Kulaba 18 - Libuka Lya Kuyela

Milimo ya Bakankombela na Balevi

¹ Nyambi ya Ngula wambile kuli Aloni ngayi, “Obe na bana bobe na Balevi mwafwanina ku mona malwa aku mulandu nimwawo wakundama ku mulimo wa muntanda ya Shizila, ngoboni obe tuhu na bana bobe babalume mukamona malwa aku mulimo wa mukankombela.

² Ngoboni leta ku bawushinda wobe, ba mushobo wa Levi mukutenda hamo na nobe na ku kuyavwa, aha obe na bana bobe babalume mushili kutenda ku ntanda ya wupaki.

³ Bakalitwike milimo yabo kukwenu na ngovu zabo ku ntanda ngoboni kaliha ba ku fwanina kuhenyena ku byuma bya kuzila mu mwanya wa kuyela hinge hamo na kaala. Ndi ba kutenda noho, nimwenu, obe nanibo mukafwa.

⁴ Bakatenda hamo na nobe na kulitwika mulimo nimwawo mu Ntanda ya shikungulukilo, ngoboni kowa muntu wakubula kutwesha kutenda hamo nanenu milimo.

⁵ Ngoboni obe tuhu na bana bobe ninkayenu, enu mu ku fwanina kutenda mulimo mu mwanya wa kuyela na kaala, ngayi wukali wami wubule kukatuka na kulwisha bantu ba Ishalela.

⁶ Nahata bawushindawenu Balevi kubafumisha mukati ka Baishalela ngayi nimipanebyo kwinga bishemo kukwobe. Nibo banafunguliwili kukwami ngayi batweshe kutenda milimo yabo mu Ntanda ya Shikungulukilo.

⁷ Ngoboni obe tuhu na bana bobe, enu mukatenda mulimo nimwawo uya wakukombelela waku kaala na nebye bili mu mwanya wa kuyela. Byuma ebye nimwabyo yinengi milimo yenu, ndaba namipaniki bishemo bya wunkombela. Muntu enge yani hinge yani wakubula kutwesha kutenda ou mulimo wakwiza kwakwipi na byuma bya kuzila ukafwa.”

Shitapilo sha Bakankombela

⁸ Nyambi ya Ngula wambile kuli Aloni ngayi, “Mona nakupaniki bishemo byabinene binapanikiwi kukwami, biya binabulu kuhokeshiwa kwinga zinkombela. Nili na kubipanika kukwenu naku bazukulyenu kwinga shitapilo shinapanikiwi kukwobe mwaya myaka.

⁹ Bya zintupu za kuyela za kubula kuhokeshela ha kaala, eze nizo zikenga zenu kukwazo, zintupu za mpeka na zintupu zaha wubi, kami zintupu za kulikuliza. Byuma nimwabyo biya binapanikiwi kukwami kwinga zintupu za shizila zikwinga zobe na bana bobe.

¹⁰ Mu ku fwanina kulila byuma ebye mu mwanya ou washizila, kami ndele balume tuhu nibo ba kutwesha kubilya, pe binengi bya kuyela kukwenu.

¹¹ “Mukufungila ku mu kungwila wamina, wa bishemo biya ba kukombelela Baishalela kwinga zinkombela za kuyengayengesha kukwami zikenga zenu. Nili na kuzipanika kukwobe na bana bobe babalume na bana bobe ba bambuyama ku shikati nimwasho. Balupashi lwobe baya banengi ba kuyela ba kutwesha kulyako.

¹² “Nili na kupanika nimwabyo byabiwahe bya kutatika kuyima biya Baishalela ba kumpana ha mwaka ha mwaka, mazi a olive na waine na mpeka.

¹³ Nibyo bikenga byenu. Balupashi lwobe baya banengi ba kuyela ba kutwesha kulyako.

¹⁴ “Shuma nimwasho mu Ishalela shiya shinafunguliwi kukwami shinengi shenu.

¹⁵ “Mweli nimwendi wa muntu hinge wa shimuna uya bakaleta Baishalela kukwami ukenga wenu. Ngoboni mu ku fwanina kutambula bya kuyumba bya kukuliza mweli nimwendi, pe kami tambula bya kuyumba bya mweli nimwendi wa muntu hinge wa kayamana uya wabula kuyela.

¹⁶ Batwanuke bakakuliziwa oho bali na ngonda umo ha ndando ya kuliyuvwa ya muwayawaya wa shiliva mutanu, ngonehe ndando yalandiwanga yaku ntanda ya shizila.

¹⁷ Ngoboni bakutatika kuhemuwa ku zingombe na bambelele na bampongo kwinga ba kukuliziwa bafwako, nibo benga bamibami na mwaka, pe bakakombeleliwa kukwami. Yitila mukeza wabo ha kaala, pe hokesha mazi wabo kwinga nkombela ya byakulya, livumba lyabo likangwahililisha.

¹⁸ Nyama yabo yikwinga yenu, ya kwinga ngonehe kapumpo kaya kakuyengayengesha na shilama sha shilyo.

¹⁹ “Bitapilo nimwabyo bya ku zinkombela bakaleta kukwami Baishalela, nili na kubipanika kukwobe nakubana bobe babalume nakubana bobe babambuyama, ku shikati nimwasho shikeza kumbili. Okwe kunengi kulimama kwa mushele kwa Okwe kunengi kulimama kwa mushele. Kuya nalimama hamo nanenu na bazukulyenu.”

²⁰ Nyambi ya Ngula wambile kuli Aloni ngayi, “Obe kukatambula likona limo liya likatwesha kukoniwa ufwako, kami kutambula shitapilo sha litunga lya Ishalela liya likaketuliwila kukwobe ufwako. Ami tuhu, nikenga likona na shitapilo shobe.”

Shitapilo sha Balevi

²¹ Nyambi ya Ngula wambile ngayi, “Napaniki Balevi sha wulikumi nimwasho shiya ba kuleta kukwami bantu ba Ishalela. Eshi shinengi likona ku mulimo wabo wakulama ntanda ya shikungulukilo.

²² Baishalela bamina ku fwanina bafwako kami kuhenyena ku ntanda ya shikungulukilo, pe mu nzila eye ba kuliletela mulandu wa lufu nibo bamwine.

²³ Ku balika hano na kumbili Balevi haya bakalama ntanda ya shikungulukilo na kutenda milimo. Eze zikenga ndayano kubihemunwino nimwabyo, mukati ka bantu nimwabo ba ishalela.

²⁴ Ndaba balevi na bapaniki sha wulikumi eshe Baishalela bali na kuleta kukwami kwinga shitapilo shabo. Shiya nisho shuma nabatongwezele ngayi kukekala na likona lya mwayile mwaka mu Ishalela bafwako.”

Sha wulikumi sha Balevi

²⁵ Nyambi ya Ngula wambile kuli Moshesha ngayi,

²⁶ “Tongweza Balevi, oho mu kutambula sha wulikumi sha ku Baishalela shiya akumipanika Nyambi ya Ngula kwinga likona lyenu, mu ku fwanina kuleta sha wulikumi shasho kwinga nkombela kuli Nyambi ya Ngula.

²⁷ Eye ntupu yikahanganikiwila ngo ku wulemu wa kwesheka hamo na nkombela eye ndimi akuleta kufumisha oku ba kupumpulila mpeka ya mbuto yayipya na waine yayipya ya ku shizongelo.

²⁸ Mu nzila eye nanenu kami mukatupula nkombela iya yenga ya Nyambi ya Ngula ku byenu bya wulikumi ebye mu kutambula ku Baishalela. Ebye mu kutambula mukapanika nkombela ya Nyambi ya Ngula kuli mukankombela Aloni.

²⁹ Ku bishemo nimwabyo mu kutambulanga, hatenuho byabiwahe biya mu ku fwanina kutupula.

³⁰ Oho mwapanakale shitapilo shashiwahe, mwanga mulitentekele bya ku shalaho, ngonehe bene ndimi atentekanga ebye binashalaho ku kupumpulula hinge ku shizongelo oho wapanakale nkombela.

³¹ Enu na ba lupashi lwenu mwanga mulyeyo nimwayo, ndaba niyo yinengi ncuungu yobe yaha mulimo wa muntanda ya shikungulukilo.

³² Kukafwa na mulandu oho mu kuyilya ndi enu munalete byabiwahe byayo kuli Nyambi ya Ngula mufwako. Ngoboni monenu ngayi Kubipisha zinkombela za kuyela za Baishalela mufwako ha kulya nimwazo zaha zinkombela oho shilolo shitapilo shashiwahe shitupuliwe. Ndi mukutenda noho, mukazihiwa.”