Kulaba 16 - Libuka Lya Kuyela

Kufutulukila kwa Kola, Ndatani na Ambilamu

¹ Kola mwana Iza, wa Kalevi wa livumo lya Kohati wekalile na kukanca kwakufutukila Moshesha. Bawililile ku manungo bantu bahatu ba mushobo wa Lubena, ba Ndatani na Ambilamu bana ba Eliyambi babalume na Oni mwana Peleti na bana ba Lubena

² Bawanikile bantu, pe bafutulukilile Moshesha na Aloni hamo na bamina 250 bakakutwaminina ba baishalela ba kulimukiwa shiwahe, ba kuhatiwa ku likunge lya bantu ba Ishalela.

³ Bakungulukilile kuli Moshesha na Aloni bambile kukwabo ngayi, “Enuboni kami munayi kwakutali shikuma! Likunge lya bantu nimwabo lya Baishalela bakwinga banalifungwili kuli Nyambi ya Ngula, kami Nyambi ya Ngula uli hamo na nimwetu. Shumangani boni obe Moshesha, kati ukuliyaka hayilu ya likunge lya bantu nimwabo lya Baishalela?”

⁴ Oho Moshesha ayuvwile eshe, wafukumanine hanci niyemwine pe walombelele.

⁵ Niho ambile kuli Kola na bakakumukonka ngayi, “Nzona lumenemene Nyambi ya Ngula ukatumonesha ou nengi wendi, kami ukaleha ou nengi wendi kuhenyena kukwendi, nikwo ku monesha ngayi muntu ou anahata ukamuhenyeshela ku kaala.

⁶ Nzona lumenemene, obe na bakakukukonka mukashimba binzoyo bya kukalila mundilo,

⁷ na kukalilaho mashanga a mundilo na kuyakaho incence na kubitwala ku kaala. Niho tukamone ou anahata Nyambi ya Ngula nengi uti hakatiketu. Enu Balevi kami munayi hahatali shikuma, mukwinga bantu aba banalineneheshe.”

⁸ Moshesha wambile kuli Kola ngayi, “Yuvwililenu enu Balevi!

⁹ Kampe mu kuhanganika ngayi shinengi shambo shashishe shiya Nyambi wa Ishalela, anamitapululu ku wingi wa likunge lya bantu ba Ishalela, nohobene ngayi mutweshe kuhenyena kukwendi, kutenda mulimo wenu mu Ntanda ya Shikungulukilo na kutendela likunge milimo.

¹⁰ Unamitabili enu na Balevi bamina nimwabo kuwana lileema elye kukwendi, pe haya muli na kwezeka kutambula mulimo wakukombelela!

¹¹ Oho mu kulinyengela kuli Aloni, mwa shikuma nisho shinengi kulinyengela kuli Nyambi ya Ngula ngayi enu na bakakumikonka muli na kumufutulukila.”

¹² Niho Moshesha atuminine Ndatani na Ambilamu bana ba Eliyambi, pe bambile ngayi, “Etu kuyako tufwako!

¹³ Kati shiya unatufumishili ku litunga likukunkula mahwe na wushi mu Engepita mu kutuzihila muno mu libelelengwa shinengi shuma shashishe ndi? Kati kami ushili kutuhetela mu wutungu ndi?

¹⁴ Mwa shikuma kaliha watufumishile tuhu mu litunga likukunkula mahwe na wushi, hinge kutupanika mafuba hamo na mafuba a shinyanca kwinga likona lyetu, kami haya muli na kutukwata kwata ha meho. Etu kukayako tufwako!”

¹⁵ Moshesha wakalihile pe wambile kuli Nyambi ya Ngula ngayi, “Hinga utambula ntupu yimo eye ba kuleta aba bantu. Kaliha ninabipishili umo kukwabo, kushimba mbongolo umo ha bambongolo zabo nifwako.”

¹⁶ Moshesha wambile kuli Kola ngayi, “Nzona obe hamo na bantu bobe 250 ba ku fwanina kwiza ku Ntanda ya Shikungulukilo. Aloni kami ukekalako.

¹⁷ Muntu na muntu hakati kenu ukashimba shinzoyo sha kukalila mundilo na kuyakaho incence, pe niho aletesho ku meho a Nyambi ya Ngula. Binzoyo bya incence bilingane 250. Aloni kami ukashimba shinzoyo shendi sha kuhokeshela Incence.”

¹⁸ Nohobene muntu na muntu watolele shinzoyo shendi sha kukalila mundilo, wakalilileho mashanga a mundilo na kuyakaho incence, pe bemanine ku menginino aku ntanda hamo na Moshesha na Aloni.

¹⁹ Niho Kola akungwile likunge nimwalyo hamo, pe bemanine kupenza kuli Moshesha na Aloni ku menginino a ntanda ya shikungulukilo. Babazumukile tuhu lumuni lwa kumwesha lwaku meho a Nyambi ya Ngula lwaliholwele ku likunge nimwalyo,

²⁰ pe Nyambi ya Ngula wambile kuli Moshesha na Aloni ngayi,

²¹ “Litapenu kuli aba bantu, nikubalobesha shawangu wangu.”

²² Ngoboni Moshesha na Aloni balambile hanci na zimpala zabo ku limvu na kwamba ngayi, “Obe Nyambi, unengi mwine wumi nimwawo. Oho muntu umo unabipishi, kati ukupilamina likunge nimwalyo ndi?”

²³ Nyambi ya Ngula wambile kuli Moshesha ngayi,

²⁴ “Tongweza bantu bafume ku zintanda za Kola na Ndatani na Ambilamu.”

²⁵ Niho Moshesha, bamushindikizile bakakutwaminina ba Ishalela, bayile kuli Ndatani na Ambilamu.

²⁶ Wambile ku bantu ngayi, “Yimaninenu kwakutali na zintanda za naba bantu bakuluwa, kami hinga mukwata ku shuma shabo. Ndelewa mu kukombiwila kumo nabo, ndaba ya wubi wabo nimwawo.”

²⁷ Nohobene bafumineko ku zintanda za ba Kola na Ndatani na Ambilamu. Ndatani na Ambilamu batutikile ha munkanda pe bemaninenga ku menginino aku zintanda zabo hamo na bakazabo na bana babo.

²⁸ Moshesha wambile ku bantu ngayi, “Eshe nisho mukalimuka ngayi Nyambi ya Ngula wantumine mukutenda byuma ebye, kami ngayi kaliha nabitende na kuhata kwami.

²⁹ Ndi bantu aba ba kufwa na lufu lwa fwanga bantu nimwabo, kwakubula kashushwilo ka kuli Nyambi, pe Nyambi ya Ngula wantumine.

³⁰ Ngoboni ndi Nyambi ya Ngula ukutenda shuma shimo shabula kuyuvwanika, pe limvu mwanga lishinkuluke na ku bamina hamo na biya baheta nimwabyo, ngayi baye babomi ku kalunga, mukalimuke ngayi aba bantu bakanine Nyambi ya Ngula.”

³¹ Oho ukumanisha tuhu kwamba, limvu lyatabukile mwata ntwee mu nceto ya Ndatani na Ambilamu

³² pe lya baminine na ba mapashi wabo, hamo na bakakukonka Kola na wuheti wabo.

³³ Nohobene bayile mu kalunga, hamo na wuheti wabo. Limvu lyafwikile hayilu yabo pe baziminine.

³⁴ Bantu ba Ishalela nimwabo aba bekalileko betukile oho bayuvwile miteto yabo, pe bakalokele ngayi, “Nyohwenu! Kutina limvu likutumina nanetu kami!”

³⁵ Niho Nyambi ya Ngula atumine mundilo uya walashekele na kuhokesha bantu 250 bakombelelenga incence.

Binzoyo bya kukalila mundilo

³⁶ Nyambi ya Ngula wambile kuli Moshesha ngayi,

³⁷ “Tongweza Eliza, mwana mukankombela Aloni, kufumisha binzoyo bya lubemba bya kukalila mundilo, kami kayite mashanga ku binzoyo bya kukalila mundilo, ndaba binzoyo bya kukalila mundilo binengi bya kuzila.

³⁸ Byengile bya kuzila oho babitupwilenga ku kaala ka Nyambi ya Ngula. Nohobene tola binzoyo bya kukalila mundilo bya bantu aba banazihiwili ha Kubipisha kwabo ufuleho biyenga byabishe pe utende bya kufwika ha kaala. Nibyo bikenga bilimukisho ku bantu ba Ishalela!”

³⁹ Nohobene mukankombela Eliza watolele binzoyo bya kukalila mundilo, pe wafulileho biyenga byabishe bya kufwika ha kaala.

⁴⁰ Eshe shengile sha kushiwulwilisha Baishalela, ngayi muntu wakubula kwinga muzukulya Aloni ku fwanina ufwako kwiza ku kaala mu kuhokesha incence ku meho a Nyambi ya Ngula. Kutinisha uzihiwa ngonehe Kola na bantu bendi. Nimwasho eshe shatendiwile ngonehe Nyambi ya Ngula atongwezele Eliyazala muli Moshesha.

Aloni ukulamwina bantu

⁴¹ Oho kwashile likunge nimwalyo lya Ishalela lyalinyengelele hali Moshesha na Aloni pe bambile ngayi, “Enu munazihi bantu bamo ba Nyambi ya Ngula.”

⁴² Oho ba kungulukakale mu kulwisha Moshesha na Aloni, bafutukile kupenza ku ntanda, pe bamonene likumbi linafwiki na lumuni lwa kubyazima lwaku meho a Nyambi ya Ngula, lwaholokele.

⁴³ Moshesha na Aloni bayile mukwimana kumbili ya ntanda ya shikungulukilo,

⁴⁴ kami Nyambi ya Ngula wambile kuli Moshesha ngayi,

⁴⁵ “Yimaninenu kwa kutali nanaba bantu, nili na kubalobesha haha!” Wubili wabo balambile hanci na zimpala zabo,

⁴⁶ pe Moshesha wambile kuli Aloni ngayi, “Shimba shinzoyo shobe sha kukalila mundilo, kalilaho mashanga a mundilo aku kaala, pe yakaho incence ha mashanga. Niho unyankupile ku bantu, pe utende shiheka sha kubambwililisha. Nyankupisha wukali wa Nyambi ya Ngula wabalikakale na makando atatikakale.”

⁴⁷ Aloni wombatalile, washimbile shinzoyo shendi sha kukalila mundilo na kwitukila mukati ka bantu banakungulukili. Oho amonene ngayi malwa abalikakale, wayakile incence yakuhokesha ya livumba lyaliwahe ha mashanga, pe watendele shiheka sha kwambwililisha bantu.

⁴⁸ Wayile na kwimana mukati ka babomi na bafu, pe wulweli wamanine.

⁴⁹ Bantu aba bafwile bengile 14,700 kubula kulaba obo bafwile ha kufutulukila kwa Kola.

⁵⁰ Oho wulweli wakubula kutwesha kupangiwa wamanine, Aloni wabokele kuli Moshesha ku menginino a ntanda ya shikungulukilo.