandamine ku Lipili lya Hola oku likunge lya bantu hibabamona,

²⁸ Moshesha wavulile Aloni bikobelo bya wunkombela kuyo na kubivwalika Eliza. Hayilu ya lipili niho akafwililile Aloni, pe Moshesha na Eliza ba kunkulukile.

²⁹ Likunge nimwalyo lya bantu lyalimukile ngayi Aloni unafu, pe bantu nimwabo Baishalela bamulilile matena makumi ahatu.